'އޮފީސް ލޯބި': ބަލާހިތުން ބަލާލެވުނު ކޮމެޑީއެއް

ބައިސްކޯފު އެޕަށް ވަނީ ލަވައެއް ޖަހާލާށެވެ. މިސްރާބުން ކައްސާލައިގެން ޓީވީ ސީރީސް ޓެބަށް ފިތާލީ އަލަށް ނެރެގެން އުޅެނީ ކޮންކަހަލަ އެއްޗެއްތޯ ބަލާލާށެވެ. ލޮލުގައި އަޅައިގަތީ 'އޮފީސް ލޯބި' ނަމަަކަށް ކިޔާ ޓީވީ ޝޯ އެކެވެ.

މީގެ ކުރިން އެ ޝޯގެ ލިޔުންތެރިޔާ އަދި ޑައިރެކްޓަރު އަމީނާ މުހައްމަދުއާ ބައްދަލުވެ، އޭނާއާ އެކު ސީރީސްގެ ވާހަކަ ދެކެެވުނެވެ. ބަލާނަމޭ ބުނި ހަނދާނެއްވި އެވެ. އެހެންވެ، ކޮންމެހެން ވެސް އެއް އެޕިސޯޑް ބަލާލުމަށް ސީރީސް އަޅުވާލީމެވެ.

މީގެ ކުރިން، ދިވެހި ޓީވީ ޝޯއެއް ބަލާ ހިތުން އެއްފަހަރާ ނުބަލަމެވެ. ހާއްސަކޮށް ކޮމެޑީ ޖޮންރާ އެވެ. މި ސީރީސް ތަފާތެވެ. 'އޮފީސް ލޯބި' އަހަރެން މީގެ ކުރިން ދިވެހި ކޮމެޑީއާ މެދު ދުށް ގޮތް މުޅިން ބަދަލުކޮށްލި އެވެ.

މި ޝޯގައި ދައްކަނީ ބޮޑު ކުންފުންޏެއްގެ ދަށުން ބިސް ވިއްކާ އަދި މާކެޓްކުރާ ވިޔަފާރިއެއް ކަމުގައިވާ ދޫސަން ކުންފުނީގައި އުޅޭ މުވައްޒަފުން އޮފީހުގައި ވަގުތު ހޭދަކުރާ ގޮތެވެ. ޝޯގައި މުޅިން ވެސް ފެންނަނީ އޮފީސްތެރެ އާއި އޮފީހުގައި ހިނގާ ކަންކަމެވެ. ފުރަތަމަ ސީޒަންގައި 10 އެޕިސޯޑު ހިމެނޭ އިރު އެޕިސޯޑެއްގެ ދިގުމިން ގާތްގަނޑަކަށް އުޅެނީ 25 މިނެޓާއި 45 މިނިޓާ ދޭތެރޭގަ އެވެ.

ޝޯގެ ފުރަތަމަ އެޕިސޯޑް ފެށިގެން އަންނަނީ ބޮޑު ދުވަހަކުންނެވެ. ދޫސަންއާ އަލަށް ގުޅޭ މުވައްޒަފަކާ އެކު އެވެ. އެއަށް ފަހު، ދެން އަންނަ އެޕިސޯޑުގައި އޮންނަނީ ކުންފުނީގެ ނަން ބަދަލު ކުރުމަަށް މުވައްޒަފުންގެ ހިޔާލު ހޯދުމެވެ. އެއަށް ފަހު، ބޮސް ނާންނަ ދުވަހެއްގައި އޮފީސްތެރޭ ކަންތައްވާ ގޮތް ދައްކާލާ އެޕިސޯޑެކެވެ. 

ހަތަރުވަނަ އެޕިސޯޑްގައި ދައްކަނީ އޮފީސް ދަތުރަކު  ދުބާއީގައި އޮންނަ ބިސް ފެއާ އަކަށް ދިއުމަށް މުވައްޒަފަކު ހޮވާ ދުވަހެވެ. އެއަށް ފަހު އަންނަ އެޕިސޯޑުގައި 'އެމްޕްލޯޔީ އޮފް ދަ މަންތު' ހޮވަ އެވެ. އޮފީހުގެ އޮނިގަނޑު އޮންނަ ގޮތް  މުވައްޒަފުންނަށް ކިޔައިދޭ ދުވަހަކާއި އަހަރީ ބޯނަސް ދޭ ދުވަހެއް ވެސް ދައްކަ އެވެ. މުވައްޒަފުންނަށް ތަމްރީން ދޭ ދުވަހެއް ވަކި އެޕިސޯޑްތަކެއްގެ ގޮތުގައި ދައްކަ އެވެ. ސީރީސް ނިންމާލަނީ މުވައްޒަފަކަށް ދޭ ޕްރޮމޯޝަނަކާ އެކު އެވެ.

މިއީ އާއްމުކޮށް އޮފީހެއް ހިނގާ ގޮތް ކަމުން އަދި މާ ބޮޑަށް ޝައުގުވެރިވާނެ ހެން ހީނުވެދާނެ އެވެ. އެކަމަކު، ޑައިރެކްޓަރު އަމީނާ އޭނާގެ އަމިއްލަ ސްކްރިޕްޓް ގެނެސްދީފައިވަނީ ބަލާހިތްވާ ކަހަލަ ގޮތަކަށެވެ. އެއް އެޕިސޯޑް އަނެއް އެޕިސޯޑާ ގުޅުވާލައި ކޮންމެ ކެެރެކްޓާއެއް ތަފާތު ގޮތަކަށް ބިނާކުރުމަށް މަސައްކަތްކޮށްފައިވެ އެވެ. 

ހުސް ވަގުތުކޮޅެއްގައި ހާސް ބޮޑު ނޫން ގޮތަކަށް ޓީވީން ނުވަތަ ފޯނުން ބަލާލަން މި ޝޯ ކަމުދިޔައީ އެހެންވެ އެވެ.

މި ސީރީސްއަށް އަމީނާ އުފެއްދި ކެރެކްޓާތަކަށް ދިރުން ގެނައީ އޭނާ އެއްކޮށްލި ކާސްޓެވެ. ކާސްޓު މާ ބޮޑު ނޫނަސް އެކްޓިން ރަނގަޅުކަން ފާހަގަވި އެވެ. ޝޯއިން ފެންނަ ގިނަ ތަރިންނަކީ އަލަށް އެކްޓިން އަށް ނުކުތް މީހުން ކަމަށް ވިޔަސް އެމީހުން ހުނަރުވެރި އެވެ. ސްކްރިޕްޓް ކިޔާލާ އިރު އައިބު ކަމެއް ނެތެވެ.

ރާއްޖޭގެ އޮފީސްތަކުގައި އާއްމުކޮށް ހިނގާ، އެކަމަކު މަސައްކަތު މާހައުލެއްގައި ހިނގައިގެން ނުވާނެ ކަންކަން ގެނެސްދެނީ ވަރަށް އަސްލާ އެއްގޮތް ގޮތަށެވެ. އޮފީހެއްގައި މަސައްކަތްކޮށްފައިވާ މީހެއް ނަމަ، މިއީ ކަންހިނގާ ގޮތް ކަމުގައި އެއްބަސްވާނެ އެވެ.

ދޫސަންގައި ރިސެޕްޝަނިސްޓްގެ ގޮތުގައި މަސައްކަތް ކުރާ ޝިފްލީންގެ ބައި ކުޅެފައި ވަނީ މަރިޔަމް ވަހީދާ އެވެ. ސީރީސް އިން އޭނަ ފެންނަނީ އޮފީސް ތެރޭ ނަށާ، ޓިކްޓޮކް ހަދާ މީހެއްގެ ގޮތުގަ އެވެ. އިތުރު ކަމަކަށް ފާހަގަވީ އޭނާ އަކީ މީހުންނާ ގުޅޭ، މީހުންގެ ވާހަކަ ދައްކާ މީހެކެވެ. އޮފީސްތެރޭ އޭނާ ހަދާ ޓިކްޓޮކްތައް މަގުބޫލުވެ ބޮޑު ފޮލޮވާ ބޭސްއެއް ލިބެނީ އޮފީހުގެ އެހެެން މުވައްޒަފަކު ބައިވެރިކުރުމުންނެވެ. ޝިފްލީންގެ ކެރެކްޓާ މަރިޔަމް ވަހީދާ ގެނެސްދޭ ގޮތް ވަރަށް ފުރިހަމަ އެވެ. އެންމެ ކަމުދިޔަ އެއް ކެރެކްޓަރަކީ ޝިފްލީން އެވެ.

އެޗްއާރު މެނޭޖަރެއްގެ ގޮތުގައި މަސައްކަތް ކުރާ މުނީރާގެ ބައި ގެނެސްދެނީ މުޅިން އާ ތަރި އެކެވެ. އެއީ، ގައުމީ ފެންވަރުގައި ބިލިއަޑް ކުޅޭ ދީނާ އަހުމަދު އެވެ. 'އޮފީސް ލޯބި' އަކީ ދީނާ މި ދާއިރާއިން ފެންނަ ފުރަތަމަ ފަހަރެވެ. މުނީރާއަކީ އޮފީސްތަކުގައި އުޅޭ ބޮހުން ތަމްސީލްކޮށްދޭ ކެރެކްޓަރެކެވެ. ވަކި މުވައްޒަފުންތަކަކަށް މަންފާވާ ގޮތަށް ދޫސަންގެ ކަންކަން ރާވާލާ އެވެ. އަދި އޭނާއާ ޒާތީ ގުޅުމެއް ބާއްވާ މުވައްޒަފަށް އިސްކަންދެ އެވެ. 

ދޫސަންއާ އަލަށް ގުޅެނީ އޮސްޓްރޭލިއާ އިން ރާއްޖެ އައި، ދިވެހި ބަހުން ރަނގަޅަށް ވާހަކަ ދައްކަން ނޭނގޭ އަދި ދިވެހި ކިޔަން ނޭނގޭ މުވައްޒަފެކެވެ. ރައުޝަން ނަމަކަށް ކިޔާ މި ކެރެކްޓާ ގެނެސްދީފައިވާ ތަރި އަކީ މޮޑެލްއެއް ކަމުގައިވާ ރޫބީ ފަޒާލް އެވެ. މިއީ ފިލްމީ ދާއިރާގައި ރޫބީގެ ފުރަތަމަ ފެނިލުމެވެ. ދޫސަން ކުންފުންޏާ ރައުޝަން ގުޅޭ ހިސާބުން ހުރިހާ ފުރުސަތުތަކެއްހެން އޭނާ އަށް ލިބެ އެވެ. 

އޮފީހުގައި ހުރިހާ މަސައްކަތެެއް އެންމެ ބަރާބަރަށް ކުރާ ރަމީޒު އަކީ ސީރީސްގެ އިތުރު ކެރެކްޓަރެކެވެ. މި ބައި ކުޅެފައިވަނީ ރަފްހާން ޝަރީފް އެވެ. މަސައްކަތްތައް ބަރާބަރަށް ކުރިޔަސް، އޭނާ ފެންނަނީ އެއްވެސް ކުރިއެރުމެއް ނުލިބި ހުންނަ ތަނެވެ. އޭނާ އެ ޝަކުވާތައް ކުރެ އެވެ. އެ ވެސް އަޑުއިވޭ މީހެއް ނުހުރެ އެވެ. ކުޑަމިނުން ބޮސްގެ ދަރިފުޅުގެ ޔުނިވާސިޓީ އެސައިމަންޓްތައް ހަދަން ޖެހެނީ ވެސް އޭނާ އަށެވެ.

ޝޯގައި ދެން ހިމެނޭ ކެރެކްޓާާ އަކީ ޒުވާން މަންމަ މައުނާ އެވެ. މި ބައި ކުޅެފައިވަނީ އައިސް ޓީވީގެ ޕްރެޒެންޓަރުކަން ކޮށްފައިވާ އަދި 'އެހެނަސް' ޑްރާމާ ސިލްސިލާއިން ފެނިފައިވާ އައިމިނަތު ޝުހާ އެވެ. ޝޯގައި އޭނާ ފެންނަނީ އޮފީހުގައި ނިދާހެދުންތަކެއް ވިއްކާ އަމިއްލަ ވިޔަފާރިއެއް ހިންގާ މީހެއްގެ ގޮތުގަ އެވެ. ޝޯގެ މައިގަނޑު ކެރެކްޓަރެއްގެ ގޮތުގައި މައުނާ ހިމެނޭ އިރު، އޮފީސް ތެރެއިން އޭނާގެ ލޯބީގެ ހާއްސަ ގުޅުމެއް އުފެދެން އުޅޭ ކަހަލަ މިސްރާބަކަަށް ދެ އެވެ.

މައުނާ އޭނާގެ ވިޔަފާރި އަށް ތަކެތި ޑެލިވާ ކުރަނީ އޮފީހުގެ އައިޓީގައި މަސައްކަތް ކުރާ ހަމްދާންގެ އެހީތެރިކަމާ އެކު އެވެ. ހަމްދާންގެ ބައި ކުޅެނީ އިބްރާހިމް ސާލިމް އިސްމާއިލް އެވެ. ބޮސް ބުނެގެން އެހެން މީހުންގެ ސިސްޓަމްތަކަށް ވަދެ އެ އެއްޗެހި ފާސް ކުރުމުގައި އޭނާ އުޅޭ ތަން ޝޯ އިން ދައްކަ އެވެ.

ދޫސަންގައި ޖައިޝަމް ކިޔާ ޑިޒައިނަރެއް ވެސް އުޅެ އެވެ. މި ބައި ކުޅެފައިވަނީ ޖިމް އިންސްޓަރަކްޓަރެއްގެ ގޮތުގައި މަސައްކަތް ކުރާ އަހުމަދު ޖިލިއަން ރަޝާދެވެ. އޭނާގެ ކެރެކްޓާ އަކީ އޮފީހެއްގައި އުޅޭނެ އެންމެ 'ކަޓުޖައްސާ' މީހާ އެވެ. ފުރަތަމަ ފެނިލުމުގައި ވެސް، އޭނާ ގަޑިއަށް ނައިސްގެން ބޮސް ޝަކުވާ ކުރެ އެވެ. ހަވާލުކުރާ މަސައްކަތް ނުނިންމާކަމުގެ ޝަކުވާ އިވެ އެވެ. ނަމަވެސް، ބޮސްގެ ދަރިފުޅުގެ ނަން ކަރުދާސްކޮޅު ހަދަން ހަވާލުކޮށްފައި އޮންނަނީ އޭނާއާ ކަމަށް ބުނެ ބޮސް ބޭޒާރުކޮށްލަ އެވެ.

އިތުރު ކެރެކްޓަރަކަށް ބަލާއިރު އޮފީހުގައި 'މާޗޯ މޭން' އެއްގެ ގޮތުގައި ދައްކަނީ ސައީދެެވެ. މުހައްމަދު ޝިވާޒް މި ބައި ކުޅެނީ އެ ރޯލާ ވަރަށް ބޮޑަށް ގަޔާވެގެންކަން ބަލާލުމުން އެނގެ އެވެ. ސައީދު އާއި އެޗްއާރު މެނޭޖަރު މުނީރާއާ ގުޅުމެއް އޮންނަކަން އޮފީސް އެންމެންނަށް އެނގޭ އިރު، ސައީދުގެ ޒާތީ ދިރިއުޅުމުގެ އެހެނިހެން ކަންކަން ވެސް އޮފީސް އެންމެންނަށް އެނގެ އެވެ.

މައިގަނޑު އަނެއް ކެރެކްޓަރަކީ ފިކުރީ އެވެ. އޮފީސް މާހައުލުގައި އެންމެ އާއްމުކޮށް ފެންނަ އެއް ކަމަކީ ހުރިހާ ކަމެއް އެނގޭ ކަމަށް ހެދިގެން އުޅޭ ރޯނު އެދުރު ބޮހުންނެވެ. މުވައްޒަފުން ކުރާ ހުރިހާ މަސައްކަތަކަށް ކްރެޑިޓް ނަގާނީ އޭނާ އެވެ. އަލަށް މުވައްޒަފަކު ވަނުމުން އޭނާއާ މާބޮޑަށް ގުޅެން މަސައްކަތް ކުރެ އެވެ. މި ބައި ގެނެސްދީފައިވަނީ ނޫސްވެރިކަމުގެ ދާއިރާގައި މަސައްކަތް ކުރާ މުހައްމަދު އަފްރާހް އެވެ. މި ކެރެކްޓާ ވެސް ފުރިހަމަ އެވެ. ޝޯ ބަލަމުންދާ އިރު، މިއީ އަސްލު ވެސް ބޮހުން އުޅޭ ގޮތޭ ހިތާހިތުން ބުނެލެވެ އެވެ.

ޝޯއިން ދެން ތަފާތު ކަމަކަށް ފެނުނީ ކޮންމެ އެޕިސޯޑެއް ނިމޭ އިރު އެ ދުވަހަކު އޮފީހުގައި ހިނގި ކަމަކާ ގުޅޭގޮތުން، ތަހުގީގަކަށް މައުލޫމާތު ދޭ އުސޫލުން، ވަކިވަކިން މުވައްޒަފުން މައުލޫމާތު ދޭން ޖެހުމެވެ. އެ ދުވަހެއްގައި ހިނގި ކަމަކާ ގުޅޭގޮތުން މުވައްޒަފުން ޝުއޫރު ފާޅު ކުރެ އެވެ.

'އޮފީސް ލޯބި' ބަލާ ނިންމާލާ އިރު މި ކެރެކްޓާތަކަށް ލޯބި ޖެހެ އެވެ. އަދި މި ކެރެކްޓާތަކުގެ ވާހަކަ ދެން ކުރިއަށް ދާނެ ގޮތް ބަލާހިތްވެ އެވެ. މި ސީރީސްއިން މަސައްކަތުގެ މާހައުލު ގެނެސްދީފައިވާ ގޮތް އަސްލާ އެއްގޮތް ކަމުންނެވެ.

އޯވާ އެކްޓިން އަދި އަމިއްލަ އަށް މަޖާވުން ނުލިޔަސް ދިވެހި ކޮމެޑީ ގެނެސްދެވޭނެކަން މި ސީރީސް އިން ބުނެދެ އެވެ.

ބައިސްކޯފުން ވަނީ މި އަހަރު މި ސީރިސްގެ ދެވަނަ ސީޒަނެއް ނުކުންނާނެ ކަމަށް ބުނެފަ އެވެ. 'އޮފީސް ލޯބި' އަކީ އައިސް ޓީވީގައި ފަސް އަހަރު ދުވަހު މަސައްކަތްކޮށްފައިވާ އަމީނާ ސްކްރިޕްޓް ލިޔެ ޑައިރެކްޓް ކުރި ފުރަތަމަ ސީރީސް އެވެ. 'އޮފީސް ލޯބި'ގެ ފުރަތަމަ ސީޒަނާ މެދު އޭނާ ވެސް ހިތްހަމަޖެހެ އެވެ.

"ވަރަށް ހިތްހަމަޖެހޭ، ކެރެކްޓާސް އަދި ޕާފޯމަންސްއާ މެދު ވެސް. ފުރަތަމަ ހެދުނު ސީރީސްއާ ބަލާފައި ވަރަށް ބޮޑު ހިތްހަމަޖެހުމެއް ލިބުނު،" މީގެ ކުރިން މީޑިއާނެޓުގެ މާކެޓިން އަދި ސޭލްސްގައި މަސައްކަތް ކުރުމަށް ފަހު އައިސްޓީވީ ހިންގުމާ ހަވާލުވި އަމީނާ ބުންޏެވެ.

އޭނާ ބުނިގޮތުގައި މި ވަގުތަށް ޝޯގެ މަސައްކަތް މެދުކެނޑިފައި އޮތަސް އުއްމީދަކީ މި އަހަރު ދެވަނަ ސީޒަން ފެނުމެވެ.

"ބައިސްކޯފުން އާ ޝޯތައް ފަށާއިރު ފަށާނެ. ސީޒަން 2ގައި މައިގަނޑު ގޮތެއްގައި ހިނގާނެ ބައެއް ކަންކަން ހުންނާނީ ޕްލޭންކޮށްލާފައި. އާ ކެެރެކްޓާތަކެއް ތައާރަފު ކުރަން އެކްޓަރުން ހޯދަން އޮޑިޝަންތައް ކުރިއަށް ގެންގޮސްފައިވަނީ،" ފިލްމް އެންޑް ޓެލެވިޝަންގެ ދާއިރާ އިން ކިޔަވާފައިވާ އަމީނާ ބުންޏެވެ.

މި ޝޯ 2022 ނިމުމުގެ ކުރިން ބަލާލެވުނުތީ އުފާވި އެވެ. އަދި ދިވެހި ހުނަރު އައިސްފައިވާ ހިސާބުން ފަހުރުވެރިވެވުނެވެ. މި ޝޯއަށް ސޯޝަލް މީޑިއާގައި ވެސް ތަރުހީބު ލިބޭކަން ޓިކްޓޮކްގައި ހުރި ކުދި ކްލިޕްތަކުން ފާހަގަވި އެވެ.

'އޮފީސް ލޯބި'ން އަހަންނަށް އެނގުނީ ދިވެހި ކޮމެޑީ ޖޯންރާ ވެސް އާއްމު ދިރިއުޅުމާ ގުޅުވާލާ، މީހުން ގަޔާވާނެ ގޮތަށް ގެނެސްދެވޭނެ ހުނަރު ދިވެހިންގެ ކިބައިގައި އެބަހުރި ކަމެވެ.