ހޯޑެއްދޫ ކައުންސިލުން އިންޓަގްރޭޓެޑް ރިސޯޓެއް ތަރައްގީކުރަން ހުޅުވާލައިފި

ގދ. ކަޑެވާރެހާގައި އިންޓަގްރޭޓެޑް ޓޫރިސްޓު ރިސޯޓެއް ތަރައްގީކޮށް ހިންގުމަށް ޝައުގުވެރިވާ ފަރާތްތަކަށް ބިޑު ހުށަހެޅުމުގެ ފުރުސަތު ހުޅުވާލައިފި އެވެ.

ވީ ކިހިނެއް؟ - ގދ. ހޯޑެއްދޫ ކައުންސިލުން ބަލަހައްޓާ އެ ރަށުގައި އިންޓަގްރޭޓެޑް ޓޫރިޒަމަށް ހާއްސަ ރިސޯޓެއް ތަރައްގީ ކުރަން ނިންމާ އެކަމާ ގުޅޭ ކޮންސެޕްޓް ވެސް އެ ކައުންސިލުން ވަނީ އާންމު ކޮށްފަ އެވެ.

ތަފްސީލް - ހޯޑެއްދޫ ކައުންސިލުން މިއަދު އާންމު ކުރި އިއުލާނުގައި ބުނީ ކަޑެވާރެހާ ގައި ޓޫރިސްޓު ރިސޯޓެއް ތަރައްގީކޮށް ހިންގުމަށް ޝައުގުވެރިވާ ރާއްޖެ އާއި ރާއްޖެ އިން ބޭރުގެ ފަރާތްތަކަށް ޝައުގުވެރިކަން ފާޅުކޮށް ބިޑު ހުށަހެޅުމުގެ ފުރުސަތު ހުޅުވާލާ ކަމަށެވެ.

އެ ކައުންސިލުން ބުނީ:

ހޯޑެއްދޫ ކައުންސިލުން ބުނީ ކަޑެވާރެހާ އަކީ ކަނޑުގެ ދިރުންތަކުން ވެސް މުއްސަނދި އަދި ރީތި ގޮނޑުދޮށެއް ވެސް އޮންނަ ރަށެއް ކަމަށާއި މި ރަށް ތަރައްގީ ކުރާނީ އިކޯ ޓޫރިޒަމަށް ވެސް ހާއްސަކޮށްގެން ކަމަށެވެ.

ކަޑެވާރެހާ އަކީ ކާޑެއްދޫ ޑޮމެސްތިކް އެއާޕޯޓުން ސްޕީޑު ލޯންޗުގައި 5 މިނެޓެއްހާ އިރުން ދެވޭ ސަރަހައްދެއްގައި އޮންނަ ރަށެކެވެ.

އެ ރަށުގައިި ބީޗުވިލާތަކާއި މޫދު ކޮޓަރިތައް ވެސް ތަރައްގީ ކުރަން ނިންމާފައިވާއިރު ފަތުރުވެރިން ގަޔާވާނެފަދަ އެންމެ ފުރިހަމަ ހިދުމަތްތައް ގާއިމް ކުރަން ވަނީ ނިންމައިފަ އެވެ.

އެ ކައުންސިލުން އާންމުކޮށްފައިވާ ކޮންސެޕްޓު ކަރުދާހުގައި ފާހަގަކޮށްފައިވާގޮތުން ކަޑެވާރެހާގައި 100 ވިލާ ތަރައްގީ ކުރާނެ އެވެ. އެ ސަރަހައްދުގެ އެހެން ރިސޯޓުތަކާ އެއް އަގެއްގައި ކޮޓަރި ވިއްކައިގެން %70 އޮކިޔުޕެންސީގައި އަހަރަކު 38 މިލިއަން ޑޮލަރު ލިބޭނެ އެވެ. ސާފު ފައިދާގެ ގޮތުގައި 19-22 މިލިއަން އާ ދެމެދުގެ އަދަދެއް %50-%40ގެ ޕްރޮފިޓް މާޖިންއެއް ލިބޭނެ ކަމަށް ވެސް ލަފާކޮށްފައިވެ އެވެ.