ކުޑަފަރީގައި ދޮށީ އުމުރުގެ މީހުންނަށް ހާއްސަ ކްލަބެއް

އުމުރުން ދުވަސްވީ މީހުންނަށް ހާއްސަ ކްލަބެއް، ނ. ކުޑަފަރީގެ ކައުންސިލްގެ އިސްނެގުމާ އެކު، އެ ރަށުގައި މިދިޔަ ހޮނިހިރުދުވަހު ހުޅުވައިފި އެވެ.

ވީ ކިހިނެއް؟ - ކުޑަފަރީގެ އުތުރު ފަރާތުގައި އޮންނަ ބީޗްގައި މި ކްލަބް ހުޅުވުމުގެ މަގުސަދަކީ ރަށުގައި ތިބި އުމުރުން ދުވަސްވީ މީހުންނަށް އެމީހުންގެ ދިރިއުޅުމުގެ ފެންވަރު ރަނގަޅުކުރަން ހަރަކާތްތެރިވެ އުޅުމަށާއި، އިޖްތިމާއި ހަރަކާތްތަކުގައި ބައިވެރިވެ އުޅުމާއި މުޖުތަމައުގެ ބައިވެރިވުން ބޮޑުކުރުމެވެ.

ތަފްސީލް - ކުޑަފަރީ ކައުންސިލުން ބުނީ ކްލަބްގައި މިހާރު ކުރިއަށް ގެންދަން ހަމަޖެހިފައިވާ ހަރަކާތްތަކުގެ ތެރޭގައި ހަފުތާއަކު ދެ ފަހަރު ފެތުމުގެ ސެޝަންތަކާއި އިޖްތިމާއީ ގުޅުން ބަދަހިކުރަން ކޮންމެ މަހަކު ސައި ޕާޓީއެއް ބޭއްވުން ހިމެނޭ ކަމަށެވެ.

ހަރަކާތްތެރިވެ ނޫޅެވޭ ވަރުގެ ދުވަސްވީ މީހުން ކްލަބްގެ އެފަދަ ކަންކަމަށް ގެންނަން ވެހިކަލް ވެސް ފޮނުވާ ގޮތަށް ވަނީ ހަމަޖައްސައިފަ އެވެ. އޭގެ އިތުރުން ވެލިމޮޑުން ފަދަ، ރާއްޖޭގައި ކުރިން ފަރުވާއެއްގެ ގޮތުގައި ކުރަމުން އައި ބައިތައް ވެސް ހިމެނޭނެ ކަމަށް، ކައުންސިލުން ބުންޏެވެ. 

މި ކްލަބް ހުޅުވުން ފާހަގަކުރަން ބޭއްވި އިވެންޓްގައި ރަށުގެ ރައްޔިތުންނާއި ފުލުހުންނާއި ސަރުކާރުގެ ބައެއް އިދާރާތަކުގެ އިސް ވެރިންގެ އިތުރުން ކުޑަފަރީ ސްކޫލުން ވެސް ބައިވެރިވި އެވެ.

ކައުންސިލުން ބުނީ މި ކްލަބް އުފެއްދުމުގެ މަގުސަދުތައް ފުރިހަމައަށް ހާސިލްކުރަން މި އިދާރާތަކުގެ އެހީތެރިކަމާއި އެއްބާރުލުން ބޭނުންވާނެ ކަމަށެވެ.

ކްލަބް ހުޅުވުމުގައި ބައިވެރިވި ދޮށީ އުމުރުގެ މީހުން ވަނީ އެތަނުގައި އުފާވެރި ވަގުތުކޮޅެއް ހޭދަކޮށްފަ އެވެ. ކަސްރަތު ކުރުމާއި މޫދަށް އެރުން ފަދަ ކަންކަން ކުރިއަށް ގެންދިޔަ އެވެ.

ކައުންސިލުން ބުނީ މި ކްލަބްގެ ސަބަބުން އުމުރުން ދޮށީ މީހުންނަށް ދުޅަހެޔޮ ސިއްހަތެއްގައި ތިބުމަށާއި އިޖްތިމާއީ ގުޅުން ބަދަހިކުރަން ފުރުސަތު ފަހިވާނެ ކަމަށެވެ.