ބްރޯޑްކޮމްގެ ގަވާއިދު ވީ ސަޕްރައިޒަކަށް؛ އެފަދަ އިސްލާހެއް ގެންނަ ކަމެއް ނޭނގޭ: ދިރާގު

ރީބްރޯޑްކާސްޓް ކުރުން ނުވަތަ ކޭބަލް ޓީވީގެ ހިދުމަތް ދިނުން ހުއްޓާލަން ޖެހޭނެ ފަދަ އުސޫލެއް ބްރޯޑްކާސްޓިން ކޮމިޝަން (ބްރޯޑްކޮމް) އިން ގެނެސްފާނެ ކަމަށް ހިތަށް ވެސް ގެނެވިފައި ނުވާ ކަމަށާއި ހިޔާލު ހޯދަން ފޮނުވި އާ ގަވައިދުގައި ވެސް އެފަދަ އިސްލާހެއް ނެތް ކަމަށް ދިރާގުން މިއަދު ބުނެފި އެވެ.

މައްސަލައިގެ ފެށުން - ރީބްރޯޑްކާސްޓިންގެ އާ ގަވައިދެއް މިދިޔަ ޖެނުއަރީ މަހު ބްރޯޑްކޮމް އިން ގެޒެޓްކުރިއިރު އެ ގަވާއިދުގައިވާ ގޮތުން ކޭބަލް ޓީވީގެ ހިދުމަތް ދެވޭނީ %100 ދިވެހި ހިއްސާދާރުން ތިބި ކުންފުނިތަކަށް އެކަންޏެވެ. އެކަމާ ގުޅިގެން ދިރާގުން ދެމުން އަންނަ ކޭބަލް ޓީވީގެ ހިދުމަތް 'ދިރާގު ޓީވީ'ގެ ލައިސަންސް އަންނަ ޖެނުއަރީ މަހު ހަމަވުމާ އެކު އެ ހިދުމަތް ހުއްޓާލަން ޖެހޭނެ ކަމަށް ދިރާގުން ވަނީ މިހާރު ބުނެފަ އެވެ.

ވީ ކިހިނެއް؟ - ބްރޯޑްކޮމް އިން ވަކި ވިޔަފާރިއަކަށް މަންފާ ލިބޭ ގޮތަށް އަދި ވާދަވެރިކަން ނެތިގެން ދާ ގޮތަށް ރީބްރޯޑްކާސްޓިން ގަވައިދެއް ހަދާފައިވާ ކަމަށް ބުނެ ހުށަހަޅާފައިވާ މައްސަލައެއް ގަވައިދު ކޮމިޓީން ބަލަމުން އަންނަ އިރު މިއަދު ވަނީ އެ މައްސަލައިގައި ދިރާގުގެ އިސްވެރިން ކޮމިޓީއަށް ހާޒިރުކޮށްފަ އެވެ.

ބުނީ ކީކޭ؟ - އެ ކޮމިޓީގައި މެންބަރުން ކުރި ސުވާލުތަކާ ގުޅިގެން ދިރާގުގެ ސީއީއޯ އަދި މެނޭޖިން ޑިރެކްޓަރު އިސްމާއިލް ރަޝީދު ވިދާޅުވީ ދިރާގު ޓީވީގެ ހިދުމަތް ތައާރަފް ކުރަން އެ ކުންފުނިން ބޮޑު އިންވެސްޓްމަންޓެއް ކޮށްފައިވާ ކަމަށާއި އެ ހިދުމަތް ހުއްޓާލަން ޖެހިއްޖެ ނަމަ އެ ކުންފުންޏަށް އެއީ ބޮޑު ގެއްލުމަކަށް ވާނޭ ކަމަށެވެ. އެގޮތުން އޭނާ ފާހަގަކުރެއްވި ކަންތައްތަކަކީ:

"އަޅުގަނޑުމެން ހިތަށް ވެސް ނާރާ މިކަހަލަ ބޮޑު ބަދަލެއް އަންނާނެ ކަމަކަށް. ވަރަށް ބޮޑު ދެރައެއް އިވެސްޓްމަންޓެއްކޮށްފައި އޮތް ކަމެއް މި ގޮތަށް ހުއްޓާލަން ޖެހޭ ޖެހުމަކީ. އަނެއްކާ މިއީ އެހާ ބޮޑު މާޖިންއެއް ނޯންނަ ކަމަކަށް ވާއިރު މިގޮތަށް އަންނަ ބަދަލުތަކުން ވަރަށް ބޮޑެތި އަސަރުތައް މި ވިޔަފާރިއަށް ކުރާނެ،" އިސްމާއިލް ރަޝީދު ވިދާޅުވި އެވެ.

އެ ބައްދަލުވުމުގައި ބައިވެރިވި ދިރާގުގެ ލީގަލް އަދި ބޯޑް ޑިރެކްޓަރު ހަޒްރަތު ރަޝީދު ހުސެއިން ވިދާޅުވީ ރީބްރޯޑްކާސްޓިންގެ އާ ގަވާއިދަށް ބްރޯޑްކޮމް އިން ބަދަލު ގެންނަން ވެގެން ޑްރާފްޓްތަކެއް ހިޔާލަށް ފޮނުވި ކަމަށެވެ. ނަމަވެސް އޭގެ އެއްވެސް ޑްރާފްޓެއްގައި ދިރާގަށް އެ ވިޔަފާރި މަނާކުރާ ފަދަ މާއްދާއެއް ނެތް ކަމަށް އޭނާ ވިދާޅުވި އެވެ. އަދި އެފަދަ މާއްދާއެއް އޮތްކަން އެނގުނީ ގަވާއިދު ގެޒެޓްކޮށް އަމަލުކުރަން ފެށުމުންކަން ދިރާގުން ފާހަގަކުރި އެވެ.

ދިރާގުގެ ވިސްނުން ހާމަކުރައްވަމުން ހަޒްރަތު ވިދާޅުވީ ރީބްރޯޑްކާސްޓް ކުރުމަކީ ދިވެހިންނަށް އެކަނި ހަނިކޮށްފައި އޮންނަ ދާއިރާއެއްކަން ބްރޯޑްކާސްޓިން ގާނޫނުގައި ބުނެފައި ނުވާ ކަމަށެވެ. އެހެން ވީއިރު އެ ގާނޫނުގެ ދަށުން ހަދާ ގަވާއިދަކުން ބޭރުގެ ފަރާތްތަކެއް ހިއްސާވާ ކުންފުނިތަކަށް ރީބްރޯޑްކާސްޓް ނުކުރެވޭނެ ގޮތަށް ގަވައިދެއް ނުހެދޭނެ ކަމަށް އޭނާ ވިދާޅުވި އެވެ.

"އެ ގާނޫނުގައި ހަމައެކަނި ބުނަނީ ބްރޯޑްކޮމް އިން އުސޫލުތަކެއް ހަދަން ޖެހޭ ވާހަަކަ. އެކަމަކު އެ އުސޫލުތަކުން ވަކި ބަޔަކަށް ވިޔަފާރި ނުކުރެވޭނެ ގޮތަށް ހަދަން ޖެހޭނެ ކަމަކަށް ނުބުނޭ. އެހެން ވީއިރު ގާނޫނުގައި ނެތް ކަމެއް ގަވާއިދަކުން ނުއެއް ގެނެވޭނެ. އެ ގޮތަށް އެކަން ނުކުރެވޭނެ ކަމަށް އަޅުގަނޑުމެން ދެކެނީ،" ހަޒްރަތު ވިދާޅުވި އެވެ.

ގަވައިދު މިހާރު އޮތް ގޮތުން ދިރާގަށް އެ ހިދުމަތް ދެވޭނޭ އެއްވެސް މަގެއް ނެތީތޯ މެންބަރުން ސުވާލު ކުރެއްވުމުން ހަޒްރަތު ވިދާޅުވީ:

"އެހެންވީމާ ގަވާއިދު ބަދަލުނުކުރަންޏާ އަޅުގަނޑުމެން ޖެހޭނީ މި ހިދުމަތް ހުއްޓާލަން. އެ ހިދުމަތް ދިނުމުގެ ލައިސަންސް ނުއެއް ލިބޭނެ،" ހަޒްރަތު ވިދާޅުވި އެވެ.

ސީއީއޯ އިސްމާއިލް ރަޝީދު ވިދާޅުވި ގޮތުގައި، ދިރާގު ޓީވީގެ ހިދުމަތް ރަށްރަށަށް ފުޅާކުރަމުން އަންނަ އިރު ވެސް އެ ރަށެއްގައި ދިރާގާ ގުޅިގެން އެކަން ކުރަން ޝައުގުވެރިވާ ވިޔަފާރިއެއް ހުރި ނަމަ އެ ފަރާތަށް އެ ފުރުސަތު ދޭ ކަމަށެވެ. އެގޮތުން، ރަށުގައި ރަނގަޅު ނެޓްވޯކެއް އޮންނަ އަދި އާ ނެޓްވޯކެއް އަޅައިގެން ހިދުމަތް ދޭން ބޭނުންވާ ނަމަ، ދިރާގާ ގުޅިގެން އެކަން ކުރުމުގެ ފުރުސަތު އޮންނަ ކަމަށް އޭނާ ވިދާޅުވި އެވެ.

"އަޅުގަނޑުމެން އެންޝުއާ ކުރަނީ ގޭގެއާ ހަމައަށް އެ ކޮލިޓީގައި ހިދުމަތް ދެވޭނެ ބައެއްތޯ. އެކަން ކުރެވެންޏާ އަޅުގަނޑުމެން ޕާޓްނާ ވެގެން ހިދުމަތް ދެނީ. އެ އޮޕްޝަން އޮވޭ އަބަދު ވެސް،" އިސްމާއިލް ވިދާޅުވި އެވެ.

ނަމަވެސް އާ ބައެއް ވިޔަފާރިއަށް އައުމުން އެ ވިޔަފާރި ޒަމާނުއްސުރެ ކުރަމުން އަންނަ ބައެއް ފަރާތްތަކަށް ދަތިވުން އެކަށީގެންވާ ކަމަށް ގަބޫލުކުރައްވާ ކަމަށް އިސްމާއިލް ރަޝީދު ވިދާޅުވި އެވެ. އަދި އެއީ ވާދަވެރި ވިޔަފާރީގެ މާހައުލުގައި ވާނެ ގޮތްކަން ވެސް އޭނާ ފާހަގަކުރެއްވި އެވެ. ނަމަވެސް، ވާދަވެރިކަން ނެތިއްޖެ ނަމަ އާންމު މީހާއަށް އަގުތައް ބޮޑުވާނެކަން އޭނާ ފާހަގަކުރެއްވި އެވެ.

"އާންމު އުސޫލުން ހަމަ އިތުރު ވާދަވެރިން ނެތިއްޔާ މި ހިދުމަތުގައި ވެސް އަގުތައް ބޮޑުވުމުގެ ފުރުސަތު އޮންނާނީ،" އިސްމާއިލް ވިދާޅުވި އެވެ.

ހިދުމަތް ދިނުމުގައި ދިރާގަށް އެންމެ ދަތިވާ އެއް ކަމަކީ ބައެއް ޗެނަލްތައް ބޭރުން ހޯދުން ކަމަށް އޭނާ ވިދާޅުވި އެވެ. އެގޮތަށް ވަނީ ރާއްޖޭގެ ބައެއް ފަރާތްތަކުން އެކްސްކުލޫސިވްކޮށް އެ ޗެނަލްތައް ރާއްޖެއަށް ނަގާފައިވާތީ ކަމަށް އިސްމާއިލް ރަޝީދު ފާހަގަކުރެއްވި އެވެ.

ނަމަވެސް، ދިރާގު ޓީވީގެ ހިދުމަތް ފަށައި އެ ހުރަސްތަކުގެ ވަރަށް ބޮޑު ބައި ގިރާކުރެވިފައިވާ ކަމަށް އޭނާ ވިދާޅުވި އެވެ. އެހެންވެ، މިދިޔަ ފަސް އަަހަރުގެ ތެރޭގައި އާންމުންގެ މެދުގައި ދިރާގު ޓީވީ ދިޔައީ ވަރަށް ބޮޑަށް މަގުބޫލުވަމުންކަން ވެސް އޭނާ ފާހަގަ ކުރެއްވި އެވެ.

"މިކަން އައުމާ ހަމައަށް ވެސް އަޅުގަނޑުމެން އައީ ޗެނަލްތައް ވެސް އިތުރުކުރަމުން. މިފަހުން އަޅުގަނޑުމެން އެއިނީ ހަމަ އެކްސްކުލޫސިވްކޮށް އިން ބީބީސީ ވެސް އިތުރުކޮށްފައި،" އިސްމާއިލް ރަޝީދު ވިދާޅުވި އެވެ.

ދިރާގުން މިއަދު ކޮމިޓީގައި ފާހަގަކުރި ގޮތުގައި، ދިރާގު ޓީވީއަށް ދިވެހި ޗެނަލްތައް ވެސް ލައި ދެނީ މަހު ފީއެއް ނުނަގާ ހިލެ އެވެ. ދިވެހި ޗެނަލްތަކުން ކުރަން ޖެހޭނެ ހަމައެކަނި ހަރަދަކީ ދިރާގު ޓީވީއާ ހަމައަށް ސިގްނަލް ގެންނަން އެއް ފަހަރު ކުރަން ޖެހޭ ހަރަދެއް ކަމަށް އެ ކުންފުނިން ފާހަގަކުރި އެވެ. އަދި އެ ކުންފުނިން އާންމުންނާއި ވިޔަފާރިތަކަށް ވިއްކާ ޕެކޭޖްތަކަށް ވެސް ވިއްކަނީ ބްރޯޑްކޮމްއަށް ހުށަހަޅައި ހުއްދަ ހޯދައިގެން ކަމަށް ވެސް އެ ކުންފުނިން ބުންޏެވެ.

އެނގުން މުހިންމު - ދިރާގުން އާންމު ގޭބިސީތަކަށް ވިއްކާ ޕެކޭތްތަކުގެ އަގު އުޅޭނީ 150-450ރ. ދެމެދުގަ އެވެ.