އެމްއައިޓީޑީސީން ހިންގަން ރޭވި ބަރެސްދޫ އިންޓަގްރޭޓެޑް ޓޫރިޒަމް މަޝްރޫއުގެ މޮޑެލްއެއް: އެ ކުންފުނިން އުވާލަން ވަނީ ނިންމާފައި
އުވާލާ އެމްއައިޓީޑީސީ އާއި އެގްރޯނެޓަށް 50 މިލިއަނަށް ވުރެ ގިނަ ރުފިޔާ ހަރަދުކޮށްފި
ސަރުކާރުން އުވާލަން ނިންމާފައިވާ ދެ ކުންފުނި ކަމަށްވާ މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އާއި އެގްރޯނެޓް ކޯޕަރޭޝަނަށް މި ސަރުކާރުން ކުރި ހަރަދު 50 މިލިއަން ރުފިޔާއަށް ވުރެ ގިނަކަން ހާމަވެއްޖެ އެވެ.
ވީ ކިހިނެއް؟ - 'ދައުރު'އިން އެދިގެން މާލީ ވުޒާރާއިން ފޯރުކޮށްދިން ތަފާސްހިސާބުތަކުން ދައްކާ ގޮތުގައި މި ސަރުކާރު ވެރިކަމާ ހަވާލުވިފަހުން ނޮވެމްބަރުން ޖޫން މަހާ ހަމައަށް:
-
އެމްއައިޓީޑީސީއަށް 9 މިލިއަން ރުފިޔާ ދޫކޮށްފައިވޭ
-
އެގްރޯނެޓަށް ކެޕިޓަލްގެ ގޮތުގައި 40 މިލިއަން ރުފިޔާ ދޫކޮށްފައިވޭ
-
އެއީ ޖުމްލަ 49 މިލިއަން ރުފިޔާއަށް ވުރެ ބޮޑު އަދަދެއް
ތަފްސީލް - ވަޒީރުންގެ މަޖިލީހުން ނިންމާފައި ވަނީ މި އަހަރު ނިމުމުގެ ކުރިން އެ ދެ ކުންފުނިން އުވާލުމުގެ މަސައްކަތް ނިންމުމަށެވެ. އެހެންކަމުން، އެ ކުންފުނި އުވާލުމާ ހަމައަށް 50 މިލިއަނަށް ވުރެ ގިނަ ރުފިޔާ ޖުމްލަ ކެޕިޓަލްގެ ގޮތުގައި އެ ކުންފުނިތަކަށް ހޭދަކުރަން ޖެހޭނެ ކަމަށް އަންދާޒާ ކުރެވެ އެވެ.
އެނގުން މުހިންމު - ވަޒީރުންގެ މަޖިލީހުން ނިންމާފައިވާ ގޮތުގައި އެމްއައިޓީޑީސީގެ މަސައްކަތްތައް ހަވާލުކުރާނީ ފަންޑް މެނޭޖްމަންޓް ކޯޕަރޭޝަންއާ އެވެ. އަދި އެގްރޯނެޓް އުވާލުމަށް ފަހު، އެ ކުންފުނީގެ މަސައްކަތްތައް ބަދަލު ކުރަން ނިންމީ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ކުންފުންޏަށެވެ.
ގުޅުންހުރި - މިފަހުން އެމްއައިޓީޑީސީން ވަނީ އެ ކުންފުނިން ލ. ބަރެސްދޫގައި ތަރައްގީ ކުރުމަށް މަސައްކަތްކުރި ޓޫރިޒަމް މަޝްރޫއަށް ފައިސާ ދައްކާފައިވާ ފަރާތްތަކުގެ ތެރެއިން ރިފަންޑު ބޭނުންވާ ފަރާތްތަކުން ސިވިލް ކޯޓަށް މައްސަލަ ހުށަހެޅުމަށް އެދިފަ އެވެ. ގާތްގަނޑަކަށް 45 މިލިއަން ރުފިޔާ އެ މަޝްރޫއަށް އެކި ފަރާތްތަކުން ދައްކާފައިވެ އެވެ.