ނަދީމް މަރާލި މައްސަލަ މަފާޒުގެ މައްޗަށް ސާބިތެއް ނުވި

ޓާމިނަލް ކެފޭ ތެރޭގައި ހުއްޓާ ތޫނު އެއްޗަކުން ބޮޮލަށް ހަމަލާދީ މަރާލި ނަދީމް އަބްދުއްރަހީމްގެ މަރުގެ މައްސަލައިގައި ގަސްތުގައި މީހަކު މެރުމުގެ ދައުވާ އުފުލި މުހައްމަދު މަފާޒުގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން މިއަދު ހުކުމްކޮށްފި އެވެ.

މައްސަލައިގެ ފެށުން - ޖުލައި 2017ގައި ނަދީމް މަރާލީ، ސައިކަލުތަކެއްގައި އައި ބައެއްގެ ތެރެއިން މޫނު ނިވާކޮށްގެން ތިބި ދެ މީހަކު ޓާމިނަލް ކެފޭ ތެރެއަށް ވަދެ، އޭނާގެ ބޮލަށް ވަޅިން ހަމަލާ ދީގެންނެވެ. އެ މައްސަލައިގައި ދައުލަތުން  ދައުވާކުރި މީހުންނަކީ:

މަފާޒަށް ތޫނު އެއްޗެއް ބޭނުންކޮށްގެން މީހަކު މެރުމުގެ ދައުވާ ކުރިއިރު، ދެން ތިބި މީހުންގެ މައްޗަށް ކުރީ ގަސްތުގައި މީހަކު މެރުމުގައި ބައިވެރިވުމުގެ ދައުވާ އެވެ. 

ތަފްސީލް - ނަދީމް މަރާލި މައްސަލައިގައި އޭނާގެ ބޮލަށް ވަޅިން ހަމަލާދިން ކަމަށް ފުލުހުން ތުހުމަތު ކުރަނީ މަފާޒަށެވެ. މިކަމަށް އޭނާ ވަނީ އިންކާރުކޮށްފަ އެވެ. އަޑުއެހުންތައް ނިންމާލިތާ އަށް މަސް ފަހުން ހުކުމް އިއްވަން މިއަދު ބޭއްވި ޝަރީއަތުގެ މަޖިލީހުގައި، މައްސަލަ ބައްލަވާ ގާޒީ އަހުމަދު ފާއިޒުު ރަޝާދު ފަހަގަކުރެއްވި ގޮތުގައި:

ނަދީމްއަށް ހަމަލާ ދިން ތަނުން މަފާޒުގެ މޫނު ފެނުނު ކަމަށް ބުނީ ހެކިބަސް އަނބުރާ ގެންދިޔަ ދެ ސިއްރު ހެކިވެރިންނެވެ. މަފާޒުގެ މޫނު ފެނުނު ކަމަށް އިތުރު ހެއްކަކު ހެކިބަސް ދީފައެއް ނުވެ އެވެ.  އޭގެ އިތުރުން، މި މައްސަލައިގައި ހެކިބަސް ދޭން ތިބި ސިއްރު ހަތަރު ހެއްކަކު ވަނީ ހެކިބަސް ދޭން ބޭނުން ނުވާ ކަމަށް ކޯޓަށް އަންގާފަ އެވެ.

މި ހުރިހާ ކަމަކީ ވެސް ބިރުދައްކައި ނުފޫޒު ފޯރުވައިގެން ކުރި ކަންކަން ކަމަށް ބުނެ ދައުލަތުގެ ވަކީލުން ވަނީ އެ މީހުން ތަހުގީގަށް ދީފައިވާ ބަޔާނަށް ރިއާޔަތްކޮށް ހުކުމް ކުރައްވަން ގާޒީ އަރިހުން އެދިވަޑައިގެންފަ އެވެ.

ނަމަވެސް، ދައުލަތުން ބުނާ ބުނުމެއްގެ މައްޗަށް ނުފޫޒު ފޯރުވި ކަމަށް ކަނޑަނޭޅެނެކަން ގާޒީ ފާއިޒު ފާހަގަކުރެއްވި އެވެ. އޭނާ ވިދާޅުވީ މި މައްސަލައިގައި ފުލުހުންނާއި ޕީޖީ އޮފީހުން ބުނާ ވާހަކަތައް ސާބިތުކޮށްދޭން އެކަށީގެންވާ މަސައްކަތެއް ކޮށްފައި ނުވާ ކަމަށެވެ.

ހެކިންގެ ހެކި ބަހުގައި ހުރި ފުށުއެރުންތަކުގެ އިތުރަށް، ނަދީމަށް ހަމަލާދިން ވަޅި އާއި ހަމަލާދިން ވަގުތު ބޭނުންކުރި މާސްކުން މަފާޒުގެ ޑީއެންއޭ ވެސް ފެނިފައެއް ނުވެ އެވެ.