'ދި އާޗީސް'ގެ ތަރިން ނެޓްފްލިކްސްގެ 'ޓުޑުމް' އިވެންޓުގައި ބައިވެރިވުމަށް ބްރެޒިލްއަށް ދިޔުމަށް މަތިންދާބޯޓުގައި
'ދި އާޗީސް'ގެ ޖެކެޓުގައި ތަރިން ބްރެޒިލް އަށް
ނެޓްފްލިކްސް އިން ދެއްކުމަށް އުފައްދަމުން އަންނަ ފިލްމު 'ދި އާޗީސް'ގެ ޒުވާން ތަރިން އެ ކުންފުނީގެ ފޭން އިވެންޓުގައި ބައިވެރިވުމަށް ބްރެޒިލްއަށް ހިނގައްޖެ އެވެ.
އެ މީހުން އިންޑިއާ އިން ފުރި އިރު ތިބީ އާޗީސް "ގޭންގު"ގެ ގޮތުގައި އެންމެން އެއް ވައްތަރެއްގެ ޖެކެޓު ލައިގެންނެވެ. ކަޅު ކުލައިގެ އެ ޖެކެޓުގެ ފުރަގަހުގައި 'ދި އާޗީސް' ލިޔެ ނެޓްފްލިކްސްގެ ލޯގޯ ޖަހާފައި ހުއްޓެވެ.
މަޝްހޫރު އާޗީ ކޮމިކްސްގެ އިންޑިއާ އެޑަޕްޓޭޝަނެއްގެ ގޮތުގައި ޒޯޔާ އަހުތަރް ޑައިރެކްޓްކުރާ 'ދި އާޗީސް'ގެ އާ ޕޯސްޓަރެއް ހޯމަ ދުވަހު ވަނީ ނެރެފަ އެވެ.
ބޮލީވުޑްގެ ފުންނާބު އުސް ބައެއް ތަރިންގެ ދަރިން އިންޑަސްޓްރީއަށް ތައާރަފްކުރާ މި ފިލްމުން ޝާހު ރުކް ހާންގެ ދަރިފުޅު ސުހާނާ ހާން، ޝްރީދޭވީ އާއި ބޮނީ ކަޕޫރުގެ ދަރިފުޅު އަދި ޖާންވީ ކަޕޫރުގެ ކޮއްކޮ ހުޝީ ކަޕޫރު އަދި އަމީތާބު ބައްޗަންގެ ކާފަ ދަރިފުޅު އަގަސްތުޔާ ނަންދާ ފެންނާނެ އެވެ.
ގިނަ ބަޔަކު އިންތިޒާރުކުރަމުން އަންނަ މި ފިލްމު ނެޓްފްލިކްސް އިން ރިލީޒްކުރާނެ ތާރީހެއް އަދި އިއުލާނެއް ނުކުރެ އެވެ.
ނެޓްފްލިކްސްގެ 'ޓުޑުމް' އިވެންޓު އޮންނާނީ އަންނަ ހޮނިހިރު ދުވަހު ސައޮ ޕައުލޯގަ އެވެ. އެ ކުންފުނީގެ 'ހާޓް އޮފް ސްޓޯން'ގެ ތަރިއެއްގެ ހައިސިއްޔަތުން އާލިއާ ބަޓް ވެސް އެ އިވެންޓުގައި ބައިވެރިވާނެ އެވެ. އެއީ އާލިއާ ހޮލީވުޑަށް ތައާރަފްވާނެ ފިލްމެވެ.