އެމްއާރްއެމުން ވަކި ޕާޓީއަކާ ދެކޮޅަށް މަސައްކަތެއް ނުކުރާނެ: މައުމޫން

މޯލްޑިވްސް ރިފޯމް މޫވްމަންޓް (އެމްއާރްއެމް) އަކީ އެއްވެސް ޕާޓީއަކާ ދެކޮޅަށް މަސައްކަތް ކުރާނެ ޕާޓީއެއް ނޫން ކަމަށާއި، އެ ޕާޓީން އަބަދުވެސް މަސައްކަތް ކުރާނީ ގައުމުގެ ހަމަޖެހުމާއި ކުރިއެރުމަށް ކަމަށް، ޕާޓީގެ ޒައީމް، މައުމޫން އަބްދުލްގައްޔޫމް މިއަދު ވިދާޅުވެއްޖެ އެވެ.

ވީ ކިހިނެއް؟ - އެމްއާރްއެމްގެ ފުރަތަމަ ގައުމީ ކޮންވެންޝަން މިއަދު ވަނީ ބާއްވައިފަ އެވެ. އެ ޕާޓީގެ ޒައީމުކަމަށް އިތުރު ބޭފުޅަކު ކުރިމަތިނުލެއްވުމުން، އެ މަގާމަށް ކުރީގެ ރައީސް މައުމޫން ހޮވިވަޑައިގަތީ ވޯޓަކަށް ނުގޮހެވެ.

ތަފްސީލް - މިއަދު އޮންލައިންކޮށް ކުރިއަށް ދިޔަ ކޮންވެންޝަންގައި ވާހަކަދައްކަވަމުން މައުމޫން ވިދާޅުވީ މިހާރު އެމްއާރްއެމްއިން ފަށާފައި ވަނީ އާ މަރުހަލާއެއް ކަމަށެވެ. އަދި އެ ޕާޓީން ކުރާ މަސައްކަތުގެ ސަބަބުން ރާއްޖޭގެ ދިމިގްރާތީ ނިޒާމު އިތުރަށް ހަރުދަނާވެ، ރައްޔިތުންގެ ހައްގުތައް ރައްކާތެރިކުރުމުގައި އިތުރު ކުރިއެރުންތަކެއް ލިބި، ގައުމުގައި އެކުވެރިކަމާއި އެއްބައިވަންތަކަން އިތުރަށް ބަދަހިވެ ދިވެހި ގައުމަށް ބާއްޖަވެރި ދުވަސްތަކެއް ފެނިގެންދާނެ ކަމަށް އުންމީދުކުރައްވާ ކަމަށް ވިދާޅުވި އެވެ.

މައުމޫންގެ ބަސް - އެމްއާރްއެމް އަކީ ސަރުކާރު ކޯލިޝަންގައި ހިމެނޭ ޕާޓީއެއްކަން ފާހަގަކުރައްވަމުން އެ މަނިކުފާނު ވިދާޅުވީ، އެ ޕާޓީގެ އަމާޒަކަށް ވާނީ އަބަދުވެސް ހުރިހާ ޕާޓީތަކާ ގުޅިގެން މަސައްކަތް ކުރުން ކަމަށެވެ.

"އެމްއާރްއެމް އަކީ ވަކި ބަޔަކާ ނުވަތަ ވަކި ޕާޓީއަކާ ދެކޮޅަށް މަސައްކަތްކުރާނެ ޕާޓީއެއް ނޫން. އަޅުގަނޑުމެން އަބަދުވެސް އިސްކަން ދޭނީ ސަރުކާރާއި ރައްޔިތުންނާ ގުޅިގެން އަދި އެހެން ޕާޓީތަކާ ވެސް ގުޅިގެން، ގައުމުގެ މަސްލަހަތަށްޓަކައި މަސައްކަތް ކުރުމަށް،" މައުމޫން ވިދާޅުވި އެވެ.

މައުމޫން ވިދާޅުވީ އެމްއާރްއެމް އިން މަސައްކަތް ކުރާނީ ސަރުކާރު ކޯލިޝަން ވަރުގަދަކޮށް ގައުމުގެ ތަރައްގީއަށް ކަމަށެވެ. އަދި ރައީސް އިބްރާހިމް މުހައްމަދު ސޯލިހަށާއި ސަރުކާރަށް އެމްއާރްއެމްގެ ތާއީދު އޮތް ކަމަށް ވެސް ވިދާޅުވި އެވެ.

މައުމޫން ވިދާޅުވި ގޮތުގައި އެމްއާރްއެމް އިން ބޭނުންވަނީ ރާއްޖޭގެ އެންމެހާ މުއައްސަސާތަކާއި، ޖަމާއަތްތަކާއި ފަރުދުން ވެސް ތެދުވެރިކަމާއި ނަޒާހަތްތެރިކަމާ އެކު ގައުމުގެ ތަރައްގީއަށް މަސައްކަތްކުރަމުން ދިއުމެވެ. އޭގެ ސަބަބުން ރާއްޖެއަކީ ސުލްހަވެރި، އެކުވެރި، ދިމިގްރާތީ ހަމަތައް ގަބޫލުކުރާ، އަދި ނަޒާހަތްތެރިކަމާ އެކު މަސައްކަތްކުރާ ގައުމަކަށް ވެގެންދާނެ ކަމަށް ވެސް ވިދާޅުވި އެވެ.