ޑިންގީ ބަންޑުން ޖަހާލާފައި އޮތް ތަނުގައި، ދޯންޏަކުން، ޑިންގީގައި ތިބި މީހުން މިއަދު ސަލާމަތްކުރަނީ: އޭގައި ދެ ކުޑަކުދިންނާއި ދެ ފިރިހެނުން ތިބި. (ފޮޓޯ/އެމްއެންޑީއެފް)
ދެ ކުޑަކުއްޖަކު ތިބި ޑިންގީއެއް ބަންޑުން ޖަހާލައިފި
މޫސުން ގޯސްވެ ކަނޑުގަދަވެފައި އޮއްވާ ހދ. އަތޮޅުގައި މަހަށް ނުކުމެ އުޅުނު ޑިންގީއެއް މިއަދު ބަންޑުން ޖަހާލައިފި އެވެ. އެ ޑިންގީގައި ކުޑަ ދެ ކުއްޖަކާއި ދެ ފިރިހެނަކު ތިއްބެވެ. ނަމަވެސް އެހެން އުޅަނދަކުން ވަނީ އެ މީހުން ސަލާމަތްކޮށްފަ އެވެ.
ވީ ކިހިނެއް؟ - އެ ހާދިސާ ހިނގީ ހދ. ނޮޅިވަރަމާއި ހދ. ނޮޅިވަރަންފަރާ ދޭތެރޭ މަހަށް ނުކުމެ އުޅެނިކޮށް ވިލާގަނޑެއްގައި ޖެހި، ރާޅަކާ އެކު ޑިންގީ ބަންޑުން ޖަހާލައިގެން ކަމަށް އެމްއެންޑީއެފް އިން ބުންޏެވެ.
އެމްއެންޑީއެފް އިން ބުނީ ޑިންގީއެއް ބަންޑުން ޖަހާލި ހާދިސާއެއްގެ ރިޕޯޓު ލިބިގެން އެމްއެންޑީއެފް ނޮދަން އޭރިއާ އިން އެހީތެރިކަން ފޯރުކޮށްދީފައިވާ ކަމަށެވެ.
ތަފްސީލް - ހާދިސާ ހިނގައިގެން އުޅޭކަން އެމްއެންޑީއެފް ނޮދަން އޭރިއާއަށް އެނގުނީ، ހދ. ކުޅުދުއްފުށީގައި އޮންނަ އެމްއެންޑީއެފްގެ ހާބާ ކްރާފްޓް ލޯންޗުގެ އިންޖީނެއް އޯވަހޯލްކުރުމަށް ފަހު ދުއްވަން ނުކުމެ އުޅެނިކޮށް މިއަދު 3:40 ހާއިރު ކަމަށް އެމްއެންޑީއެފް އިން ބުންޏެވެ.
ސިފައިންގެ ލޯންޗަށް ފެނުނީ ޑިންގީ ބަންޑުން ޖަހާލައިގެން ކަނޑުވެފައި ތިބި މީހުން، އެ ސަރަހައްދުން ދަތުރުކުރި 'މެރީނާ' ނަމަކަށް ކިޔާ ދޯންޏަކަށް ނަގައިގެން އުޅެނިކޮށް ކަމަށް ވެސް އެމްއެންޑީއެފް އިން ބުންޏެވެ.
-
އެމްއެންޑީއެފް ނޮދަން އޭރިއާގެ ސިފައިން ވަނީ ބަންޑުން ޖަހާލި ޑިންގީގައި ތިބި ދެ ކުދިން ނޮޅިވަރަމަށް ގެންގޮސްދީފައި
-
ސިފައިން އެނބުރި ޑިންގީ އޮތް ސަރަހަށްދަށް ގޮސް ޑިންގީ ވަނީ އުއްޑުން ޖަހާފައި
-
އެމްއެންޑީއެފް ގަލްފް ކްރާފްޓް ލޯންޗުގައި ޑިންގީ ކަފުޖަހައިގެން ޑިންގީ ވަނީ ނޮޅިވަރަމަށް މިއަދު 5:15 ހާއިރު ގެންގޮސްދީފައި
މި ހާދިސާގައި އެއްވެސް މީހަކަށް ގެއްލުމެއް ނުލިބޭ ކަމަށް އެމްއެންޑީއެފް އިން ބުންޏެވެ.
އެނގުން މުހިއްމު - ކުރިއަށް އޮތް ތިން ދުވަހު ވެސް ރާއްޖެއަށް މޫސުން ގޯސްވެ ކަނޑުތައް ގަދަވާނެ ކަމަށް ލަފާކުރެވޭތީ، ކަނޑުދަތުރު ކުރުމުގައި މޫސުމަށް ސަމާލުވުމަށް މޫސުމާ ބެހޭ ގައުމީ އިދާރާއިންނާއި އެމްއެންޑީއެފް އިން ވަނީ އިލްތިމާސް ކޮށްފަ އެވެ. އަދި ކުދި އަދި ސަލާމަތީގޮތުން ރައްކާތެރިކަން ކުޑަ އުޅަނދުފަހަރުގައި ރޭގަނޑު، އަދި ވިއްސާރައިރު ދަތުރު ނުކުރުމަށް އެމްއެންޑީއެފް އިން އިއްޔެ ވަނީ އިލްތިމާސް ކޮށްފަ އެވެ.
މޫސުމާ ބެހޭ އިދާރާ އިން މިއަދު ވަނީ ހއ. އަތޮޅުން ފެށިގެން ތ. އަތޮޅަށް 'ހުދު ސަމާލު' ނެރެފަ އެވެ. އަދި ނ. އަތޮޅުން ފެށިގެން ދ. އަތޮޅަށް 'ރީނދޫ ސަމާލު' ނެރެފަ އެވެ. ކަނޑު ދަތުރުކުރާ އުޅަނދުފަހަރުގެ ސަލާމަތޭ ބެހޭ ގަވައިދަށް މި މަހު ގެނައި ބަދަލުތަކާ އެކު، ރީނދޫ، އޮރެންޖު އަދި ރަތް ސަމާލު ނެރެފައިވާ ސަރަހައްދުތަކުގައި 9 މީޓަރުން ދަށުގެ އުޅަނދުފަހަރުގައި ފަސިންޖަރުން އުފުލުމަކީ މަނާ ކަމެކެވެ.