ޓީއެމްއޭ އަނެއްކާވެސް ވިއްކާލަނީ؛ ކީއްވެ؟

ރާއްޖޭގެ ފަތުރުވެރިކަމުގައި މުހިންމު ދައުރެއް އަދާކުރާ ޓްރާންސް މޯލްޑިވިއަން އެއާވޭސް (ޓީއެމްއޭ)އާ މެދު އަނެއްކާވެސް އަޑުތަކެއް ގަދަވެއްޖެ އެވެ. އެ އެއާލައިންގެ ހިއްސާ 2021 ވަނަ އަހަރުން ފެށިގެން ގަނެ ހިންގަމުން އަންނަ އިންވެސްޓްމަންޓް ކުންފުންޏެއް ކަމަށްވާ، ކާލައިލް ގްރޫޕުން އެ އެއާލައިން ވިއްކާލުމަށް ވަނީ މަޝްވަރާ ފަށައިފަ އެވެ.

"މިދިޔަ އަހަރުގެ މެދު ތެރޭ ހިސާބުން ފެށިގެން އެ ނެގޯޝިއޭޝަންތައް ކުރިއަށް އެބަދޭ،" ނަން ނުޖަހާ ގޮތަށް ވާހަކަ ދެއްކެވި ރާއްޖޭގެ އޭވިއޭޝަން ދާއިރާގައި ހަރަކާތްތެރިވާ މައުލޫމާތު އެނގިހުރި ބޭފުޅަކު ވިދާޅުވި އެވެ. 

ކާލައިލް ގްރޫޕުން ރާއްޖޭގެ އެންމެ ބޮޑު ސީޕްލޭން އޮޕަރޭޓަރު، ޓީއެމްއޭ ގަތީ ކޮވިޑުގެ ތެރޭގައި ދިމާވި ތާށިކަމަށް ފަހު އޭރު އެ އެއާލައިން ގަނެގެން އުޅުނު އެމެރިކާގެ ފާމެއް ކަމަށްވާ ބެއިން ކެޕިޓަލުން 550 މިލިއަން ޑޮލަރު ދެއްކުމަށް ފަހު އެވެ.

މައުލޫމާތު އެނގި ހުރި އެކި މަސްދަރުތަކުން 'ދައުރު'އަށް ކަށަވަރުކޮށްދިން ގޮތުގައި، ޓީއެމްއޭ ގަތުމަށް ހަތަރު ވަރަކަށް ފަރާތުން ޝައުގުވެރިކަން ފާޅުކޮށްފައިވެ އެވެ. އޭގެ ތެރެއިން އެއް ބަޔަކީ ކުރިން ވެސް އެ އެއާލައިންގެ ހިއްސާ ގަތް ބްލެކްސްޓޯން ގުރޫޕެވެ. 

މަސްދަރުތަކުން ކަށަވަރުވެފައިވާ ގޮތުގައި، ޓީއެމްއޭ ވިއްކާލުމަށް ކާލައިލް ގްރޫޕުން މަޝްވަރާކުރަނީ އެންމެ ކުޑަކޮށް ވެސް 600 މިލިއަން ޑޮލަރު (9.3 ބިލިއަން ރުފިޔާ)ގެ އަގަކަށެވެ. 

"އަގުގައި އެއްބަސްވުމަކަށް ނާދެވިގެން އުޅޭ ކަމަށް މައުލޫމާތު ލިބިފައި އޮތީ. ބްލެކްސްޓޯނުން 300 މިލިއަން ޑޮލަރު ހުށަހެޅި ކަމަށް އެނގިފައި އޮތީ،" އެބޭފުޅާ ވިދާޅުވި އެވެ. 

ބްލޫމްބާގުން ރިޕޯޓްކުރާ ގޮތުގައި ޓީއެމްއޭގެ ޖުމްލަ އަގު 500-700 މިލިއަން ޑޮލަރަށް އަރަ އެވެ. 

ޓީއެމްއޭ:

ޓީއެމްއޭ ވިއްކާލާ އަގު ބޮޑުވަނީ ވެސް އެ އެއާލައިންގެ ބޯޓުތައް ގިނަވުމާއި އަދި އެ އެއާލައިނުން ރާއްޖޭގެ އެންމެ ބޮޑު ސިނާއަތުގައި އަދާކުރާ ދައުރު މުހިންމުވުމުންނެވެ. 

ކާލައިލް ގްރޫޕަކީ ވެސް އިންވެސްޓްމަންޓް ކުންފުންޏެކެވެ. އެފަދަ ކުންފުނިތަކުން އަމަލު ކުރާ ގޮތަކީ ކުންފުނި ގަތުމަށް ފަހު ވަކި ވަރަކަށް ފައިދާގައި ހިންގުމަށް ފަހު ކުންފުނި ދޫކޮށްލުމެވެ. ނުވަތަ އެ މީހުން ކުންފުންޏަށް އިންވެސްޓްކުރި ފައިސާއިން ފައިދާވުމުން ކުންފުނި އަނެއްކާވެސް ބޮޑު އަގުގައި ވިއްކާލުމެވެ. އަދި ބައެއް ފަހަރު ކުންފުނީގެ އެސެޓް ދެއްކުމަށް ފަހު ލޯނު ނެގުމަށް ފަހު އެކި އިންވެސްޓްމަންޓުތައްކޮށް އެ ލާރިވެސް ފައިދާ ހޯދަ އެވެ.

"ކާލައިލް ގްރޫޕަކީ ވެސް އިންވެސްޓްމަންޓް ކުންފުންޏެއް ވީމާ އެ މީހުން ކުރި އިންވެސްޓްމަންޓުން ފައިދާ ވީމާ އެ މީހުން އެ ވިއްކާލަން ބޭނުންވާ މައިގަނޑު ސަބަބަކީ،" މައުލޫމާތު އެނގޭ ބޭފުޅަކު ވިދާޅުވި އެވެ.

ޓީއެމްއޭގެ ހިއްސާ 2013 ވަނަ އަހަރު އެމެރިކާގެ ވަލްޗާ ކެޕިޓަލް ފާމަކުން ގަތް ފަހުން ޓީއެމްއޭގެ ހިއްސާ އަންނަނީ އެ ގަންނަ ފަރާތަކުން ދޭތެރެއިން ވިއްކަމުންނެވެ. ބްލެކް ސްޓޯންއިން އެ ކުންފުނި ވިއްކާލީ ބެއިން ކެޕިޓަލް އަށެވެ. އެހެން ނަމަވެސް ކޮވިޑް ތެރޭ ދިމާވި ދަރަނީގެ މައްސަލަތަކާ ހުރެ ކާލައިލް ގުރޫޕަށް އެ އެއާލައިން ވިއްކާލަން އޭރު މަޖުބޫރުވީ އެވެ.

ޓީއެމްއޭ ވިއްކާލުމާ ގުޅޭ ގޮތުން އެ އެއާލައިންއާ ސުވާލުކުރުމުން އެ ކުންފުނީގެ ބަހެއް އަދި ނުލިބެ އެވެ.

މީގެ އިތުރުން، މި ފަހުން ޑޮލަރު މާރުކުރަން މަޖުބޫރުކޮށް ގެނައި ބަދަލުތަކުން އެ މީހުންނަށް ޓީއެމްއޭގެ އާމްދަނީ ރާއްޖެއިން ބޭރަށް ގެންދިޔުން ފަދަ ކަންކަމަށް އުނދަގޫ ވުމަކީ ވެސް ސަބަބަކަށް ވާނޭ ކަމަށް އޭނާ ވިދާޅުވި އެވެ. އަދި ސީޕްލޭން އޮޕަރޭޝަންތަކުގެ ވާދަވެރިކަން ބޮޑުވުމަކީ ވެސް ސަބަބަކަށް ވާނެ އެވެ. 

ވިލާ އެއާއިން ވެސް އެތެރޭގެ އުދުހުންތައް ކުޑަކޮށް ސީޕްލޭން އޮޕަރޭޝަންތައް މިއަހަރު ފަށަން އަންނަނީ ތައްޔާރުވަމުންނެވެ. އަދި ގައުމީ އެއާލައިން، މޯލްޑިވިއަން އާއި މަންޓާ އެއާއިން ވެސް ސީޕްލޭންގެ ހިދުމަތްދެ އެވެ.