ކޭ-ޕޮޕް ގްރޫޕް ބްލެކްޕިންކްގެ ޖިސޫ އަކީ މަޝްހޫރު ބްރޭންޑު އެލޯ ޔޯގާގެ އެންމެ ފަހުގެ ބްރޭންޑު އެމްބެސަޑަރު
މަޝްހޫރު ބްރޭންޑު އެލޯ ޔޯގާގެ އެމްބެސަޑަރަކަށް ބްލެކްޕިންކްގެ ޖިސޫ
އެމެރިކާއަށް ނިސްބަތްވާ މަޝްހޫރު އެތުލެޓިކްވެއާ އަދި ޔޯގާވެއާ ބްރޭންޑު އެލޯ ޔޯގާގެ އެންމެ ފަހުގެ ބަހާރު މޫސުމުގެ ކަލެކްޝަނުގެ އެމްބެސަޑަރަކަށް މަގުބޫލު ކޭ-ޕޮޕް ގްރޫޕް ބްލެކްޕިންކުގެ ޖިސޫ ހަމަޖެއްސިކަން ވަނީ މި މަހު އިއުލާނު ކޮށްފަ އެވެ.
ދެކުނު ކޮރެއާގެ ކޭ-ޕޮޕް ގުރޫޕް ބެލްކްޕިންކް އަކީ އިތުރު ތައާރަފެއް ބޭނުންނުވާ މުޅި ދުނިޔެއަށް މަގުބޫލު ބައެކެވެ. އަދި ފެޝަންގެ ދުނިޔޭގައި ވެސް މަގުބޫލުވަމުން އަންނަ ބައެކެވެ. މިފަހަރު އެ ބޭންޑުގެ ހަތަރު މެމްބަރުންގެ ތެރެއިން ލަވަކިއުންތެރިއާ އަދި އެކްޓްރެސް ޖިސޫ މި ފެނުނީ ބޮޑު ބްރޭންޑެއްގެ އެމްބެސަޑަރެއްގެ ގޮތުގަ އެވެ.
އެމެރިކާއަށް ނިސްބަތްވާ ބައިނަލްއަގްވާމީ ސެލެބްރިޓީ ބްރޭންޑު އެލޯ ޔޯގާގެ 2024 ވަނަ އަހަރުގެ ބަހާރު މޫސުމުގެ ކަލެކްޝަނުގައި ޕަފާ ޖެކެޓުން ފެށިގެން ލެގިންސް އަދި ކަސްރަތަށް އެކަށީގެންވާ އެކި ބާވަތްތައް ލަތީފީ ކުލަތަކެއްގައި ވަނީ ދައްކާލައިފަ އެވެ. ގިނަ ބަޔަކު ބުނާ ގޮތުގައި މި ކުލަތަކާއި ސްޓައިލުތައް ބްލެކްޕިންކްގެ ސްޓައިލްއާ ގުޅެ އެވެ.
މިއުޒިކް ސްޓްރީމިން ޕްލެޓްފޯމް ސްޕޮޓިފައިގައި ކޮންމެ މަހަކު 19 މިލިއަން މީހުން އަޑުއަހާ ބްލެކްޕިންކްގެ ލަވަތަކުގެ އިތުރުން އެމީހުންގެ ލަތީފީ އަދި ސްޕޯޓީ ޕާސަނަލް ސްޓައިލް ވެސް މަގުބޫލެވެ. އަދި ޖިސޫ އަކީ މި ކަލެކްޝަން ރަމްޒު ކުރަން އެންމެ އެކަށީގެންވާ ތަރި ކަމަށް ގިނަ ބަޔަކު އެއްބަސްވެ އެވެ.
އެލޯ ޔޯގާއިން ޖިސޫ އެމްބެސަޑަރެއްގެ ގޮތުގައި ބޭނުންކުރުން މިހާރު ވެސް ވަރަށް ފައިދާހުރި ނިންމުމަކަށް ވެއްޖެ އެވެ. ޖިސޫ ކެމްޕޭނު ފޮޓޯތަކަށް ލައިގެން ހުރި 'އެކޮލޭޑް ހުޑީ' މިހާރު ވެސް ވިކި ހުސްވެއްޖެ އެވެ.
އެލޯ ޔޯގާގެ މި ކަލެކްޝަންގެ އިތުރު ސްޓައިލުތަކާއި އެމީހުންގެ މަލްބަރީ ކުލައިގެ ސެޓު މި މަހުގެ 29 ވަނަ ދުވަހުން ފެށިގެން ގަންނަން ލިބޭނެ އެވެ.