ރައީސް އިބްރާހިމް މުހައްމަދު ސޯލިހް ނޮވެމްބަރު 2018ގައި ރައީސްކަމުގެ ހުވާކުރެއްވުމަށް ފަހު މަޖިލީހުގެ އޭރުގެ ނައިބު ރައީސް މޫސާ މަނިކާ ބައްދަލުކުރައްވަނީ. (ފައިލް ފޮޓޯ/ރައީސް އޮފީސް)
އެމްޑީޕީއާ މިއަދު އަލުން ގުޅިވަޑައިގެންނެވި އެ ޕާޓީގެ ކުރީގެ ޗެއާޕާސަން މޫސާ މަނިކު (ރީކޯ މޫސަ) އަކީ އަބަދުވެސް އިސްލާހަށް މަސައްކަތްކުރައްވާ ބޭފުޅެއް ކަމަށް ވިދާޅުވެ، ރައީސް އިބްރާހިމް މުހައްމަދު ސޯލިހް މިރޭ މޫސާ މަނިކަށް މަރުހަބާ ވިދާޅުވެއްޖެ އެވެ.
ވީ ކިހިނެއް؟ - ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު އެމްޑީޕީއާ އަލުން ގުޅިވަޑައިގަތުމުގެ ފޯމު އެ ޕާޓީގެ ޗެއާޕާސަން، އިކޮނޮމިކް މިނިސްޓަރު ފައްޔާޒު އިސްމާއިލްއާ މިއަދު ހަވާލުކުރެއްވީ ޕާޓީގެ އިސް ލީޑަރު، ރައީސް ސޯލިހުގެ ހާޒިރުގަ އެވެ.
-
އިތުރަށް ކިޔާލަން - މޫސާ މަނިކު 8 އަހަރަށް ފަހު އެނބުރި އެމްޑީޕީއަށް
ބުނީ ކީކޭ؟ - ޕާޓީ ތެރޭގައި އުފެދުނު ހިޔާލުތަފާތުވުންތަކަކަށް ފަހު 2014ގައި އެމްޑީޕީން ވަކިކުރި މޫސާ މަނިކު އެ ޕާޓީއާ އަލުން ގުޅިވަޑައިގެންނެވި ފޯމު ހަވާލުކުރެެއްވި ތަނުގެ ފޮޓޯ އެމްޑީޕީގެ ރަސްމީ ޓުވިޓާ އެކައުންޓުން އާންމުކުރިތާ މާ ގިނައިރެއް ނުވެ ރައީސް ވަނީ މޫސާ މަނިކަށް މަރުހަބާ ވިދާޅުވެފަ އެވެ.
އެމްޑީޕީ އުފެއްދުމުގައި ވެސް އިސްކޮށް ބައިވެރިވެވަޑައިގެންނެވި މޫސާ މަނިކަކީ، ރައީސް ވިދާޅުވި ގޮތުގައި، އެމްޑީޕީއަށް އަގުހުރި ހިދުމަތްތަކެއް ކޮށްދެއްވާފައިވާ ބޭފުޅެކެވެ.
"[މޫސާ މަނިކު] މި ޕާޓީއާ އަލުން ގުޅިވަޑައިގަތުމަކީ، މި ޕާޓީ އަށާއި އަޅުގަނޑުމެން އެންމެންނަށް ލިބުނު އިތުރު ހިތްވަރެއް. މޫސަ އަކީ އަބަދުވެސް އިސްލާހަށް މަސައްކަތްކުރައްވާ ބޭފުޅެއް،" ރައީސް ކުރެއްވި ޓުވީޓެއްގައިވެ އެވެ.
އެނގުން މުހިންމު - ޑިސެމްބަރު 2014ގައި މޫސާ މަނިކު އެމްޑީޕީން ވަކިކޮށްފައިވަނީ، އޭރުގެ އުއްތަމަ ފަނިޑޔާރު އަހުމަދު ފާއިޒް ހުސައިނާއި ސުޕްރީމް ކޯޓުގެ އޭރުގެ ފަނޑިޔާރު އަދި މިހާރު އުއްތަމަ ފަނޑިޔާރު މުއުތަސިމް އަދުނާން މަގާމުން ވަކިކުރުމާ ދެކޮޅަށް ވޯޓުލުމަށް އެމްޑީޕީގެ ޕާލަމެންޓްރީ ގުރޫޕުން ނިންމާފައި ވަނިކޮށް، ވިޕްލައިނާ އޭނާ ހިލާފުވި ކަމަށް ބުނެ އެވެ. އޭނާއަށް އެޅި ފިޔަވަޅުތަކަކީ:
-
ވަކި މުއްދަތެއްގެ ތެރޭގައި މާފަށް އެދެން އެންގުން
-
އަލުން ޕާޓީއާ ގުޅިވަޑައިގަންނަވާ ނަމަ އިތުރު 50 މެމްބަރުންގެ ސޮޔާއެކު އެކަން ކުރެއްވުން
-
އެމްޑީޕީގެ އެއްވެސް މަގާމެއް އަދި އެއްވެސް ޕްރައިމަރީއެއްގައި ކުރިއަށް އޮތް ފަސް އަހަރުގެ ތެރޭގައި ބައިވެރި ނުކުރުން
ފަސްމަންޒަރު - މޫސާ މަނިކު ޕާޓީން ވަކިކޮށްފައިވަނީ އޭރު މުޅި ޕާޓީ ކޮންޓްރޯލް ކުރައްވައިގެން އުޅުއްވި ޕާޓީގެ ރައީސް މުހައްމަދު ނަޝީދާ ހިޔާލު ތަފާތުވުމުން ކަމަަށް އޭނާ އަބަދުވެސް ތުހުމަތުކުރެއްވި އެވެ. އޭގެ ފަހުން، މޫސާ މަނިކު ވަނީ އޭރު ވެރިކަން ކުރި ޕާޓީ އަދި އެމްޑީޕީއާ ވާދަވެރި ޕީޕީއެމްއާ ގުޅިވަޑައިގެންފަ އެވެ. ނަމަވެސް، 2019ގައި ރައްޔިތުންގެ މަޖިލީހުގެ އިންތިހާބުގައި ވާދަކުރުމަށް ޕީޕީއެމްގެ ޓިކެޓް ނުލިބުމުން، ފަހުން ޕީޕީއެމާ ފެއަށް ޖެހިވަޑައިގެންނެވި އެވެ.
މި ސަރުކާރު އައި ފަހުން، މޫސާ މަނިކު ބެލެވިފައި ވަނީ ރައީސް ސޯލިހްއާ އަރިސް ބޭފުޅެއްގެ ގޮތުގަ އެވެ. ގިނަ އަދަދެއްގެ ހަފްލާތަކާއި ރަސްމިއްޔާތުތަކުގައި ރައީސްއާ އެކު މޫސާ މަނިކު ބައިވެރިވެވަޑައިގަންނަވަ އެވެ.
ކޮމެންޓް (1)
ފަހީމު އަލީ