ތާށިކަން ބޮޑުވެ ޑޮލަރުގެ އަގު 19ރ.އިން މައްޗަށް އަރައިފި

ޑޮލަރު ލިބުން ވަރަށް ބޮޑަށް ތާށިވެ، ކަޅު ބާޒާރުގައި ޑޮލަރެއްގެ އަގު 19ރ. ހުރަސްކޮށްފި އެވެ. 

ވީ ކިހިނެއް؟ - 'ދައުރު'އާ މިއަދު ވާހަކަދެއްކެވި ރާއްޖެއަށް މުދާ އެތެރެކުރާ ބޮޑު ކުންފުންޏެއްގެ ވެރިއަކު ވިދާޅުވި ގޮތުގައި ބާޒާރުން މިހާރު ޑޮލަރު ގަންނަން އެއްގޮތަކަށް ވެސް ނުލިބެ އެވެ. އަދި މިދިޔަ ހަފްތާއިން ފެށިގެން ބައެއް ފަހަރަށް 20ރ.އަށް ވެސް ޑޮލަރު ގަންނަން ޖެހޭ ކަމަށް އޭނާ ވިދާޅުވި އެވެ. 

"ބޭންކަކުން ލިބެނީއެއް ނޫން މިހާރު ޑޮލަރެއް ވެސް. އެހާ ތާށި ބޭރުން ހޯދަން ވެސް. އެހެންވީމާ ތަކެތީގެ އަގު ވެސް ބޮޑުވަމުން ދާނީ،" ނަން ނުޖަހާ ގޮތަށް ވާހަކަ ދައްކަވަމުން އޭނާ ވިދާޅުވި އެވެ. 

ތަފްސީލް - އޭނާ ވިދާޅުވި ގޮތުގައި، ޑޮލަރުގެ ތާށިކަމާ ހުރެ ބޭންކުތަކުން ވެސް ޓީޓީ ކުރާއިރު ދޭ ޑޮލަރުގެ އަދަދު ވެސް މިދިޔަ ހަފްތާއިން ފެށިގެން ދަށްކޮށްފައިވެ އެވެ. އެގޮތުން، މީގެ ކުރިން 100،000 ޑޮލަރުގެ ޓީޓީއެއް ހަދާއިރު 10،000 ޑޮލަރު ދޭއިރު، އެ އަދަދު 5،000 ޑޮލަރަށް މިހާރު ކުޑަކޮށްފައިވާ ކަމަށް އޭނާ ވިދާޅުވި އެވެ. 

"މި އަންނަ ޕޮލިސީތަކާ ހުރެ އިތުރަށް ތާށިކަން މި އަންނަނީ. ރަނގަޅުވާ ތަނެއް ޑޮލަރު އިތުރަށް ލިބޭ ތަނެއް ނުފެނޭ،" އޭނާ ވިދާޅުވި އެވެ. 

ކުރިއަށް އޮތީ ރޯދަ މަހަށް ވުމާއި ޑިސެމްބަރު އުމްރާ އާއި ޗުއްޓީއަށް ފުރާ މީހުން ގިނަވުމުން ޑޮލަރަށް އޮންނަ ޑިމާންޑް ކުރިއަށް މި އޮތް މަސްތަކުގައި އިތުރުވާނޭ ކަމަށް އޭނާ ލަފާކުރައްވަ އެވެ. އެހެންވުމުގެ ސަބަބުން ރޯދަ މަހަށް ވެސް ތަކެތީގެ އަގުތައް މައްޗަށް އަރާނޭ ކަމަށް އޭނާ ވިދާޅުވި އެވެ. 

"އަގު ހެވެއް ނުވާނެ ރޯދައަކަށް ވަކި މުދާ. އެއީ މިހާ އަގު ބޮޑުކޮށް ޑޮލަރު ލިބެންޏާ އަގުހެޔޮ ކުރެވޭކަމަށް ނުއެއް އޮންނާނެ،" އޭނާ ވިދާޅުވި އެވެ. 

ފާހަގަކޮށްލެވޭ - މާލޭގައި ބޭރު ފައިސާ ގަނެވިއްކާ ތަންތަނުން ވާހަކަ ދެއްކި ފަރާތްތަކުން ބުނި ގޮތުގައި، މިދިޔަ ހަފްތާ ނިމުނު އިރު ޑޮލަރު މިހާރު ވިއްކާ އަގު ވަނީ 19.5ރ.އަށް އަރައިފަ އެވެ. މީގެ ކުރިން އެ އަގު އުޅުނީ 18.40ރ. ހިސާބުގަ އެވެ.

އެ ތަންތަނުން ބުނީ:

އެނގުން މުހިންމު - ޑޮލަރު މާރުކުރަން މަޖުބޫރުކޮށް އެމްއެމްއޭއިން މިހާރު ނެރެފައިވާ ގަވައިދު އެގޮތަށް ދަމަހައްޓާ ނަމަ ޑޮލަރުގެ އަގު ފުރަތަމަ އަހަރު 19.50ރ.އަށް އަދި ދެ ވަނަ އަހަރު 21.7ރ.އަށް އަރާނޭ ކަމަށް ދިރާސާ ރިޕޯޓަކުން ވަނީ ހާމަވެފަ އެވެ. 

އެ ބަދަލު އަންނަނީ ރިސޯޓްތަކުން މުވައްޒަފުންނަށް ޑޮލަރުން މުސާރަ ދިނުން ހުއްޓާލުމާއި ދިވެހި ބައެއް ކުންފުނިތަކުގެ ބިލްތަކަށް ޑޮލަރުން ފައިސާ ދެއްކުން ހުއްޓާލުމުން އިގްތިސާދުގައި ދައުރުވާ ޑޮލަރު މަދުވާނެތީ އެވެ. 

ސަރުކާރާއި އެމްއެމްއޭއިން ބުނެފައި ވަނީ ރިސޯޓްތަކުން ދެކޮޅު ހެދި ނަމަވެސް ގަވައިދު ބަދަލު ނުކުރާނެ ކަމަށެވެ.