ފުރަތަމަ ޓައުންޝިޕް، 790 މިލިއަން ޑޮލަރުގެ 'ޕްރޮޖެކްޓު އައިލާ'ގެ އަމަލީ މަސައްކަތް ފަށައިފި

ރާއްޖޭގައި ގާއިމްކުރާ އިގްތިސޯދީ ހާއްސަ ސަރަހައްދު ނުވަތަ ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން ތަރައްގީ ކުރާ ފުރަތަމަ ޓައުންޝިޕް މަޝްރޫއު، 'އައިލާ ސަސްޓެއިނަބަލް ޓައުންޝިޕް' މަޝްރޫއުގެ ބިންގާ އަޅައި އަމަލީ މަސައްކަތް މިއަދު ފަށައިފި އެވެ.

ވީ ކިހިނެއް؟ - ނ. ދިގުފަރު ފަޅާއި ދެކުނުފަރު އަދި ކުރަމާދޫގައި ތަރައްގީ ކުރާ މި ޓައުންޝިޕް މަޝްރޫއުގެ ބިންގާއެޅުމަށް މިއަދު އެ ސަރަހައްދުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި މަސައްކަތް ރަސްމީކޮށް ފައްޓަވައިދެއްވީ ރައީސް މުހައްމަދު މުއިއްޒު އެވެ.

ތަފްސީލް - ޕްރޮޖެކްޓު އައިލާއަކީ 790 މިލިއަން ޑޮލަރު (12 ބިިލިއަން ރުފިޔާ)ގެ މަޝްރޫއެކެވެ.

މި މަޝްރޫއުގެ އިންވެސްޓުމެންޓު އެއްބަސްވުމުގައި، މަޝްރޫއު ކުރިއަށް ގެންދާ ކްރިސްޓަލް ހޯލްޑިންސްއާ އެކު މިދިޔަ 31 ޑިސެމްބަރުގައި ވަނީ ސޮއިކޮށްފަ އެވެ.

ޕްރޮޖެކްޓު އައިލާގެ ދަށުން ތަރައްގީ ކުރާ ޓައުންޝިޕްގައި މަތީ ފަންތީގެ ހޮސްޕިޓަލިޓީ އަދި ރެޒިޑެންޝަލް ބައިތައް ހިމެނޭނެ އެވެ.

މީގެ އިތުރުން:

މި ޓައުންޝިޕް ތަރައްގީކުރާނީ %60 އިއާދަކުރަނިވި ހަކަތައިން ހިންގާ ގޮތަށެވެ.

އެސްއީޒެޑް ގާނޫނުގެ ދަށުން ހުއްދަ ދީގެން ތަރައްގީކުރާ ޓައުންޝިޕްގެ މަސައްކަތް 2028 ވަނަ އަހަރުގެ ތެރޭ ނިމޭނެ ކަމަށް ވަނީ ލަފާކޮށްފަ އެވެ.