ވ. އާރަށުގެ މައްސަލައިގައި މިއަދު ޑެޕިއުޓީ މޭޔަރު އަހްމަދު ނަރީޝް ހެކިބަސް ދެއްވަނީ
1 މިލިއަން ޑޮލަރަށްވާ ރުފިޔާ ގުނައި ޔޫސުފް ނައީމްއާ ހަވާލުކުރިން: ނަރީޝް
ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ އަތުން ކުރީގެ ރައީސް އަބްދުﷲ ޔާމީން 1 މިލިއަން ޑޮލަރު ބައްލަވައިގެންފައިވާ ކަމަށާއި، އެއަށް ވާ ދިވެހި ރުފިޔާ ގ. ދޫވެހީގައި އަތުން ގުނައި ދެ ދަބަހަކަށް އަޅައިގެން ގެންގޮސް ޔޫސުފް ނައީމްއާ ހަވާލުކުރި ކަމަށް މާލޭގެ ޑެޕިއުޓީ މޭޔަރު އަހްމަދު ނަރީޝް މިއަދު ކްރިމިނަލް ކޯޓުގައި ހެކިބަސް ދެއްވައިފި އެވެ.
ވީ ކިހިނެއް؟ - ދައުލަތުން ބުނަނީ އެމްއެމްޕީއާރްސީ މެދުވެރިކޮށް ވ. އާރަށް ދޫކުރުމަށް ޔޫސުފް ނައީމްގެ އަތުން 1 މިިލިއަން ޑޮލަރުގެ ރިޝްވަތު ޔާމީން ނަންގަވައި އެ ފައިސާ، ރައީސް ކަމުގައި ހުންނަވައިގެން، އެ މަނިކުފާނު ލޯންޑާ ކުރެއްވި ކަމަށެވެ. އެ މައްސަލައިގައި ދައުލަތުން އުފުލާފައި ވަނީ:
-
ޔާމީންގެ މައްޗަށް ރިޝްވަތު ގަބޫލުކުރުމުގެ ދައުވާ އާއި މަނީ ލޯންޑަރިންގެ ދައުވާ
-
ޔޫސުފް ނައީމްގެ މައްޗަށް ރިޝްވަތު ދިނުމުގެ ދައުވާ
ތަފްސީލް - އެ މައްސަލައިގައި މިއަދު ކޯޓުގައި ޔާމީންގެ ފަރާތުން ހެކި ބަސް ދެއްވަމުން ނަރީޝް ވިދާޅުވީ، ޔާމީނަކީ އޭނާގެ ވަރަށް ގާތް ބޭފުޅެއް ކަމަށާއި ދެ ބޭފުޅުން އެކަކު އަނެކަކާ "ޕާސަނަލް" ކަންކަން ވެސް ހިއްސާކުރައްވާ ކަމަށެވެ.
ނަރީޝް ވިދާޅުވީ އެއީ 2013 ވަނަ އަހަރުގެ ރިޔާސީ ކެމްޕޭނުގެ ތެރެއިން ދިމާވެ، އުފެދުނު ގާތް ކަމެއް ކަމަށާއި، ޔާމީން އޭނާއަށް މުހިންމު ކަންކަމުގައި އިތުބާރު ކުރައްވާ ކަމަށެވެ. އަދި ޔޫސުފް ނައީމްއަށް ފައިސާތަކެއް ހަވާލުކުރަން ވެސް ޔާމީން އެދިވަޑައިގަތީ އެ ގާތްކަމުގައި، އެ އިތުބާރުގެ މަތީގައި ކަމަށް ނަރީޝް ވިދާޅުވި އެވެ.
ބުނީ ކީކޭ؟ - ނަރީޝް ވިދާޅުވީ ސެޕްޓެމްބަރު 2015ގައި ޔާމީން ފޯނުން ގުޅުއްވައި "ވަރަށް ބޮޑު ކަމަކު" ދޫވެއްސަށް ވަޑައިގަތުމަށް އެދިވަޑައިގެން ކަމަށެވެ.
"ވިދާޅުވީ ޔޫސުފް ނައީމް އަތުން ޑޮލަރުތަކެއް ބައްލަވައިގެންފައޭ ވަނީ. އެއަށްވާ ދިވެހި ފައިސާ އެބަ ޖެހެޔޭ ޔޫސުފް ނާއީމްއާ ހަވާލުކުރަން. މިކަން އެބަޖެހެޔޭ ކޮށްދެއްވަން،" ނަރީޝް ވިދާޅުވި އެވެ.
ނަރީޝް ވިދާޅުވީ ޔޫސުފް ނައީމްގެ އަތުން ޔާމީން ބައްލަވައިގަތީ 1 މިލިއަން ޑޮލަރު ކަމަށާއި، އެއަށްވާ 15 މިލިއަން ދިވެހި ރުފިޔާ ޔޫސުފް ނައީމްއާ ހަވާލުކޮށްދެއްވަން އެ ދުވަހު އެދިވަޑައިގެން ކަމަށެވެ.
ނަރީޝް ވިދާޅުވީ ޑޮލަރު ބައްލަވައިގަތުމުގެ ލިޔުމެއް ވެސް ޔާމީންގެ އަތްޕުޅުގައި އޮތް ކަމަށާއި، އޭގައި އޮތީ 1 މިލިއަން ޑޮލަރު 15.42ރ.ގެ މަގުން ބައްލަވައިގެން ވާހަކަ ކަމަށެވެ.
ދައުލަތުން ކުރި ސުވާލުތަކަށް ޖަވާބުދެއްވަމުން ނަރީޝް ވިދާޅުވީ:
-
އެ ފައިސާ ހުރީ ދެ ދަބަހުގައި
-
ފައިސާތައް ހުރީ 500ރ.ގެ ނޫޓުން
-
ޔާމީންގެ ކުރިފުޅުމަތީގައި ދޫވެހީގައި އެ ފައިސާ ގުނީ އޭނާ އާއި އަދި އިތުރު މީހެއްގެ އަތުން؛ ފައިސާތައް ގުނަން ހޭދަވީ ކިހާ ވަގުތެއް ކަމެއް އޭނާއަށް ވިދާޅުވެނުދެއްވުނު
-
އެ ފައިސާތައް ގުނުމަށް ފަހު ދެ ދަބަހަކަށް އަޅައިގެން ކާރެއްގައި ގެންގޮސް ޔޫސުފް ނައީމްގެ ގޭގައި އޭނާއާ ފައިސާ ހަވާލުކުރި
-
ޔޫސުފް ނައީމް ވެސް ފައިސާ ގުނުމަށް ފަހު، އެ މުއާމަލާތުގެ ލިޔުމުގައި ސޮއިކުރެއްވި
އެނގުން މުހިންމު - މިއަދު ނެގީ ހަމައެކަނި ނަރީޝްގެ ހެކި ބަހެވެ. މިއަދުގެ އަޑުއެހުން ނިންމަވާލައްވަމުން އިސް ގާޒީ އަހްމަދު ޝަކީލް ވަނީ މާދަމާ ތިން ހެކިވެރިއެއްގެ ހެކި ބަސް ނަގާނެ ކަމަށެވެ. މާދަމާއަށް ފަހު ދެން އަޑުއެހުމެއް އޮންނާނީ މި މަހުގެ މަހުގެ 25 އާއި 29ގަ އެވެ.