ފަންނުވެރި އެކުވެރިން: ޑައިރެކްޓަރު އަލީ އައްޒާމް
ފަންނުވެރި އެކުވެރިން: ފިލްމު 'ދޭދަރު ރުއިން'ގެ ޑައިރެކްޓަރު އައްޒާމް
ފަންނުވެރި އެކުވެރިންގެ މިފަހަރުގެ އެޕިސޯޑުގެ މެހުމާނަކީ ޑައިރެކްޓަރު އަލީ އައްޒާމް އެވެ. އައިފިލްމްސް އާއި ކަޒްމިކް އިންޓަނޭޝަނަލް ގުޅިގެން މި މަހު 20ގައި ނެރޭ ފިލްމް 'ދޭދަރު ރުއިން' އަކީ އައްޒާމް ޑައިރެކްޓް ކުރާ ފުރަތަމަ ފީޗާ ފިލްމެވެ.
މިއީ އައްޒާމް މި ދާއިރާއަށް ރަސްމީކޮށް ފީޗާ ފިލްމަކާ އެކު ނުކުންނަ ފުރަތަމަ ފަހަރު ކަމަށް ވިއަސް އޭނާއަކީ ފިލްމް އަދި ތިއޭޓާ ކިޔަވައިގެން ހުރި ކުޅަދާނަ ފަންނުވެރިއެކެވެ. ރާއްޖޭގެ ފިލްމީ ދާއިރާއަށް އައްޒާމް މި ވަންނަނީ އޭނާ ލިޔެފައިވާ ވާހަކައެއް އުފައްދަން އައިފިލްމްސްއިން ދިން ފުރުސަތަކުންނެވެ.
'ދޭދަރު ރުއިން' ފިލްމުން ކުޅަދާނަ ދިވެހި އެކްޓަރުންގެ އިތުރުން ނެޕާލްގެ އެކްޓްރެސްއެއްގެ ފުރިހަމަ އެކްޓިން ވެސް ފެނިގެންދާނެކަން އައްޒާމް ފާހަގަކުރި އެވެ. އޭނާ ބުނިގޮތުގައި ތަފާތު އެކި ހާދިސާތައް މުޅިން އެހެން ސްޓައިލްއަކަށް ފެނިގެންދާނެ މި ފިލްމަކީ 'ކްރައިމް ޑްރާމާ' އެކެވެ.
ފުރަތަމަ ފީޗާ ފިލްމާ އެކު އައްޒާމް ބޭނުންވަނީ އޭނާގެ އަމިއްލަ ސްޓައިލްއެއްގެ އުފެއްދުންތަކަކާއި ވާހަކަތަކެއް ބެލުންތެރިންނަށް ގެނެސްދޭށެވެ.
ހުސްވި އޮކްޓޯބަރު މަހު ރެކޯޑްކުރި މި އެޕިސޯޑުގައި އައްޒާމްގެ ޑިރެކްޓޯރިއަލް ތަޖުރިބާ އާއި އޭނާ މީގެ ކުރިން ކުރަމުން އައި މަސައްކަތުގެ ވާހަކަ ވެސް ކިޔައިދިނެވެ.
ކޮމެންޓް