އަހަރުގެ ފުރަތަމަ ފިލްމު 'މީ އިޝްގް': ހަމަ ޒާތެއްގެ އިޝްގެއް

ހޮނިހިރު ދުވަހު އޮލިމްޕަސް ސިނަމާގައި އެޅުވި 'މީ އިޝްގް' އަކީ މި އަހަރުގެ ފުރަތަމަ ފިލްމެވެ. މިއީ ޑައިރެކްޓަރު އަދި ލިޔުންތެރިޔާ އަޒްހާން އިބްރާހިމްގެ ފުރަތަމަ ފީޗާ ފިލްމު ވެސް މެ އެވެ.

ފިލްމުގެ ލީޑް ތަރިއެއްގެ ގޮތުގައި ފެންނާނީ އާމިނަތު ރަޝްފާ (އާޝާ) އެވެ. ފިރިހެން ލީޑެއްގެ ގޮތުގައި އުޅެނީ ޝަރަފް އަބްދުﷲ އެވެ. ލީނާޒް ހުސެން ޕްރޮޑިއުސްކޮށް ޝަހީދު ލެގަސީ މިއުޒިކް ހަދާފައިވާ މި ފިލްމް އޮލިމްޕަހުގައި އަންނަ ހުކުރު ދުވަހުގެ ނިޔަލަށް ބަލާލެވޭނެ އެވެ.

ހަމަަ އަސްލުވެސް މި ފިލްމަށް ގޮސް ހަމަޖެހިލީ ދިވެހި ސިނަމާގެ އިޝްގުގައި ރަނގަޅަށް ޖެހިލާށެވެ. ފިލްމްގެ ޕްލޮޓް އަދި މާ ބޮޑަށް ކިޔައިދެވޭކަށް ނެތެވެ. އެކަމަކު ވެސް ބުނެވޭނީ، މިއީ ލޯބިލޯބި ފިލްމެކެވެ.

ފިލްމުން ދައްކާލަނީ ސަބާ (އާޝާ) އާއި އާރިޒް (ޝަރަފް)ގެ ލޯބި ފެށިގެންދާ ގޮތެވެ. ފިލްމު ފެށެނީ އެ ދެ މީހުން ބައްދަލުވާ ހިސާބުންނެވެ.

މާފުށީ ގެސްޓްހައުސްއަކުން ސަބާ އާއި އާރިޒް ބައްދަލުވަނީ ސަބާ ކޮޓަރިއެއް ނަގާއިރު ގެސްޓްހައުސްއަށް އޮޅުމަކުން ހަމަ އެ ކޮޓަރި ޑަބަލް ބުކްވެ އާރިޒްއަށް ދިނުމުންނެވެ. ތަފާތު މިޒާޖެއްގެ މި ދެ މީހުންގެ މެދުގައި ގުޅުން ބަދަހިވެ ލޯތްބެއް އުފެދެ އެވެ. ބޮޑުބައި މާފުށީގައި ނަގާފައިވާ ފިލްމްގެ މަންޒަރުތައް ހިތްގައިމެވެ. ރޮމްކޮމްއެއް ބަލާލެވުނުކަމުގެ އިހްސާސް ކުރެވެ އެވެ.

އާޝާ އޭނާގެ ކެރެކްޓާ ކުޅެފައިވާ ގޮތް ފުރިހަމަ އެވެ. ސަބާގެ ކެރެކްޓާގެ މިޒާޖުގެ ގޮތުގައި ދައްކާފައިވާ، ހިޔާލު ފާޅުކުރަން ފަސްނުޖެހޭ، އަދި ބުނަން ބޭނުން އެއްޗެއް ބުނާ، ކެރޭ ޒުވާން އަންހެން ކުއްޖެއްގެ ރޯލު އާޝާއާ ގުޅެ އެވެ.

 އޭނާގެ ބައިވެރިޔާގެ ގޮތުގައި ދައްކާ އާރިޒްގެ ބައި ގެނެސްދޭ ޝަރަފްގެ އަޑާއި އެކްޓިން ފެނިފައި ހަނދާނަށް އައީ މަޝްހޫރު އެކްޓަރު ޔޫސުފް ޝަފީއު (ޔޫއްޕެ) އެވެ. ޔޫއްޕެއަށް ފަހު، ފިރިހެން ލީޑް ރޯލް ކުޅުމަށް ދިވެހި ސިނަމާގެ "ނެކްސްޓް ބިގް ތިންގް" އަކީ ޝަރަފު ކަމުގައި ވުން ގާތެވެ. 

ޔޫއްޕެ ވެސް 'މީ އިޝްގް'ގެ ރިވިއުއެއް ސޯޝަލް މީޑިއާގައި ޕޯސްްޓްކޮށްފައިވެ އެވެ.

ފިލްމުގެ ނެގެޓިވް ރޯލުން ފެންނަނީ ޝާރިފް އެވެ. އެ ރޯލް އޭނާއާ ގުޅެ އެވެ.

އަހަންނަށް އެންމެ ކަމުދިޔައީ މާފުށީ ގެސްޓްހައުސްގެ ރިސެޕްޝަންގައި މަސައްކަތް ކުރާ ދެ މީހުންނެވެ. ކޮމެޑީ ބައި ވެސް ހިމެނޭތީ އެވެ.

ފިލްމްގެ ކްލައިމެކްސް އަދި ފިލްމް ބަލައި ނިންމާލުމަށް ފަހު އަހަރެންގެ އަމިއްލަ ހިޔާލަށް އެއްޗެއް ބުނާ ނަމަ، ބޭނުންވި ވަރަކަށް ފުނެއް ނުވި އެވެ. މިއަށް ވުރެ ފުރިހަމަ ކޮށްލެވޭނެ ކުދިކުދި ކަންކަން އެބަހުއްޓެވެ. ނަމަވެސް ސްޕޮއިލާއަކާ ނުލާ މި ބައި ކިޔައިދޭން ދައްޗެވެ. 

އެކަމަކު ޖުމްލަކޮށް ބުނާ ނަމަ، އިޝްގީ އަވާގައި މީހާ އެއްކޮށް ޖެހި ކަރުނަ އަޅަން ޖެހޭވަރު އަހަރެެންނަށް ނުވިޔަސް މިއީ ލޯބިލޯބި ފިލްމެކެވެ. 

އެކަމަކު އަހަރެންނާ ޖެހިގެން އިން އެކުވެރިޔާ ދެ ފަހަރަކު ކަރުނަ ފޮހެލި އެވެ. ފަހަރުގައި އެކުވެރިޔާ އަކީ "ހޯޕްލަސްލީ ރޮމޭންޓިކް" މީހަކަށް ވުން އެކަށީގެންވެ އެވެ.

ފިލްމްގެ ލަވަތައް މުޅިން އެހެން ލެވެލް އެކެވެ. ފުރަތަމަ އަޑު އިވުނު އިރު ވެސް ކަންފަތަށް އަރާމެވެ. ފިލްމްގެ ޓައިޓްލް ލަވަ ވަކިން ހާއްސަކޮށް އިޝްގްގައި ޖައްސާލި އެވެ. އަލީ އިނާން ސައީދު (އައްޔު) ރާގާއި ޅެން ހަދައި އައިޝަތު މާއިން ރަޝީދުގެ ހިތްގައިމު އަޑުން ކިޔާފައިވާ މި ލަވަ އަސަރުގަދަ އެވެ.

ފިލްމްގައި ތަންކޮޅެއް ލަވަ ގިނަހެން ހީވިޔަސް، ކޮންމެ ލަވައެއް ވެސް އެހާ ފުރިހަމަ އެވެ. އައިޓަމް ސޯންގްގެ ގޮތުގައި ގެނެެސްދިން 'ޝާހީ ލޮލުގައި' އަކީ މަޝްހޫރު ލަވަކިޔުންތެރިން ކަމުގައިވާ މުހައްމަދު އަބްދުލް ގަނީ (ތޭރަވާ) އާއި މަރިޔަމް އަޝްފާ ކިޔާފައިވާ ލަވަ އެކެވެ.

މި ލަވައިގެ ކޮރިއޯގްރަފީ އަދި ސިނެމެޓޮގްރަފީ ފުރިހަމަ އެވެ. މިފަހުން މަޝަހޫރުވެގެން އުޅޭ 'ގުލިމަޓާ' ލަވައިގެ ވައިބެއް ވެސް ހުއްޓެވެ.

 ތޭރަވާ ކިޔަފައިވާ 'ލޮލުން މަގޭ' އަކީ ވެސް ފިލްމުގެ ރީތި ލަވަ އެކެވެ. އެ ލަވަ ވަކިން ހިތްގައިމެވެ.

ލޯބީގެ ފިލްމްތަކަކީ ދިވެހިންނަށް ކަމުދާ ރަނގަޅު ޖޮންރާ އެކެވެ. 'މީ އިޝްގް' އަކީ 2000ގެ އަހަރުތަކުގައި ދިވެހި ސިނަމާއަށް ގެނައި ލޯބީގެ ބަހާރު މޫސުން އަލުން އިޔާދަ ކުރާ ވަރުގެ ފިލްމެއް ކަމުގައި ފިލްމްގެ ޕްރޮޑިއުސަރު ލީނާޒް ބުންޏެވެ.

ފިލްމް ބަލަން ގޮސް ތިބި މީހުންގެ ކޮމެންޓުތަކުން، ފިލްމަށް ޝައުގުވެރިވެ ގަޔާވެފައިވާ މިންވަރު އެނގުނެވެ. ސީރިއަސްކޮށް ގޮސް ފިލްމް ބަލާހިތުން ބަލާ މީހުންނާއި ޖެއްސުން ކުރާ މީހުން އޯޑިއަންސްގައި އުޅެ އެވެ. ލާރި ދީފައި ގޮސް އެކަން ކުރުމަކީ ވެސް ޒާތެެއްގެ އިޝްގްކެވެ. ތަހުޒީބުވީމަ އަދި ރަނގަޅުވާނެ އެވެ.

ފިލްމް ފެށުމުގެ ކުރިން ޑައިރެކްޓަރު އަޒްހާން ބުނެފައިވާ އެއް ވާހަކައަކީ އިޝްގުތޯ ނޫންތޯ ނިންމާނީ ބެލުންތެރިން ކަމުގަ އެވެ. އަހަރެން ބުނާނީ މީ ޒާތެއްގެ އިޝްގެކޭ އެވެ.