ފެނަކަ ކޯޕަރޭޝަނުން މިއަދު ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ މެނޭޖިން ޑިރެކްޓަރު އަހްމަދު ސައީދު. (ދައުރު ފޮޓޯ/ހުސެން ސުނޭން)
ތުހުމަތުތައް ދޮގުކުރައްވައި ސައީދު ވިދާޅުވީ އިންތިގާލީ އޮފީހަކީ ސަރުކާރު ހިންގާ ތަނެއް ނޫން ކަމަށް
އިންތިގާލީ އޮފީހަކީ ސަރުކާރު ހިންގާ ތަނެއް ނޫން ކަމަށް ވިދާޅުވެ، އެ އޮފީހުން ފެނަކަ ކޯޕަރޭޝަނާ ބެހޭ ގޮތުން ހިއްސާކުރި މައުލޫމާތުތައް އެ ކުންފުނީގެ މެނޭޖިން ޑިރެކްޓަރު އަހްމަދު ސައީދު މިއަދު ދޮގުކުރައްވައިފި އެވެ.
ވީ ކިިހިނެއް؟ - އިންތިގާލީ އޮފީހުން މިދިޔަ ހަފްތާގެ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ފެނަކައިިން އެ އޮފީހާ ހިއްސާކުރި މާލީ ހިސާބުތަކަށް ރިއާޔަތްކޮށް ބައެއް މައުލޫމާތު ވަނީ ހިއްސާކޮށްފަ އެވެ.
އިތުރަށް ކިޔާލަން:
ބުނީ ކީކޭ؟ - ފެނަކައިގެ ދަރަންޏާއި ގިނަ އަދަދެއްގެ މުވައްޒަފުން އެ ކުންފުންނަށް ނެގި ކަމަށް އިންތިގާލީ އޮފީހުން ބުނެފައި ވާއިރު، ފެނަކައިން މިއަދު ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭ ގޮތުން ސުވާލުކުރުމުން އެ ތުހުމަތުތައް ދޮގުކުރައްވައި ސައީދު ވަނީ އިންތިގާލީ އޮފީހުގެ މަސްއޫލިއްޔަތުތައް ހަނދާން ކޮށްދެއްވާފަ އެވެ.
"އިންތިހާބީ ރައީސްގެ އޮފީހަކީ ސަރުކާރު ހިންގާ އޮފީހެއް ނޫން. އެއީ އަލަށް އިންތިހާބުވެވަޑައިގެންނެވި ރައީސުލްޖުމްހޫރިއްޔާއަށް އިންސްޓިޓިއުޓްތަކާ ބެހޭ ސައްހަ މައުލޫމާތު ފޯރުކޮށްދިނުމަށްޓަކައި ގާއިމުކޮށްފައި ހުންނަ އަދި މަސައްކަތް ކުރާ އޮފީހެއް،" ސައީދު ވިދާޅުވި އެވެ.
'މުވައްޒަފުން އިތުރުވާނެ؛ މިއީ ކަތީބު އިންޖީނުގެ ހިންގި ޒަމާނެއް ނޫން'
އިންތިގާލީ އޮފީހުން ބުނެފައިވާ ގޮތުގައި:
-
2018 ވަނަ އަހަރު ނިމުނު އިރު ކުންފުނީގައި ތިބީ 2،756 މުވައްޒަފުން
-
މިހާރު އެ ކުންފުނީގައި 8،126 މުވައްޒަފުން އެބަތިބި
-
މިއީ 5،370 މުވައްޒަފުން އިތުރު އަދަދެއް
ސައީދު ވިދާޅުވި ގޮތުގައި، އެ ކުންފުނިން ހިންގި ފެނާއި ނަރުދަމާގެ ގިނަ މަޝްރޫއުތައް ނިމެމުން އައީ މިދިޔަ އަހަރުގެ މެދުތެރެއިންނާއި މި އަހަރުގެ ކުރީކޮޅުގަ އެވެ. މަޝްރޫއުތައް ނިމުމާ އެކު، އަލަށް އިތުރުވާ ހިދުމަތް ދިނުމަށްޓަކައި އިތުރަށް މުވައްޒަފުން ނަގަން ޖެހޭކަން ފާހަގަކުރައްވައި ސައީދު ވިދާޅުވީ "މިއީ ކަތީބު އުނދޯލީގައި އިނދެ އިންޖީނުގެ ބަލަހައްޓާ" ޒަމާން ނޫން ކަމަށެވެ.
"އެހެންވީމަ ގާނޫނު ލާޒިމުކުރާ ގޮތުން ވެސް އަދި ހިދުމަތް ފޯރުކޮށްދިނުމަށް ވެސް ނަގަން ޖެހޭ މުވައްޒަފުން އެ މުއްދަތުގައި ނަގާނެ. އެއީ އެއްވެސް ހާލެއްގައި އެއީ ސިޔާސީ ބޭނުމަކަށް ނަގާފައި ތިބި މުވައްޒަފުންނެއް ނޫން. އިއްތިފާގަކަށް ވެދާނެ،" ސައީދު ވިދާޅުވި އެވެ.
"ކުރީގައި ރަށު މެދު ތެރޭގައި ހުންނަ ކަތީބު އުނދޯލީގައި އިނދެގެން އިންޖީނުގެ ބެލި ނިޒާމު ފާއިތުވެ ގޮސްފި. އޭރު ކަތީބުގެ އަނބިކަނބަލުންނާއި ގޭގައި އުޅޭ ކުއްޖަކާ އިންޖީނުގެ ބެލެހެއްޓީ. އެހެން ނަމަވެސްމ މިއަދު ރަށް ބޭރަށް އިންޖީނުގެ ބަދަލު ކުރީމަ، ޓެކްނިކަލް ކަމެއް ވީމަ، ޑިއުޓީއަށް އެ ތަނުގައި މުވައްޒަފުން ތިބެން ޖެހޭ، ފެނާއި ނަރުދަމާ ބަލަހައްޓަން މުވައްޒަފުން ތިބެން ޖެހޭ. އައިސް ޕްލާންޓުގެ ޑިއުޓީގައި 24 ގަޑިއިރު ހިދުމަތް ދޭ ނަމަ ތިބެެން ޖެހޭނެ."
މީގެ އިތުރުން، ފެނަކައިން ހިދުމަތް ހޯދުމަށް ފަހު އަމިއްލަ ކުންފުނިތަކަށް ފައިސާ ނުދޭ ކަމަށް އިންތިގާލީ އޮފީހުން ބުނާ ވާހަކަތައް ވެސް ސައީދު ވަނީ ދޮގުކުރައްވާފަ އެވެ.
ނަމަވެސް، ފެނަކައިން ދައްކަން ހުރި ފައިސާ ނުދައްކާ ކަމަށް ބުނެ ބައެއް ކުންފުނިތަކުގެ ވެރިން މީގެ ކުރިން ނޫސްވެރިންގެ ބައްދަލުވުމެއް ބާއްވައި ފެނަކައިގެ ކުރިމަތީގައި އިހުތިޖާޖު ވެސްކޮށްފައި އެބަހުއްޓެވެ.
ކޮމެންޓް (4)
ހައްވަ
އައިޖޭ
ސަނައްޓޭ
ސައަީދު