ނައުޝަމްގެ ފޮޓޯތަކުން އަނެއްކާވެސް ލޯބީގެ ރީތި ވާހަކައެއް

ފޮޓޯ ނަގަން މ. ދިއްގަރަށް ކުރި ދަތުރެއްގައި ފުރަތަމަ ވެސް ފޮޓޯގްރާފަރު ނައުޝަމް ވަހީދުގެ މަގްސަދަކަށްވީ މި ދެމަފިރިން ހޯދުމެވެ. އެއީ ރަށަށް އެރުމާ އެކު، މި ދެމަފިރިންގެ ދުވަސްވީ ލޯބީގެ ވާހަކަ ރަށުގެ މީހުންގެ ފަރާތުން އިވިފައި އޮތުމުންނެވެ. އުމުރުން 80ގެ އަހަރުތަކުގައި އުޅޭ އައިމިނަތު މުހައްމަދާއި ސުލައިމާން މުހައްމަދު ދިރިއުޅޭ ގެއަށް ގޮސް، އެ މީހުންނާ ބައްދަލުވުމާ އެކު އެ ލޯބީގެ ތެދުކަން އޭނާއަށް އިހުސާސްވި އެވެ.

އައިމިނަތާއި ސުލައިމާންގެ ފޮޓޯ ނަގައި ސޯޝަލް މީޑިއާއަށް ނައުޝަމް ދޫކޮށްލީ، ތެދުވެރި ލޯބީގައި ދެމަފިރިންގެ ހަޔާތް ވޭތުކުރެވިދާނެކަން މީހުންނަށް ދައްކައިދިނުމަށެވެ. އޭނާ ބޭނުންވީ އެ ލޯބިން މިސާލު ޖަހާށެވެ.

"އާއްމުކޮށް މަގުމައްޗަށް ހިނގާލަން ނުކުމެ އުޅޭއިރު ވެސް އެ ދެމަފިރިން އުޅޭނީ އަތް ގުޅުވާލައިގެން ކަމަށް ރަށުގެ މީހުން ބުނަނީ. އެހާ ދުވަސްވީ ބަޔަކު، އެހާ ލޯބިން އުޅޭތަން ފެނުނީމާ އެތަން ދައްކާލަން ބޭނުންވީ،" ނައުޝަމް ކިޔައިދިނެވެ.

އޭނާ ނެގި މި ދެމަފިރިންގެ ފޮޓޯތައް ރީއްޗެވެ. ދެމަފިރިންގެ ދެމެދުގައި އޮތް ދުވަސްވީ ލޯތްބާއި ކުލުނު އެ ފޮޓޯތަކުން ފެނެ އެވެ. އެކަމަކު އެއަށް ވުރެ ބޮޑަށް، ފޮޓޯގްރާފަރުގެ ލޮލުގައި އަޅައިގަތީ އެ ދެމެދުގައި އޮތް އިހްތިރާމެވެ. އެހާ ގިނަ ދުވަހު ކައިވެނީގެ ގުޅުން ދެމެހެއްޓުމަށް އެ މީހުން ވި ގުރުބާނީ އެވެ.

ނައުޝަމް ކިޔައިދިން ގޮތުގައި 81 އަހަރުގެ އައިމިނަތާއި 85 އަހަރުގެ ސުލައިމާން ކައިވެނި ކުރީ 1967 އަހަރު އެވެ. ކައިވެންޏަށް 58 އަހަރު ވީ އެވެ. ހަ ދަރިން ލިބި، މާމަކާފަ ވެސް ކިޔައިފި އެވެ. އެކަމަކު ދިރިއުޅުމުގެ އެންމެ ބޮޑު އުސްއައްޔެއްގެ ގޮތުގައި ފާހަގަކުރީ، މީހަކަށް ބަރޯސާ ނުވެ އަމިއްލަ މަސައްކަތުން  ހޯދި ފައިސާއިން ހައްޖުގެ އަޅުކަން ދެމަފިރިންނަށް އަދާކުރެވުމެވެ.

ޒުވާން އުމުރުގައި މަހަށް ގޮސް ސުލައިމާން އެއްކުރި ފައިސާއިން ދެ މީހުން ހައްޖަށް ގޮސް، ގެފުޅުގެ ކުރިމަތީ ހުއްޓި ތިބީ އެކުއެކީގަ އެވެ. މިހާރު އުމުރުން 80 އަހަރުން މައްޗަށް ގޮސްފައިވާ އިރު އަދިވެސް ދެމަފިރިން ތިބީ އަތުގުޅާލައިގެންނެވެ. ވާލޯބި ހާމަކުރާކަށް، އެ އުމުރުގައި ވެސް އެ މީހުން ފަހަކަށް ނުޖެހެ އެވެ. ނައުޝަމް ގާތު އެ ދެމަފިރިން ބުނީ، މިހާ ދުވަސްވީ އިރު ވެސް އެކަކު އަނެކަކު ދެކެ އިންތިހާއަށް ލޯބިވާ ކަމަށެވެ. ކިޔައިދިނީ، އެކެއްގެ ހަޔާތް އަނެކަކު އުޖާލާކޮށްދިން ގޮތެވެ. އެކުއެކީގައި މިހާ ދުވަސްވީއިރު ތިބެވުމަކީ ކިހާ ބޮޑު ނިއުމަތެއް ކަމެވެ. 

"އެ މީހުން ފެނުނީމާ ހިތަށްއެރީ، މި އުމުރުގައި ވެސް އެހާ ފުން ލޯތްބެއް ވާން ހާދަ ގިނަ ކަންކަމެއް އެ މީހުން މާފުކޮށްފައި ހުންނާނެއޭ. ތެދުވެރި ލޯތްބެއް ވުމަށް މާފުކުރުމާއި ކެތްތެރިވުމަކީ ވެސް ކިހާ މުހިއްމު ކަމެއްކަން،" ނައުޝަމް ބުންޏެވެ.

"އެ ދެމަފިރިންނަކީ އޭގެ ހެއްކެއް. ކޮންމެ ކޮންމެ މީހަކަށް ނުބުނެވޭނެ، އެ މީހުންގެ ޅަ އުމުރުން ފެށިގެން 80 އަހަރު ވާންދެން އެކަކު އަނެކަކު ދެކެ އެހާ ލޯބިވެއެކޭއެއް."

ޒުވާން ފޮޓޯގްރާފަރު ދައްކާލި ދުވަސްވީ މި ލޯބި، ސޯޝަލް މީޑިއާގައި މިހާރު ވަނީ ވައިރަލްވެފަ އެވެ. އެކަމަކު މިއީ އޭނާ މި ފަދަ ފޮޓޯގަނޑެއް ދޫކޮށްލި ފުރަތަމަ ފަހަރެއް ނޫނެވެ. މީގެ ތިން އަހަރު ކުރިން އޭނާ ނެގި، އުމުރުން ދުވަސްވީ ދެމަފިރިއެއްގެ މި ފަދަ ފޮޓޯތަކަކުން ވެސް ގިނަ ބަޔަކު ރޮއްވާލި އެވެ.

އެ ދުވަހު އޭނާ ދައްކާލީ ހަނދާންތައް ގެއްލިފައިވާ 95 އަހަރުގެ ފިރިއަކަށް، އޭނާގެ ހަމަ އެހާ ދުވަސްވީ އަނބިމީހާ ހޭހަންކޮށްދޭ ތަނެވެ. އަތުން ލަވާ ކާންދޭ ތަނާއި އޯގާތެރިކަމާ އެކު ފިރުމާލާ ތަނެވެ. އެ ދުވަހު ވެސް އޭނާ ބުނެދޭން ބޭނުންވީ، ކައިވެނީގެ ކުރީކޮޅު ވީ ލޯބި ހަޔާތުގެ އެންމެ ފަހު ދުވަސްތަކަކާ ހަމައަށް ގެންދެވިދާނެ ކަމެވެ.