ހއ. ބާރަށް: މިއީ ގުދުރަތީ ގޮތުން އާދަޔާހިލާފު ރީތިކަމެއް ލިބިފައިވާ ރަށެއް.
ބާރަށު ޓޫރިސްޓު ހޮޓަލުގެ މަސައްކަތް އަނެއްކާވެސް ބީލަމަށް
ހއ. ބާރަށުގައި ޓޫރިސްޓު ހޮޓަލެއް ހިންގުމަށް ޝައުގުވެރިވާ ފަރާތްތަކުން ބީލަން ހުށަހެޅުމަށް ޓޫރިޒަމް މިނިސްޓްރީން އަނެއްކާވެސް ހުޅުވާލައިފި އެވެ.
ވީ ކިހިނެއް؟ - އެ މިނިސްޓްރީން އިއްޔެ ކުރި އިއުލާނެއްގައި ބުނީ 71،832 އަކަފޫޓުގެ ބިމެއްގައި ޓޫރިސްޓު ހޮޓަލެއް ތަރައްގީކޮށް ހިންގާނެ ބަޔަކު ހޯދުމަށް ބީލަމަށް ހުޅުވާލަން ނިންމާފައިވާ ކަމަށެވެ. އެގޮތުން:
-
ބާރަށުގައި ޓޫރިސްޓު ހޮޓަލެއް އަޅާނެ ބަޔަކު ހޯދަން ފުރަތަމަ އިއުލާނު ކުރީ އޮކްޓޯބަރު 2024ގައި
-
އޭގެ ފަހުން މިދިޔަ އަހަރުގެ ޖޫން މަހު އަދި ނޮވެމްބަރު މަހު ވެސް އެ މަޝްރޫއު ބީލަމަށް ހުޅުވާލި
ތަފްސީލް - މިކަމަށް ޝައުގުވެރިވާ ފަރާތްތަކުން އަންނަ މަހުގެ 23 ވަނަ ދުވަހު އޮންނަ މައުލޫމާތު ސާފުކުރުމުގެ ބައްދަލުވުމުގައި ބައިވެރިވެ، 31 މާޗުގައި ބީލަން ހުށަހެޅުމަށް ވަނީ ހުޅުވާލައިފަ އެވެ.
ޓޫރިޒަމް މިނިސްޓްރީން ބުނީ:
-
ބާރަށުގައި ޓޫރިސްޓު ހޮޓާ ތަރައްގީކޮށް ހިންގުމަށް ބިން ކުއްޔަށް ދެނީ 50 އަހަރަށް
-
ބިން ހަވާލުކުރާތާ ދެ އަަހަރު ތެރޭ ހޮޓާ ތަރައްގީ ކުރުމުގެ މަސައްކަތް ނިންމަން ޖެހޭ
-
ބިޑް ސެކިޔުރިޓީއަކީ 25،000 ޑޮލަރު
-
ލީޒް އިކުއިޒިޝަން ކޮސްޓަކީ 150،000 ޑޮލަރު (2.3 މިލިއަން ރުފިޔާ)
-
އެ ރަށުގައި ތަރައްގީ ކުރަނީ 50 ކޮޓަރީގެ (100 އެނދުގެ) ހޮޓަލެއް
ގުޅުން ހުރި - އިންޓަނޭޝަނަލް ބީލަމަކަށް ހުޅުވާލައިގެން ބާރަށުގައި އީކޯ ޓޫރިޒަމްގެ މަޝްރޫއެއް ހިންގުމަކީ މިދިޔަ ރައްޔިތުންގެ މަޖިލިސް އިންތިހާބުގެ ކެމްޕޭން ދުވަސްވަރު ކައުންސިލްތަކާ ބައްދަލުކުރައްވަން ކުރެއްވި ދަތުރުފުޅުތަކުގެ ތެރެއިން ރައީސް މުހައްމަދު މުއިއްޒު ވެވަޑައިގެންވި ވައުދުފުޅެކެވެ.