އައުލީއީ ކްރަވާލިއޯ މޮއާނާގެ ގޮތުގައި ނުފެންނާނެ

މޮއާނާގެ ގޮތުގައި އޭނާ ނުފެންނާނެކަން އައުލީއީ ކްރަވާލިއޯ ޔަގީންކޮށްދީފި އެވެ.

އެނިމޭޓެޑް ފިލްމުގައި މޮއާނާގެ ރޯލަށް އަޑުއެޅި އައުލީއީ ބުނިގޮތުގައި އޭނާ 'މޮއާނާ'ގެ ލައިވް އެކްޝަން ފިލްމުގެ އެގްޒެކެޓިވް ޕްރޮޑިއުސަރެއްގެ ހައިސިއްޔަތުން މަސައްކަތްކުރާނީ ޓައިޓްލް ރޯލަށް އެންމެ އެކަށީގެންވާ އެކްޓްރެސް ހޯދުމަށެވެ.

ޑުވޭން ޖޯންސަން (ދަ ރޮކް) މިދިޔަ މަހު ވަނީ 'މޮއާނާ'ގެ ލައިވް އެކްޝަން ފިލްމެއް ހަދަން އުޅޭކަން އިއުލާންކޮށްފަ އެވެ. އެނިމޭޓެޑް ފިލްމުގައި އޭނާ އަޑުއެޅި މާއުއީގެ ގޮތުގައި ޑުވޭން ފެންނާނެ އެވެ.

އައުލީއީ ސޯޝަލް މީޑިއާގައި އިއުލާންކުރި ގޮތުގައި އޭނާ އުމުރުން 14 އަހަރުގައި އަޑުއެޅި މޮއާނާގެ ހިތްވަރުގަދަކަން ތަމްސީލުކޮށްދޭން ނަގާނީ ޕެސިފިކް ކަނޑުގެ ޖަޒީރާތަކަށް ނިސްބަތްވާ އަންހެންކުއްޖެކެވެ.

'މޮއާނާ' އަކީ ޑިޒްނީގެ 21 ވަނަ ގަރުނުގެ އެނިމޭޓެޑް ފިލްމުތަކުގެ ތެރެއިން އުފައްދާ ފުރަތަމަ ލައިވް އެކްޝަން ފީޗާ އެވެ. އެ ސްޓޫޑިއޯގެ ސިޔާސަތު މިހާރު ބަދަލުކުރަމުން އަންނަ އިރު، 'ފްރޯޒެން' އާއި 'ޓޭންގަލްޑް' ފަދަ ފަހުގެ އެނިމޭޝަންތަކުގެ ރީމޭކް އުފެއްދުން ވެސް އެކަށީގެންވެ އެވެ.

'މޮއާނާ'ގެ އެނިމޭޓެޑް ފިލްމު ހިޓަކަށްވެ، ދުނިޔޭގެ ބޮކްސް އޮފީހުގައި 600 މިލިއަން ޑޮލަރު ހޯދި އެވެ.

ޑިޒްނީގެ އެހެން ބައެއް އެނިމޭޓެޑް ކްލެސިކްތައް ވެސް ކާމިޔާބުކަމާ އެކު ލައިވް އެކްޝަން ފިލްމުގެ ގޮތުގައި ނެރެފައިވެ އެވެ. އޭގެ ތެރޭގައި 2017ގެ 'ބިއުޓީ އެންޑް ދަ ބީސްޓް' އަދި 2019ގެ 'އެލާޑިން' އާއި 'ދަ ލަޔަން ކިންގް' ހިމެނެ އެވެ.

ޑިޒްނީގެ އާ ލައިވް އެކްޝަން ފިލްމު 'ދަ ލިޓްލް މާމެއިޑް' އަންނަ ހުކުރު ދުވަހު ސިނަމާތަކުގައި އަޅުވާނެ އެވެ.