މޫސާ މަނިކު އެމްޑީޕީއާ ގުޅިވަޑައިގެން މެމްބާޝިޕް ފޯމް ޗެއާޕާސަން ފައްޔާޒާ މިއަދު ހަވާލުކުރައްވަނީ
މޫސާ މަނިކު އަށް އަހަރަށް ފަހު އެނބުރި އެމްޑީޕީއަށް
ޕާޓީ ތެރޭގައި އުފެދުނު ހިޔާލުތަފާތުވުންތަކަކަށް ފަހު 2014ގައި އެމްޑީޕީން ވަކިކުރި އެ ޕާޓީގެ ކުރީގެ ޗެއާޕާސަން މޫސާ މަނިކު (ރީކޯ މޫސަ) މިއަދު އެމްޑީޕީއާ އަލުން ގުޅިވަޑައިގެންފި އެވެ.
ވީ ކިހިނެއް؟ - ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު އެމްޑީޕީއާ އަލުން ގުޅިވަޑައިގަތުމުގެ ފޯމު އެ ޕާޓީގެ ޗެއާޕާސަން، އިކޮނޮމިކް މިނިސްޓަރު ފައްޔާޒު އިސްމާއިލްއާ މިއަދު ހަވާލުކުރެއްވީ ޕާޓީގެ އިސް ލީޑަރު، ރައީސް އިބްރާހިމް މުހައްމަދު ސޯލިހުގެ ހާޒިރުގަ އެވެ.
ތަފްސީލު - އެމްޑީޕީ އުފެއްދުމުގައި ވެސް އިސްކޮށް ބައިވެރިވެވަޑައިގެންނެވި މޫސާ މަނިކު އެ ޕާޓީއާ ގުޅިވަޑައިގެންނެވިކަން އިއުލާންކޮށް، އެމްޑިޕީގެ ރަސްމީ ޓްވިޓާ އެކައުންޓުން ދާދި ދެންމެއަކު ވަނީ އޭނާއަށް މަރުހަބާ ކިޔައިފަ އެވެ.
އެމްޑީޕީން އާއްމުކުރި ފޮޓޯއިން ފެންނަ ގޮތުގައި މޫސާ މަނިކު ފޯމު ހަވާލުކުރެއްވި ރަސްމިއްޔާތުގައި ރައީސް ސޯލިހްގެ އިތުރުން، ފޮރިން މިނިސްޓަރު އަބްދުﷲ ޝާހިދާއި ޑިފެންސް މިނިސްޓަރު މާރިޔާ އަހްމަދު ދީދީ އާއި ސަރުކާރަށް ތާއީދު ކުރާ އެމްޑީޕީގެ ބައެއް މަޖިލިސް މެންބަރުން ވެސް ބައިވެރިވެވަޑައިގެންނެވި އެވެ.
އެނގުން މުހިންމު - ޑިސެމްބަރު 2014ގައި މޫސާ މަނިކު އެމްޑީޕީން ވަކިކޮށްފައިވަނީ، އޭރުގެ އުއްތަމަ ފަނިޑޔާރު އަހުމަދު ފާއިޒް ހުސައިނާއި ސުޕްރީމް ކޯޓުގެ އޭރުގެ ފަނޑިޔާރު އަދި މިހާރު އުއްތަމަ ފަނޑިޔާރު މުއުތަސިމް އަދުނާން މަގާމުން ވަކިކުރުމާ ދެކޮޅަށް ވޯޓުލުމަށް އެމްޑީޕީގެ ޕާލަމެންޓްރީ ގުރޫޕުން ނިންމާފައި ވަނިކޮށް، ވިޕްލައިނާ އޭނާ ހިލާފުވި ކަމަށް ބުނެ އެވެ. އޭނާއަށް އެޅި ފިޔަވަޅުތަކަކީ:
-
ވަކި މުއްދަތެއްގެ ތެރޭގައި މާފަށް އެދެން އެންގުން
-
އަލުން ޕާޓީއާ ގުޅިވަޑައިގަންނަވާ ނަމަ އިތުރު 50 މެމްބަރުންގެ ސޮޔާއެކު އެކަން ކުރެއްވުން
-
އެމްޑީޕީގެ އެއްވެސް މަގާމެއް އަދި އެއްވެސް ޕްރައިމަރީއެއްގައި ކުރިއަށް އޮތް ފަސް އަހަރުގެ ތެރޭގައި ބައިވެރި ނުކުރުން
ފަސްމަންޒަރު - މޫސާ މަނިކު ޕާޓީން ވަކިކޮށްފައިވަނީ އޭރު މުޅި ޕާޓީ ކޮންޓްރޯލް ކުރައްވައިގެން އުޅުއްވި ޕާޓީގެ ރައީސް މުހައްމަދު ނަޝީދާ ހިޔާލު ތަފާތުވުމުން ކަމަަށް އޭނާ އަބަދުވެސް ތުހުމަތު ކުރެއްވި އެވެ. އޭގެ ފަހުން، މޫސާ މަނިކު ވަނީ އޭރު ވެރިކަން ކުރި ޕާޓީ އަދި އެމްޑީޕީއާ ވާދަވެރި ޕީޕީއެމްއާ ގުޅިވަޑައިގެންފަ އެވެ. ނަމަވެސް 2019ގައި ރައްޔިތުންގެ މަޖިލީހުގެ އިންތިހާބުގައި ވާދަ ކުރުމަށް ޕީޕީއެމްގެ ޓިކެޓް ނުލިބުމުން، ފަހުން ޕީޕީއެމާ ފެއަށް ޖެހިވަޑައިގެންނެވި އެވެ.
މި ސަރުކާރު އައި ފަހުން، މޫސާ މަނިކު ބެލެވިފައި ވަނީ ރައީސް ސޯލިހްއާ އަރިސް ބޭފުޅެއްގެ ގޮތުގަ އެވެ. ގިނަ އަދަދެއްގެ ހަފްލާތަކާއި ރަސްމިއްޔާތުތަކުގައި ރައީސްއާ އެކު މޫސާ މަނިކު ބައިވެރިވެވަޑައިގަންވަ އެވެ.
ފާހަގަކޮށްލެވޭ ކަމެއްް - ރައީސް ސޯލިހްގެ ހާޒިރުގައި މޫސާ މަނިކު މިއަދު އެމްޑީޕީއާ ގުޅިވަޑައިގެންވިއިރު، ރައީސްގެ ގާތް ރަހުމަތްތެރިއެއްގެ ގޮތުގައި މީގެ ކުރިން ބެލެވުނު ރައްޔިތުންގެ މަޖިލީހުގެ ރައީސް ނަޝީދާއި ރައީސް ސޯލިހުގެ ގުޅުން ވަނީ ވަރަށް ބޮޑަށް ގޯސްވެފަ އެވެ. އަދި އެމްޑީޕީ ވަނީ ދެ ފެކްޝަނަކަށް ބައިވެފަ އެވެ.
އެމްޑީޕީގެ ޗެޓް ގްރޫޕެއްގައި ނަޝީދު މިއަދު ވެސް ވަނީ، އަންނަ އަހަރު ރިޔާސީ އިންތިހާބުގައި ވާދަކުރުމަށް އެމްޑީޕީން ކަނޑައަޅާ ބޭފުޅަކު ހޮވުމަށް ބާއްވާ ރިޔާސީ ޕްރައިމަރީގައި ރައީސް ސޯލިހަށް ތާއީދު ނުކުރައްވާނެ ކަމަށް ވިދާޅުވެފަ އެވެ. ރައީސް ސޯލިހާއި ނަޝީދު ވެސް ވަނީ ޕްރައިމަރީގައި ވާދަ ކުރެއްވުމުގެ ޝައުގުވެރިކަން ފާޅުކުރައްވައިފަ އެވެ.
ކޮމެންޓް (2)
މަމީހާ
ޜެކެފުތު