ގާސިމް އިބްރާހިމްގެ ހަޔާތްޕުޅުން ފެންނާނީ ހިތްވަރު ދޫނުކޮށް މަސައްކަތްކޮށްފި ނަމަ ކާމިޔާބުވާނެކަމުގެ ހެކިތަކެވެ. ކުޑަ ގޮތަކަށް ފެށި ވިޔަފާރި، ރާއްޖޭގެ އެންމެ މައި އެއް ކުންފުންޏަށް ބަދަލުކުރެއްވި ގޮތެވެ. ގައުމުގެ ކަންކަން ރަނގަޅަށް ގެންދިއުމުގެ މަގުސަދުގައި ހިންގެވި ހަރަކާތްތަކުގައި ޖަލަށް ވަޑައިގަންނަވަން ޖެހުނަސް، ހެޔޮ ކަމަށް ގަބޫލުކުރެއްވި ކުރެއްވުމެވެ.

އދ. މާމިގިއްޔަށް ނިސްބަތްވެވަޑައިގަންނަވާ ގާސިމް މާލެ ވަޑައިގަތީ ކިޔަވާ ވިދާޅުވާށެވެ. ނަމަވެސް އެކަން ދިޔައީ އޭނާ އުއްމީދުކުރެއްވި ގޮތަކަށް ނޫނެވެ. ވަކި ހިސާބަކުން ކިޔެވުން ދޫކުރައްވައި، މަސައްކަތުގެ ދާއިރާއަށް ނުކުމެވަޑައިގަތެވެ.

ސަރުކާރުގެ ވަޒީފާތަކުން އަމިއްލަ ވިޔަފާރިއަށެވެ. އިމްޕޯޓް މުދާ ވިއްކުމުގެ ތެރެއިން ތެލުގެ ވިޔަފާރިއަށެވެ. އޭގެ ފަހުން ކުންފުނި ބޮޑުކޮށް، ޓޫރިޒަމްގެ ދާއިރާއަށެވެ.

ސިޔާސީ ދާއިރާއަކީ ގާސިމްގެ ހާއްސަ ލޯތްބެކެވެ. އެ ލޯބީގައި އޭނާގެ އެތައް ދުވަހެއް ޖަލުގައި އޮންނެވި އެވެ. ގޭބަންދުގައި ހުންނެވި އެވެ. އަރުވާލެވިގެން ޖަރުމަނަށް ވަޑައިގަތެވެ.

މިހާތަނަށް ގާސިމްއަށް ހާސިލްނުކުރެއްވުނު ހުވަފެނަކީ ރާއްޖޭގެ ރިޔާސީ އިންތިހާބު ކާމިޔާބު ކުރައްވައި، ގައުމުގެ އެންމެ މަތީ ވެރިޔާގެ މަގާމަށް ވަޑައިގަތުމެވެ. އެ ހުވަފެން ހަގީގަތަކަށް ހެއްދެވުމަށް މިއީ އޭނާގެ ތިން ވަނަ ރިޔާސީ އިންތިހާބެވެ.