ތިން ދުވަހުގެ ތެރޭ 315 ކިލޯ ޑްރަގް؛ 'ބޮޑުން' ދޫވެފައި

ފުލުހުން މިދިޔަ ބުދަދުވަހު ފެށި ހާއްސަ ބޮޑު އޮޕަރޭޝަނެއްގައި، ކޯސްޓް ގާޑުގެ ވެސް އެހީތެރިކަމާ އެކު، ކަނޑު މަގުން ފާރަލައިގެން މިވަނީ ރެކޯޑު އަދަދެއްގެ މަސްތުވާތަކެތި އަތުލައިގެންފަ އެވެ. ދެ ބުރެއްގެ މަތިން އަތުލައިގަތް މަސްތުވާތަކެތީގެ ބަރުދަން 315 ކިލޯއަށް އަރަ އެވެ. 

އިއްޔެ ރ. އަތޮޅުގެ ފަޅުރަށަކުން ހޯދައިގަތް 215 ކިލޯގެ މަސްތުވާތަކެއްޗަކީ، ފުލުހުންގެ އޮޕަރޭޝަނެއްގައި މިހާތަނަށް އަތުލައިގަތް އެންމެ ގިނަ މިންވަރެވެ. މިދިއަ ބުރާސްފަތިދުވަހު 100 ކިލޯގެ މަސްތުވާތަކެތި، އދ. އަތޮޅުގެ ފަޅުރަށަކުން ފުލުހުން ހޯދި އެވެ.

މި ދެ އަދަދު އެއްކޮށްލައި، މަގުމަތީގެ އަގަށް ބިނާކޮށް ބަލާ ނަމަ އެއީ ގާތްގަނޑަކަށް 378 މިލިއަން ރުފިޔާގެ އަގުހުރި މަސްތުވާތަކެއްޗެވެ.

ފުލުހުން ހިންގަމުން އެ އަންނަނީ އޭގެ ޒާތުގައި ވެސް ވަރަށް ބޮޑު އޮޕަރޭޝަނެކެވެ. އެހެންކަމުން ޕޮލިސް ކޮމިޝަނަރު މުހައްމަދު ހަމީދު ކުރެއްވި ދެ ޓްވީޓެއް ފިޔަވައި، މި މައްސަލައިގެ އެއްވެސް ތަފުސީލެއް ފުލުހުން ހާމަކޮށްފައެއް ނުވެ އެވެ. މައްސަލައިގެ ސީރިއަސް ކަމުންނާއި، ހައްޔަރުކޮށްފައިވާ ނެޓްވޯކުތަކުގެ ބޮޑުކަމުން ފުލުހުން ވަނީ އެމީހުންގެ ބަންދު އަޑުއެހުންތައް ވެސް ސިއްރުކުރަން ކްރިމިނަލް ކޯޓުގައި އެދިފަ އެވެ.

ފުލުހުން މިދިޔަ ބުރާސްފަތި ދުވަހު އެންމެ ފުރަތަމަ އަތުލައިގަތީ 100 ކިލޯގެ މަސްތުވާތަކެއްޗެވެ. ރާއްޖެއަށް މަސްތުވާތަކެތި އެތެރެކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނުގައި މާލެ އާއި ހުޅުމާލޭގެ ބައެއް ސަރަހައްދުތަކާއި ބައެއް ފަޅުރަށްތައް ވެސް ބަލައި ފާސްކުރި އެވެ. އެ އޮޕަރޭޝަންގައި 100 ކިލޯއަށް ވުރެ ގިނަ ހެރޮއިން ހޯދީ އދ. އަތޮޅުގެ ފަޅުރަށަކުންނެވެ. 

އެ މައްސަލައިގައި ދިވެހިންނާއި ބިދޭސީން ހިމެނޭ ގޮތަށް 10 މީހަކު ހައްޔަރުކުރި ނަމަވެސް، ދެ މީހަކު ވަނީ ކޯޓުން ދޫކޮށްލައިފަ އެވެ. އެކަމަކު އެ ނިންމުން ހައި ކޯޓުގައި އިސްތިއުނާފްކުރާނެ ކަމަށް ފުލުހުން ބުނެ އެވެ.

ބުދަދުވަހު ފެށި ދެވަނަ އޮޕަރޭޝަންގައި ދެން އަތުލައިގަތީ 215 ކިލޯގެ ހެރޮއިން އެވެ. މިއީ ޑްރަގް އޮޕަރޭޝަނެއްގައި މިހާތަނަށް ރާއްޖެއިން އެންމެ ގިނައިން އަތުލައިގެން މިންވަރުކަމަށް ވެ އެވެ. މިފަހަރު ޑްރަގް ހޯދީ ރ. މަޑުއްވަރީ ކައިރީގައި އޮންނަ ފަޅުރަށަކުންނެވެ. 

މަޑުއްވަރީ ކައިރިން ފެނުނު މަސްތުވާތަކެތީގެ މައްސަލާގައި ތުހުމަތުކުރެވޭ ދެ މީހަކު ވަނީ ހައްޔަރުކޮށްފަ އެވެ. 'ދައުރު'އަށް ކަށަވަރުވެފައިވާ ގޮތުގައި ހައްޔަރުކުރީ މަޑުއްވަރީ ދެ މީހެކެވެ. އެ ދެ މީހުން ހައްޔަރުކުރީ އެ ރަށު ފަޅުތެރެއިން، ލޯންޗެއްގައި ތިއްބަ އެވެ.

މަޑުއްވަރީން ވާހަކަ ދެއްކި މީހަކު، ނަން ނުޖަހަން ޝަރުތުކޮށް، ބުނީ އެރަށުގައި މަސްތުވާތަކެތީގެ މައްސަލަ ވަރަށް ބޮޑުވެފައިވާ ކަމަށެވެ. ވަރަށް ފުޅާކޮށް އޮޕަރޭޓް ކުރާ ޑްރަގް ނެޓްވޯކެއް އެ ރަށުގައި ހިންގާކަމުގެ ތުހުމަތު އަބަދުވެސް ކުރެވެ އެވެ. ނަމަވެސް އެކަން އޮތީ ހައްލުނުކުރެވުނު ބޮޑު މައްސަލައެއްގެ ގޮތުގަ އެވެ. މިފަހަރު ފުލުހުން ހައްޔަރުކުރި މީހުންގެ ތެރޭގައި އެ ރަށުގެ ޑްރަގް ނެޓްވޯކުގެ ލީޑަރަކު ހިމެނޭކަން ވަނީ ކަށަވަރުވެފަ އެވެ.

ރެކޯޑު އަދަދަކަށް ޑްރަގް އަތުލައިގެން އޮޕަރޭޝަންގައި ފުލުހުން ހައްޔަރުކުރި 12 މީހުންގެ ތެރެއިން ދެ މީހަކު ކޯޓުން މިހާރު ވެސް ވަނީ ދޫކޮށްލައިފަ އެވެ. ކްރިމިނަލް ކޯޓުން ދޫކޮށްލީ މި މައްސަލައިގައި އެންމެ އިސްކޮށް އުޅުނު ކަމަށް ފުލުހުން ތުހުމަތުކުރާ ދެ މީހުންނެވެ.

ޑްރަގް ނެޓްވޯކެއް ކަމަށް ފުލުހުން ތުހުމަތުކުރާ އިސް ބަޔަކު މި ފަހުން ވެސް ވަނީ ކްރިމިނަލް ކޯޓުގެ ޝަރީއަތެއްގައި ދޫވެފަ އެވެ. ކުށް ސާބިތުނުވާ ކަމަށް ކަނޑައަޅައި ހަ މީހުން ސަލާމަތްވި އިރު، ދެ މީހެއްގެ މައްޗަށް ކުށް ސާބިތުވި އެވެ.

މި މައްސަލަ ނިސްބަތްވާ ނެޓްވޯކާ ގުޅުން ހުރި މާލޭގެ ގެތަކެއް ބަލައި މަސްތުވާތަކެއްޗާއި، އެ ތަކެތި ޕެކްކުރަން ބޭނުންކުރާ ސާމާނާއި 4.6 މިލިއަން ރުފިޔާ ވެސް ފުލުހުން ހޯދި އެވެ. 

ފުލުހުން ބުނީ އެމީހުން ދިރިއުޅޭ ތަންތަނުން ފެނުނު ޑްރަގު ޕެކްކޮށްފައި ހުރީ އެއްގޮތަކަށް ކަމަށެވެ. ނަމަވެސް އެ އެއްގޮތްކަން ޝަރީއަތަށް ފާހަގައެއް ނުކުރެވުނެވެ. ނެޓްވޯކުގެ އިސް ލީޑަރު ކަމަށް ފުލުހުން ތުހުމަތުކުރާ މީހާގެ ވޮލެޓުން 29،000 އަށް ވުރެ ގިނަ ރުފިޔާ، މޭޒެއްގެ މަތިން 50،000ރ.، ކަބަޑެއްގެ ވަތްގަނޑުން 88،000ރ. ފުލުހުން ހޯދި އެވެ. ފުލުހުން ތުހުމަތުކުރީ އެއީ ޑްރަގް ވިޔަފާރިން ހޯދި ފައިސާ ކަމަށެވެ. ނަމަވެސް އެއީ ހުއިފިލަނޑާގެ ވިޔަފާރިން ހޯދި ފައިސާ ކަމަށް އޭނާ ބުނުމާއި އޭނާއާ އެއްކޮޅަށް ދެ މީހަކު ހެކިބަސް ދިނުމުން، ޝަރީއަތުން ނިންމީ އޭނާގެ ކޮޅަށެވެ.

އޭގެ އިތުރުން މިދިޔަ މާޗު މަހު ހޯދި 70 ކިލޯގެ މަސްތުވާތަކެއްޗާ ގުޅޭ މައްސަލައެއްގައި ހައްޔަރުކުރި ޑްރަގް ނެޓްވޯކެއްގެ ބޮޑެއް ކަމަށް ފުލުހުން ތުހުމަތުކުރި މީހަކު ވެސް ކްރިމިނަލް ކޯޓުން ދޫކޮށްލި އެވެ.