މިފްކޯއަކީ ސަބްސިޑީ ނުދީ ހިންގާ ކުންފުންޏަކަށް 3 އަހަރު ތެރޭ ހަދާނަން: ޝިޔާމް

ކުރިއަށް އޮތް ތިން އަހަރުގެ ތެރޭގައި ސަރުކާރުގެ މަސް ކުންފުނި، މިފްކޯއަކީ ސަބްސިޑީ ނުދީ ހިންގާ ކުންފުންޏަކަށް ހައްދަވާނޭ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.

ވީ ކިހިނެއް؟ - މިއަދު މިނިސްޓަރު ޝިޔާމް މަޖިލީހަށް ހާޒިރުކޮށް މެންބަރުން ވަނީ މިފްކޯއަށް ކިރާ މަހަށް މަސްވެރިންނަށް ފައިސާ ނުދެވި ގިނަ ދުވަސްވާ މައްސަލައިގައި ސުވާލުތައް މިނިސްޓަރަށް އަމާޒުކުރައްވައިފަ އެވެ. އެގޮތުން ބައެއް މެންބަރުންގެ ސުވާލަކަށްވީ:

ބުނީ ކީކޭ؟ - އެ ސުވާލުތަކާ ގުޅިގެން މިނިސްޓަރު ވިދާޅުވީ ކޮންމެ ގައުމެއްގައި ވެސް މުހިންމު ސިނާއަތްތައް ކުރިއެރުވުމަށް އެ ވިޔަފާރީގައި ސަރުކާރުން ހަރަކާތްތެރިވެ ސަބްސިޑީ ދީ ހަދާ ކަމަށެވެ. އެހެން ނަމަވެސް ރާއްޖޭގައި މައި އެއް ސިނާއަތް ކަމަށްވާ، މަސްވެރިކަމަށް ސަބްސިޑީ ނުދީ ހިންގޭނެ މޮޑެލްއެއް އެބަ އޮތް ކަމަށް ޝިޔާމް ވިދާޅުވި އެވެ. އޭނާ ގަބޫލު ކުރައްވާ ގޮތުގައި އެ ގޮތަކީ: 

"އަޅުގަނޑުމެން މި ސަރުކާރުން މިފްކޯ ބްލީޑްވާން ދުލެއް ނުކުރާނަން. ބަދަލުތައް ގެންނާނަން. މަސްވެރިން އެދެނީ އެތަނުގައި މި ހުރި ބޮޑެތި ހަރަދުތައް ކުޑަކޮށްފައި އެމީހުން ކުރާ މަސައްކަތަށް އާމްދަނީ ލިބޭނެ ތަނަކަށް ހަދަން. އަމާޒު މި ހުރީ ކުރިއަށް އޮތް ތިން އަހަރު ތެރޭ މިފްކޯއަކީ ސަރުކާރުން ސަބްސިޑީ ނުދީ ހިންގާ ތަނަކަށް ހެދުން. އެ ބަދަލު އަޅުގަނޑުމެން ގެންނާނަން،" ޝިޔާމް ވިދާޅުވި އެވެ. 

ތަފްސީލް - އޭނާ ވިދާޅުވީ ކުރީ ސަރުކާރުން މަހުގެ އަގު 25ރ. އަށް ބޮޑުކުރުމުން މިފްކޯއިން މަސް ގަންނަމުން ދިޔައީ ވަރަށް ބޮޑު ގެއްލުމުގައި ކަމަށެވެ. އަދި އެކަމުގެ ސަބަބުން މިފްކޯގެ ހާލަތު ދަށްވުމުން އެ އަގު 20ރ. އަށް މި ސަރުކާރުން މިހާރު ކުޑަކޮށްފައިވާކަން ފާހަގަ ކުރައްވައި ޝިޔާމް ވިދާޅުވީ، އެ އަގުގައި މަސް ގަނެގެން ވެސް ކިލޯއަކުން 6ރ. މިފްކޯއަށް ގެއްލުންވާ ކަމަށެވެ. 

އެހެން ނަމަވެސް މަސް ގަންނަ އަގު ދެން ކުޑަނުކުރާނެ ކަމުގެ ޔަގީންކަން އޭނާ ދެއްވި އެވެ.

"މިހާރު އަގު އެހެރެވަރުން އަޅުގަނޑުމެންނަށް މެނޭޖް ކުރެވޭނެ. ރައީސް މުއިއްޒުގެ ވައުދާ އެއްގޮތަށް 20ރ.އަށް ވުރެ މަސް ކިރުވާ އަގު ކުޑައެއް ނުކުރާނަން. މި އަގުގައި ހިފަހައްޓައިގެން އަޅުގަނޑުމެން ދާނީ،" ޝިޔާމް ވިދާޅުވި އެވެ. 

އޭނާ ވިދާޅުވީ މި ސަރުކާރު ވެރިކަމާ ހަވާލުވީ ފަހުން އާމްދަނީގެ ގޮތުގައި މިފްކޯއަށް ލިބުނީ 395 މިލިއަން ރުފިޔާ ކަމަށެވެ. ނަމަވެސް މި ސަރުކާރުން މަސްވެރިންނަށް 435 މިލިއަން ރުފިޔާ ދެވިއްޖެ ކަމަށް ޝިޔާމް ވިދާޅުވި އެވެ. އޭނާ ވިދާޅުވި ގޮތުގައި: 

މިނިސްޓަރު ޔަގީންކަން ދެއްވި ގޮތުގައި މިފްކޯގެ ހިންގުމަށް ގެންނަ ބަދަލުތަކާ އެކު  ސަރުކާރުން ފައިސާ ނުދީ މިފްކޯއަށް ލިބޭ އާމްދަނީއަކުން މިފްކޯ ހިންގޭނެ އެވެ. އަދި އެކަމަށް ޓަކައި މިފްކޯގެ މަސް ޕްރޮސެސިން ކެޕޭސިޓީ އިތުރުކުރުން ފަދަ ފިޔަވަޅުތައް އަޅުއްވާނެ ކަމަށް ވިދާޅުވި އެވެ.