ހޫނުގަދަ މި ދުވަސްވަރު ކުދިންގެ ރައްކާތެރިކަމަށް ސަމާލުވޭ

މޫސުމާ ބެހޭ ގައުމީ އިދާރާ (މެޓް) އިން ލަފާކޮށްފައިވާ ގޮތުގައި މި ދުވަސްވަރު ރާއްޖޭގެ ގިނަ ސަރަހައްދުތަކަށް ވިއްސާރަކުރާ މިންވަރު އާންމު ހާލަތަށް ވުރެ ކުޑަވާނެ އެވެ. އަދި މުޅި ރާއްޖެއަށް ބަލާއިރު ފިނިހޫނުމިން އާންމު ހާލަތަށް ވުރެ ކުޑަކޮށް މަތިވާނެ ކަމަށް ވަނީ ލަފާކޮށްފަ އެވެ. 

މާލެ ސަރަހައްދުގެ ފިނިހޫނުމިން އިއްޔެ 31 ޑިގްރީގައި ހުރި އިރު "ފީލްސް ލައިކް" ނުވަތަ އިހްސާސް ކުރެވޭ ފިނިހޫނުމިން ހުރީ 37 ޑިގްރީގަ އެވެ.

ހޫނު ގަދަވުމުގެ ސަބަބުން ނާޒުކު ހާލަތަކަށް ހިނގައިދާނެ އެއް ބަޔަކީ ކުޑަކުދިންނެވެ. ވަރުބަލިކަން އިހުސާސްވެ ހީޓް ސްޓްރޯކް ފަދަ ނުރައްކާތެރި ކަމެއް މެދުވެރިވުން އެކަށީގެންވެ އެވެ.

ރާއްޖޭގެ ހުރިހާ ސްކޫލްތަކަކީ އެއާ ކޮންޑިޝަން ކޮށްފައިވާ ތަންތަނެއް ނޫނެވެ. މޫސުމީ ބަދަލާ ގުޅިގެން އާދަޔާހިލާފަށް ހޫނު ގަދަވަމުންދާ ނަމަ ކްލާސްރޫމްތައް ކުރިއަށް އޮތް ދުވަސްތަކުގައި ހައްތަހާ ހޫނުވުން އެކަށީގެންވެ އެވެ.

ހޫނުގެ ސަބަބުން ކުދިންނަށް ކުރާ އަސަރު ބައެއް ބެލެނިވެރިންނަށް މިހާރު ވެސް ފާހަގަކުރެވެން ފަށައިފި އެވެ.

އެއް ބެލެނިވެރިޔަކު ބުނި ގޮތުގައި ޕްރީސްކޫލްގައި އުޅޭ އޭނާގެ ދަރިފުޅު މި ދުވަސްވަރު ސްކޫލުން ގެއަށް އަންނަ އިރު، ހޫނުވުމާ ގުޅިގެން ގައިގައި ބިހި ނަގާފައިވާކަން އޭނާ އަށް ފާހަގަކުރެވެ އެވެ. އޭނާގެ ޝަކުވާއަކަށްވީ ސްކޫލް ޔުނީފޯމް އެވެ.

"ސްކޫލް ޔުނީފޯމް ފަރުމާކޮށްފައި މި ހުންނަނީ ކުދިންނަށް ގަޔަށް ފަސޭހަވާނެ ގޮތަކަށް ނޫން. ލައިގެން އުޅެން ފަސޭހަވާނެ ގޮތަކަށް ނޫން،" އޭނާ ބުންޏެވެ.

ބައެއް ސްކޫލްތަކުގެ ޔުނީފޯމް ފަރުމާކޮށްފައިވަނީ ވަނީ ރާއްޖެ ފަދަ ހޫނުގަދަ ގައުމުތަކުގައި ލައިގެން އުޅުމަށް އެކަށީގެންވާ ގޮތަކަށް ނޫން ކަމުގައި އޭނާ ބުންޏެވެ. ބައެއް ސްކޫލްތަކުގެ ރަސްމީ ޔުނީފޯމްގައި ފިރިހެން ކުދިން ޓައި އަޅަންޖެހެ އެވެ.

ހީޓް ރޭޝް ނުވަތަ ހޫނަށް ބިހި ނެގުމަށް މެދުވެރިވަނީ، ދާހިއްލުމަށް ފަހު ހަންގަނޑުގެ ދޭތެރޭގައި ދާ ތާށިވުމުންނެވެ. ހަމުގެ ކުލަ އަލި ކުދިންގެ ގައިގައި ރަތްކުލައިގެ ކުދި ބިހިތަކެއް ނަގާކަން ފާހަގަކުރެވެ އެވެ. ހަންގަނޑު އަލި ނޫން ނަމަ، ހަމާ އެއް ކުލައެއްގައިހެން ހުންނަ ބިހިތަކެއް ފެނެ އެވެ.

އާއްމުކޮށް ހޫނަށް ބިހި ނަގަނީ ކުދިންގެ މޫނާއި ކަރުދަށުގަ އެވެ.

މިކަމަށް އޮތް ރައްކާތެރިކަމުގެ ފިޔަވަޅަކީ ކުދިން ވީހާވެސް ތުނި، ގަޔަށް ފަސޭހަ ހެދުން ލެއްވުމެވެ. ދާހިއްލާފައިވާ ނަމަ އަވަހަށް ހެދުން ބަދަލުކުރުވުމެވެ. ގައި ކަހާ އުނދަގޫވެގެން ދަރިފުޅު އުޅޭ ނަމަ ތާފެނާ ފެނުން ފެންވަރުވާށެވެ. އަދި ބިހި ނަގާފައިވާ ތަންތަން ފިނި ފެނުން ބޮނޑިތާންކުރުމުން ދަރިފުޅަށް ލުއި ލިބޭނެ އެވެ.

ކުދިންނަށް ހޫނުގެ ސަބަބުން ދިމާވެދާނެ ހާލަތަކަށް ޓީޗަރުން ތައްޔާރުވެގެން ތިބުން މުހިއްމެވެ. މިގޮތުން މި ދުވަސްވަރުގެ ހޫނުން ރައްކަށްތެރިވުމަށް ކުރެވިދާނެ ބައެއް ކަންކަން ތިރީގައި މިވަނީ އެވެ.

ހޫނުގަދަ ދުވަސްވަރު ބޮޑެތި މީހުންނެކޭ އެއްގޮތަށް ކުޑަކުދިންގެ ގައިން ވެސް ފަސޭހައިން ފެން މަދުވެ އެވެ. ސިއްހީ މާހިރުން މިކަމަށް އޮތް ހައްްލެއް ކަމަށް ބުނަނީ ބޮޑަށް ކަރުހިއްކައިނުގަންނަނީސް ފެން ބުއިމެވެ.

ކަރުހިއްކައި ފެންބޮވައިގަތުމުގެ ކުރިން ފެން ބޯން ކުދިންނަށް ހަނދާން ކޮށްދޭން ޖެހެ އެވެ. 

މިއީ އާއްމު މިންގަނޑު ނަމަވެސް ގިނައިން ދާހިއްލާ ނަމަ، ފެން ބުއިން އިތުރު ކުރަން ޖެހެ އެވެ. ހާއްސަކޮށް ކުޅިވަރު ކުޅުމަށް ފަހު ހަށިގަނޑަށް ބޭނުންވާ މިންވަރަށް ފެން ބުއިން މުހިއްމެވެ. ސިއްހީ މާހިރުން ބުނަނީ ކުޅިވަރު ކުޅޭތާ ދެ ގަޑި އިރު ތެރޭ ހަށިގަނޑަށް ބޭނުންވާ މިންވަރަށް ފެން ބޯންވާނެ ކަމަށެވެ.

އިންސާނެއްގެ ހަށިގަނޑުގެ 50-%70 އަކީ ފެނެވެ. ދާހިއްލައިގެން %2 ފެން ހަށިގަނޑުން މަދުވިޔަސް އެކަމުގެ އަލާމާތްތައް ހަށިގަނޑުން ފެނެ އެވެ.

ޑީހައިޑްރޭޝަންގެ އަލާމާތްތަކުގެ ތެރޭގައި ބޮލުގައިރިއްސުން، ވަރުބަލިވުން، އަކުނިވަޔަށް ދެމުން، ލޭގެ ޕްރެޝަރު ދަށަށް ދިޔުން، ވާނުވާ ނޭނގުން އަދި އެންމެ ބޮޑުވަރުވެގެން ހޭނެތުން ފަދަ ކަންކަން ހިމެނެ އެވެ.

ދެން އޮތް ސުވާލަކީ ހަށިގަނޑަށް ބޭނުންވާ ވަރަށް ވުރެ ގިނައިން ފެން ބޮވިދާނެ ހެއްޔެވެ؟ ތަޖުރިބާކާރުން ބުނަނީ މިއީ ނާދިރު ކަމެއް ކަމުގަ އެވެ. އެހެނަސް، މަދުން ނަމަވެސް މިކަން ދިމާވެ އެވެ.

ހަށިގަނޑަށް ބޭނުންވާ އިލެކްޓްރޮލައިޓްސް ނުލިބި، ފެން އިތުރުވެއްޖެ ނަމަ އިމްބެލެންސެއް އާދެ އެވެ. ސޯޑިއަމް ކަހަލަ އިލެކްޓްރޮލައިޓްސް އަކީ ހަށިގަނޑުގައި ހުންނަ ފެން ރެގިއުލޭޓް ކުރުމަށް ބޭނުންވާ މާއްދާ އެކެވެ. ގިނައިން ދާހިއްލާ ނަމަ ހަށިގަނޑުގެ ސޯޑިއަމް ދަށްވެ އެވެ.

އޯވާހައިޑްރޭޝަންގެ އަލާމާތްތަކުގެ ތެރޭގައި ވާނުވާ ނޭނގުން، ބޮލުގައިރިއްސުން، މޭނުބައިކުރުން، ހޮޑުލެވުން އަދި ފިޓު ޖެހުން ހިމެނެ އެވެ.

އެންމެ ތުއްތު ކުދިންނަށް ވެސް ހޫނުގެ ސަބަބުން އަސަރު ކުރެ އެވެ. އެހެންކަމުން، ކުދިން ގިނަ ވަގުތު އަވީގައި ނުގެންގުޅުމަށް ސަމާލުވާންޖެހެ އެވެ.

ހަ މަހުން ދަށުގެ ތުއްތު ކުދިން ސީދާ އަތްވަށް ނުނެރެވޭތޯ ބަލަންވާނެ އެވެ. ހަ މަހަށް ވުރެ ޅަ ކުދިންނަށް އަމިއްލަ ހަށިގަނޑުގެ ފިނިހޫނުމިން އެންމެ ރަނގަޅަކަށް ކޮންޓްރޯލެއް ނުކުރެވެ އެވެ.

ތުއްތު ކުދިންނަށް ހާއްސަ ސަމާލުކަމެއް ދޭން ޖެހެނީ އެކުދިންނަށް އުނދަގޫވިޔަސް ބުނެދޭން ނޭނގޭތީ އެވެ. މި އުރުމުގެ ކުދިންނަށް މާ ބޮޑަށް ހޫނުވުމުން ފެންނަ ބައެއް އަލާމާތްތަކުގެ ތެރޭގައި:

ދަރިފުޅުގެ ހަންގަނޑު ހޫނުކޮށް ހުރެ ދާނުހިއްލާ، ނޭވާ އަވަސްވެ، ހިތުގެ ހިނގުން އަވަސް ނަމަ މިއީ ހީޓް ސްޓްރޯކްއެއްގެ އަލާމާތްތަކެވެ. މިކަން މެދުވެރިވެއްޖެ ނަމަ، އަވަހަށް ސިއްހީ މާހިރެއްގެ އެހީ ހޯދާށެވެ.

އެންމެ ތުއްތު ކުދިން ކޮޓަން ނުވަތަ ލިނެން ހެދުން ލައްވާށެވެ. ދޫކޮށް ހުންނަ އަލި ކުލަކުލައިގެ ހެދުން ލައްވާށެވެ. 

ބޭރުގައި ދަރިފުޅު ހޭދަ ކުރާ ވަގުތަށް ހާއްސަކޮށް ސަމާލުކަން ދޭށެވެ. ކުޑަކުދިން ކުޅެލައި ދުވެލައި ފުންމާލާ ހަދަން ބޭނުންވާނެ އެވެ. އެކަމަކު އަަވީގައި ހޭދަ ކުރާ ވަގުތު މަދު ކުރާށެވެ.

މީގެ އިތުރުން މިއީ އިންތިހާބަށް ކެމްޕެއިން ކުރާ ދުވަސްވަރެއް ކަމުން އަތޮޅުތަކުގައި ވެސް ފޯރިއާ އެކު ކެމްޕެއިން ހަރަކާތްތައް ކުރިއަށް ދާއިރު، ކުދިން މިފަދަ އިވެންޓްތަކަށް ގެންގޮސް ގިނަ ވަގުތު އަވީގައި ނުބައިތިއްބާށެވެ. ހޫނުގަދަ ދުވަސްވަރު ކުދިން މާ ބޮޑަށް ވަރުބަލިވިޔަ ނުދޭށެވެ.

ހެނދުނު 10 އިން ފެށިގެން ހަވީރު 4އާ ދެމެދު އެތެރޭގައި ވަގުތު ހޭދަ ކުރުމަށް ބާރުއަޅާށެވެ. ހޫނުގަދަ ދުވަސްތަކުގައި، ހެނދުނާއި ހަވީރުގެ ފިނީގައި ކުދިން ބޭރުގައި ކުޅެން ފުރުސަތު ދިނަސް ދެ ގަޑި އިރަށް ވުރެ ގިނައިން ބޭރުގައި ވަގުތު ހޭދަ ނުކުރާށެވެ. އަދި ބޭރުގައި ހޭދަ ކުރާ ވަގުތު ގިނައިން ބްރޭކް ނަގައި ގިނައިން ފެން ބުއިމަށް ބާރުއަޅާށެވެ.