ޔާމީންގެ އިސްތިއުނާފް މައްސަލައިގެ ހުކުމް އިއްވުން

ކޯޓުގައި މިހާރު ހުރި މައްސަލަތަކާ މެދު ކަންބޮޑުވުމެއް ނެތް ކަމަށް ޖަމީލް ވިދާޅުވި. މި ސަރުކާރުން މިހާރު ކުރާ އެންމެ ހުތުރު ކަމަކީ ކޯޓުތަކަށް އަތްބާނައިގެން ކަންތައްތައް ކުރުން ކަމަށް އޭނާ ވިދާޅުވި. އަދި ރައީސް އިބްރާހިމް މުހައްމަދު ސޯލިހު ލަދުގަންނަން ޖެހޭނެ ކަމަށް ވެސް ޖަމީލް ވިދާޅުވި. ދަށު ކޯޓުގައި މައްސަލައިގެ ތެރެއަށް ނުފޫޒު ފޯރުވައި ސަރުކާރުން އަތް ބާނާފައިވާ ކަމަށް ވެސް އޭނާ ވިދާޅުވި.

ޔާމީންގެ ވަކީލުންގެ ފަރާތުން މިއަދު ޕީޕީއެމްގެ އޮފީހުގައި ބާއްވަމުން އަންނަ ނޫސްވެރިންގެ ބައްދަލުވުމުގައި ގާނޫނީ ވަކީލް ޑރ. މުހައްމަދު ޖަމީލް އަހުމަދު ވިދާޅުވީ މިއަދު އެނގިގެން މި ދިޔައީ ރައީސް އަބްދުﷲ ޔާމީންގެ މައުސޫމުކަން ކަމަށެވެ. އަދި ދައުލަތުން ވަނީ ގަސްތުގައި ކޯޓުގައި އޮޅުވާލާ މުޅި މަނީ ލޯންޑަރިން ގާނޫނުގެ މަފުހޫމްތައް އޮޅުވާލާފައި ކަމަށް ވެސް ޖަމީލް ވިދާޅުވި އެވެ. އަދި ފައިސާގެ ޓުރޭސް އޮޅުވާލާފައި ނުވާއިރު އަދި އެކައުންޓުގައި އެ ފައިސާ ހުރެ ދައުލަތުން ރައީސް ޔާމީންގެ މައްޗަށް މަނީ ލޯންޑުރިންގެ ދައުވާ އުފުލީ ކަމަށް ވެސް ޖަމީލް ވިދާޅުވި އެެވެ.

ޕީޕީއެމް އޮފީހާއި ޔާމީންގެ ގޭގެ ކައިރީގައި ތިބި ސަޕޯޓަރުން އަންނަނީ އެ މަނިކުފާނަށް މަރުހަބާ ކިއުމަށް ތައްޔާރުވަމުން.

ހުކުމަށްފަހު ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ މިއީ ހައްގަށް ލިބުނު ނަސްރެއް ކަމަށާއި މިއީ ހަޔާތުގައި އައި އެންމެ އުފާވެރި ދުވަސްކަމަށް. ރައީސް ޔާމީން ދެއްކެވި ވާހަކަތަކުގެ ތެދުކަން ހާމަވާ ކަމަށް ވިދާޅުވި

އަހުރެން ހައިރާންވީ އެސްއޯއެފް އަކީ އެމްއެމްޕީއާރްސީގެ މައްސަލައިގައި މަނީ ލޯންޑަކުރަން ބޭނުންކުރި އެންމެ ވަރުހުރި އާލާތް ކަމަށް ދައުލަތުން ތަކުރާރުކޮށް ބުނުމަށްފަހު އެކުންފުނީގެ އިސް ފަރާތްތަކަށް ދައުވާނުކުރަން ނިންމާފައިވާ ވާހަކަ ބުނުމުން ކަމަށް މަހާޒުގެ ރައުޔުގައި ވިދާޅުވި

ޔާމީނާ ދެކޮޅަށް ބޭނުންކުރި އަހްމަދު އަދީބާއި އަބްދުﷲ ޒިޔަތުގެ ހެކިބަހަށް، އެހެން ހެކިތަކުން ބާރު ލިބޭ ކަމަށް ހައި ކޯޓުން ނިންމާފައިވާ ނިންމުމަކީ ގާނޫނާ އެއްގޮތަށް ނިންމާފައިވާ ނިންމުމެއް ކަމަށް ފަނޑިޔާރު މަހާޒު ގަބޫލެއް ނުކުރައްވާ. އެއީ އެ ދެ މީހުންގެ ހެކި ބަހާ އެހެން ހެކިތައް ގުޅޭ ގޮތާއި ސަބަބު ސާފުކޮށް ބަޔާންކޮށްފައި ނުވާތީ.

ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ވޮޑަމުލާގެ އެކިއުޒިޝަން ކޮސްޓުގެ ގޮތުގައި ދައުލަތަށް ލިބެން ޖެހޭ ފައިސާކަމާ މެދު ވަނީ ޝައްކު އުފެދިފައި ކަމަށް މަހާޒުގެ ރައުޔުގައި ވިދާޅުވި. އެގޮތަށް ވިދާޅުވީ ޗެކް ނަންބަރާއި ބޭންކް ސްޓޭޓްމަންޓްގައި އޮތް ނަންބަރާ ދިމާނުވާތީ ކަމަށް.

މަނީ ލޯންޑަރިންގައި ޕްރެޑިކޭޓް އޮފެންސް ނުވަތަ ގުޅިފައިވާ ކުށް ސާބިތުކޮށްދޭން ޖެހޭ ކަމަށް ޔާމީން ތަކުރާރުކޮށް ވިދާޅުވި ނަމަވެސް ފަނޑިޔާރު މަހާޒް ވިދާޅުވީ އެކަމަށް އެއްބަސްވެވަޑައިނުގަންނަވާ ކަމަށް.

ޔާމީންގެ މައްޗަށް އިއްވާފައިވާ ހުކުމުގައި ޖޫރިމަނާގެ އަދަދު މަތިކޮށްފައި ވަނީ ރަނގަޅަށް ނޫން ކަމަށް ފަނޑިޔާރު މަހާޒު ދެކެވަޑައިގަންނަވާ. ޖަލު ހުކުމް ކުޑަކޮށްފައި ޖޫރިމަނާ ބޮޑު ކުރި ކުރުން ބަލައި ނުގަނެވޭ ކަމަށް ފަނޑިޔާރު ވިދާޅުވި. ރިޔާސަތުގައި އިންނެވި ފަނޑިޔާރު ވިދާޅުވީ ދެ އަދަބު ކަނޑައަޅަން ޖެހޭނީ ހަމަހަމަ އުސޫލަކުން ކަމަށް.

ރާއްޖޭގައި ކުރާ ހުރިހާ ކަމެއްގައި އަގު އަދާކުރަންޖެހޭނީ ދިވެހި ފައިސާ އިން ކަމަށް މަނިޓަރީ ގަވާއިދުގައި ބުނާތީ، ފަސް މިލިއަން ޑޮލަރުން ޖޫރިމަނާކުރުން ގާނޫނާ ހިލާފު ކަމަށް ޔާމީންގެ ފަރާތުން ބުނި ނަމަވެސް ފަނޑިޔާރު މަހާޒް ވިދާޅުވީ އެ މާއްދާގައި ކޯޓުތަކުން ކުރާ ޖޫރިމަނާ ހިމެނިފައި ނުވާ ކަމަށް. އަދި ކުށުގެ އަމަލު ހިންގުމުގެ ފައިސާއިން ޖޫރިމަނާކުރުމުގެ އިހްތިޔާރު ފަނޑިޔާރަށް ލިބިގެންވާކަމަށާއި  އެހެންކަމުން ހައި ކޯޓުގެ ނިންމުން ގޯސް ކަމަށް ނުބެލެވޭނެ ކަމަށް ވިދާޅުވި

މިހާތަނަށް ފަނޑިޔާރު މަހާޒު ވާހަކަދެއްކެވި 13 އިސްތިއުނާފީ ނުކުތާވެސް ނިންމާފައި ވަނީ ޔާމީނާ ދެކޮޅަށް

ކްރިމިނަލް ކޯޓުން ގާޒީންގެ މަޖިލިސް އެކުލަވާލީ ގާނޫނާ އެއްގޮތަށް ކަމަށް ހައި ކޯޓުން ނިންމި ނިންމުމަށް ފަނޑިޔާރު މަހާޒު ވަނީ ތާއީދުކުރައްވާފައި

ރައީސް ޔާމީންގެ ފަރާތުން އިސްތިއުނާފު ކުރި 22 ނުކުތާގެ ތެރެއިން އިޖުރާއީ އަދި އިބުތިދާއީ ކަންކަމާ ގުޅޭ ހަތް ނުކުތާއެއް އިސްތިއުނާފުކޮށްފައިވޭ. އޭގެ ތެރެއިން ބައެއް މުހިންމު ނުކުތާތަކާ މެދު ސުޕްރީމް ކޯޓުން ނިންމި ނިންމުންތަކަކީ:

ޕީޕީއެމް/ޕީއެންސީ ކޯލިޝަންގެ އިސް ބޭފުޅުން ޔާމީންގެ ޝަރީއަތް ބައްލަވަމުން ގެންދަވަނީ ޕީޕީއެމް އޮފީހުގައި. އެގޮތުން ކުރީގެ ރައީސް މުހައްމަދު ވަހީދާއި ރިޔާސީ އިންތިހާބުގައި ޔާމީންގެ ރަނިން މޭޓަކަށް ހުންނެވި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި މާލޭގެ މޭޔަރު ޑރ. މުހައްމަދު މުއިއްޒު އާއި ޕީއެންސީގެ ރައީސް އަބްދުއްރަހީމް އަބްދުﷲ އާއި ކުރީގެ އެކޮނޮމިކް މިނިސްޓަރު އަދި މިހާރު މާވަށު ދާއިރާގެ މެމްބަރު މުހައްމަދު ސައީދާއި ކުރީގެ ޑިފެންސް މިނިސްޓަރު އަދި މިހާރު މަޑުއްވަރީ ދާއިރާގެ މަޖިލިސް މެމްބަރު އާދަމް ޝަރީފް ހިމެނޭ.

ފަނޑިޔާރު މަހާޒު ވިދާޅުވީ ހައި ކޯޓުގެ ހުކުމަކީ މިހާތަނަށް އެންމެ ދިގު ހުކުމް ކަމަށް. ނަމަވެސް ހުކުމުގައި ހުރީ ޝަރީއަތުގައި ހުށައެޅި ކަންކަން 'ވިއްސާލި ވިހާލިވެފައި' ކަމަށް ވިދާޅުވި. އޭގެ ސަބަބުން ކޯޓާއި މައްސަލަ ހުށައެޅި ފަރާތުގެ ވަގުތުތައް ބޭކާރުވެފައި ހުރެދާނެ ކަމަށް. މިހާރު ކުރިއަށް ދަނީ މަހާޒުގެ ރައުޔު އިއްވުން

ޔާމީންގެ ޝަރީއަތުގައި ތިން ފަނޑިޔާރުންގެ ގޮތުގައި ތިއްބެވީ ފަނޑިޔާރު މަހާޒު އަލީ ޒާހިރު، ފަނޑިޔާރު އަޒުމިރާލްދާ ޒާހިރު އަދި ފަނޑިޔާރު މުހައްމަދު އިބްރާހިމް. ރިޔާސަތުގައި އިންނެވީ ފަނޑިޔާރު މަހާޒު. ހުކުމް އިއްވުމުގެ މަޖިލިހުގައި މިހާރު ވަނީ ކްރިމިނަލް ކޯޓާއި ހައި ކޯޓުގެ ހުކުމުގެ ހުލާސާއެއް އިއްވަވާފައި. މިހާރު ކުރިއަށް ދަނީ ސުޕްރީމް ކޯޓުގައި ބޭއްވި އަޑުއެހުންތަކުގެ ކުރު ހުލާސާއެއް ދެއްވަމުން. ހުކުމް އަންނާނީ އޭގެ ފަހުން

ޕީޕީއެމް ކޯލިޝަންގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުﷲ އަކީ ވަރަށް ރީތިކޮށް ޅެން ހައްދަވާ ބޭފުޅެއް. ޔާމީންގެ މައްޗަށް ސުޕްރީމް ކޯޓުން ހުކުމް އިއްވަން މިހާރު ކުރިއަށްދާ މަޖިލިސްއާ ގުޅިގެން އޭނާ ވަނީ 'ހައްގަށް ނަސްރު ދެއްވުން އެދި' ދެ ޅެންބައިތުން ދުއާ ދަންނަވާފައި.

ރައީސްކަމުން ވަކިވެވަޑައިގަތުމަށް ފަހު 7 ޑިސެމްބަރު 1978 އިން ފެށިގެން އަވަހާރަވުމާ ހަމައަށް ނާސިރު ދިރިއުޅުއްވީ ސިންގަޕޫރުގައި. އަދި އެ މަނިކުފާނަށް 1990 ގައި އޭރުގެ ރައީސް މައުމޫން އަބްދުލްގައްޔޫމް މައާފު ދެއްވި. މި މައާފު އައީ ރާއްޖޭގެ މިނިވަންކަމުގެ ރިހި ޔޫބީލް ފާހަގަކުރުމުގެ ރަސްމީ ޖަލްސާގައި. ރައީސް ނާސިރަކީ، އިނގިރޭސިންގެ އަތުން ރާއްޖެއަށް މިނިވަންކަން ހޯއްދަވާދެއްވި ގައުމީ ބަތަލް.

ސުޕްރީމް ކޯޓުގައި އަސްލު މިހާރު ހިނގަމުން އެ ދަނީ އޭގެ ޒާތުގައި ވަރަށް ބޮޑު ޝަރީއަތެއް. މިއީ ރާއްޖޭގެ ވެރިކަން ކުރެއްވި ބޭފުޅަކާ މެދު ހިޔާނާތުގެ ނުވަތަ ދައުލަތުގެ ފައިސާގައި އެއްވެސް ވަރަކަށް ޖެހުނުކަމުގެ ތުހުމަތުގައި ކުރާ ދެ ވަނަ ޝަރީއަތް. މީގެ ކުރިން މިފަދަ ޝަރީއަތެއް ހިންގާފައި ވަނީ ކުރީގެ ރައީސް އިބްރާހިމް ނާސިރާ ދެކޮޅަށް. އަދި ސަރުކާރަށް ހިނާޔާތްތެރިވެވަޑައިގެންފައިވާކަން ސާބިތުވެ، 30 ޖެނުއަރީ 1986 ގައި އެ މަނިކުފާނުގެ ޣައިރު ހާޒިރުގައި ހުކުމްކުރީ 25 އަހަރަށް އަރުވާލަން.

ޝަރީއަތުގެ މަޖިލިސް ފަށަން މިހާރު ވަނީ ތައްޔާރުވެފައި. ސުޕްރީމް ކޯޓުގެ ޔޫޓިއުބް ޗެނަލް މެދުވެރިކޮށް ލައިވްކުރަން ވަނީ ފަށާފައި.