އަބްދުﷲ ރަޝީދުގެ ޖަނާޒާ ބާއްވައިފި

ފުލުހުންގެ ބެލުމުގެ ދަށުގައި ހުއްޓާ މިދިޔަ މަހުގެ 25 ވަަނަ ދުވަހު މަރުވި އަބްދުﷲ ރަޝީދުގެ ޕޯސްޓްމޯޓަމްއަށް ފަހު އޭނާގެ ހަށިގަނޑު ރާއްޖެ ގެނެސް، މިރޭ ވަޅުލައިފި އެވެ.

ވީ ކިހިނެއް؟ - އަބްދުﷲ ރަޝީދު 42، ސްވެން/ގދ. ހޯނޑެއްދޫ މަރުވެފައިވަނީ ފުލުހުންގެ އިހުމާލުންތޯ ބެލުމަށް ނޭޝަނަލް އިންޓަގްރިޓީ ކޮމިޝަން (އެންއައިސީ) އާއި ފުލުހުން ގުޅިގެން ފެށި ތަހުގީގުގެ ބޭނުމަށް ޕޯސްޓްމޯޓަމް ހެދުމަށް އޭނާގެ ހަށިގަނޑު އިންޑިއާއަށް ފޮނުވީ މިދިޔަ ހޯމަ ދުވަހު އެވެ. އެގޮތުން:

ތަފްސީލު - އަބްދުﷲ ރަޝީދުގެ ކަށުނަމާދު އޮތީ މިރޭގެ މަގުރިބު ނަމާދަށް ފަހު އާސަހަރާ މިސްކިތުގަ އެވެ. އޭނާގެ ކަށުނަމާދާއި ޖަނާޒާގައި އާއިލާ އާއި ހެޔޮއެދޭ ފަރާތްތަކުން ބައިވެރިވި އެވެ.

މައްސަލައިގެ ފެށުން - މިދިޔަ މަހު ފަހުކޮޅު، ފުލުހުންގެ ޑްރަގު އެންފޯސްމަންޓް ޑިޕާޓްމަންޓް (ޑީއީޑީ)ން ގދ. އަތޮޅުގައި ހިންގި ޑްރަގުގެ ބޮޑު އޮޕަރޭޝަނެއްގައި އަބްދުﷲ ރަޝީދު ހިމެނޭ ގޮތަށް ތިން މީހަކު  ގދ. ހޯނޑެއްދޫން ހައްޔަރުކުރި އެވެ. އެ މީހުން ގޮވައިގެން އެ ރަށުން ފުރައިގެން އެހެން ތަނަކަށް ގެންދަން އުޅެނިކޮށް، އަބްދުﷲ މަރުވީ އެ ރަށު ބަނދަރުގައި ލޯންޗު އޮއްވައި ލޯންޗުމަތީގައި ކަމަށްވެ އެވެ. އެގޮތުން:

އެނގުން މުހިންމު - ފުލުހުން ހިންގި ޑްރަަގު އޮޕަރޭޝަންގައި ހޯނޑެއްދޫ ވަލު ތެރެއިންނާއި އެ ރަށާ ކައިރި ފަޅުރަށެއްގައި ވަޅުލާފައި ހުއްޓާ 82 ކިލޯގެ މަސްތުވާތަކެތި ވަނީ ހޯދާފަ އެެވެ. އޭގެ ތެރޭ ހިމެނެނީ ހެރޮއިން އަދި މެތު އެވެ.