އެކްސްޕޯ މޯލްޑިވްސްއަށް ވަމުންދާ އެންމެ ފަހުގެ ތައްޔާރީތައް: މިއީ ދިވެހި ވިޔަފާރިތަކާއި ހުނަރުވެރިން އަދި ފަންނުވެރިން އެއްތަނެއްގައި ބައިވެރިވާ އެންމެ ބޮޑު ހަރަކާތް (ދައުރު ފޮޓޯ/އަބްދުﷲ އަނޫފް ޖުނައިދު)
ހުޅުމާލެ ސެންޓްރަލް ޕާކަށް ފަންނުވެރިންގެ އީދެއް
ހުޅުމާލެ މުޅި ސެންޓްރަލް ޕާކުގެ އެކި ސަރަހައްދުތަކުގައި އެ ހުރީ ބޮޑެތި ޓެންޓްތައް ޖަހައިފަ އެވެ. ކުދި ސްޓޯލްތައް ހަދައިފަ އެވެ. ކުލަ ބޮކި ދިއްލައި ނަލަކޮށްފަ އެވެ. އެންމެން ވެސް އަވަދި ނެތި ދިޔައީ ބޮޑު ހަރަކާތަކަށް ތައްޔާރުވަމުންނެވެ.
މިއީ މިއަދު ހަވީރު ރަސްމީކޮށް ހުޅުވާ މޯލްޑިވްސް އެކްސްޕޯ 2025 އަށް ތައްޔާރުވުމަށް ކުރަމުން އަންނަ އެންމެ ފަހުގެ ތައްޔާރީތަކެވެ. މިއީ ދިވެހި ފަންނުވެރިން ބައިވެރިވާ ބޮޑު އީދެކެވެ. އެންމެ ބޮޑު އެއްވުމެވެ.
The biggest gathering of Maldivian artisans and businesses kicks off this evening at Hulhumale' Central Park!
— Dhauru (@Dhaurunews) May 23, 2025
Maldives Expo 2025 is set to be a festival of creativity and innovation. Bring your family and make it a perfect evening out! Read the story: https://t.co/SFKXs7QjoX pic.twitter.com/sOi7jVN1mG
300އަށް ވުރެ ގިނަ ފަންނުވެރިން
ބިޒްނަސް ސެންޓާ ކޯޕަރޭޝަން (ބީސީސީ)ން އިންތިޒާމުކޮށްގެން ކުރިއަށް ގެންދާ ދިވެހިންގެ އުފެއްދުންތެރިކަމުގެ މައުރަޒު ނުވަތަ އެކްސްޕޯ މޯލްޑިވްސްގައި 300 އަށް ވުރެ ގިނަ ފަންނުވެރިން އެމީހުންގެ ހުނަރު ދައްކާލުކަށް 4،000 އާ ގާތްކުރާ އަދަދަކަށް އުފެއްދުންތައް ބައިވެރިކޮށްފައިވެ އެވެ.
އެކްސްޕޯ މިމަހުގެ ނިޔަލަށް
މިއަދުން ފެށިގެން މި މަހުގެ ނިޔަލަށް ހުޅުމާލޭ ސެންޓްރަލް ޕާކު ސަރަހައްދުގައި ކުރިއަށް ދާނެ އެވެ.
ގާތްގަނޑަކަށް 6 އަހަރަށް ފަހު ރާއްޖޭގައި ބާއްވާ މިފަދަ އެންމެ ބޮޑު މައުރަޒު ރާވާފައިވަނީ ރާއްޖޭގެ ކްރިއޭޓިވް އިކޮނޮމީ ޑިވެލޮޕްމެންޓު ޕްލޭނާ އެއްގޮތަށެވެ.
ބީސީސީ އިން ބުނީ އެކްސްޕޯ ކުރިއަށް ގެންދަން ގަސްތުކޮށްފައިވަނީ ނަގުދު ފައިސާއިން ވިޔަފާރިނުކޮށް ކޭޝްލެސްކޮށް ކަމަށެވެ.
އެކި ސަހަރުތަކެއް
އެކްސްޕޯގައި ޑިޖިޓަލް އެންޑް އިނޮވޭޝަން ޑިސްޓްރިކްޓެއްގެ އިތުރުން ކްރިއޭޓިވް އިކޮނޮމީ ޑިސްޓްރިކްޓަކާއި މުނިފޫހިފިލުވުމަށް ހާއްސަ އެކި ހަރަކާތްތައް ހިމެނޭ އެންޓަޓެއިންމެންޓް ޑިސްޓްރިކްޓެއް ވެސް ހުންނާނެ އެވެ.
މީގެ އިތުރުން ވިޔަފާރިވެރިންނަށް އެމީހުން އުފައްދާ އުފެއްދުންތައް ވިއްކުމުގެ ފުރުސަތު ލިބޭ މާކެޓު ޕްލޭސް އެއް ވެސް މި އެކްސްޕޯގައި ހިމެނެ އެވެ.
މިއީ އާއިލާ އާއި އެކުވެރިންނާ އެކު ޒިޔާރަތްކޮށް، އުފާވެރި ވަގުތުކޮޅެއް ހޭދަކޮށްލަން ވެސް ލިބޭ ފުރުސަތަކަށް ވާނެ އެވެ. އެކްސްޕޯގެ އެންޓަޓެއިންމެންޓު ޑިސްޓްރިކްޓުގައި މަގުބޫލު ބޭންޑުތަކުގެ ހުށަހެޅުންތަކުގެ އިތުރުން ބޮޑުބެރު ޗެލެންޖެއް ވެސް ފޯރިއާއެކު ކުރިއަށް ދާނެ އެވެ.