ޕްރައިމަރީން ބަލިވެއްޖެ ނަމަ ރައީސް ސޯލިހާ އެކު ނުހުންނާނަން: ނަޝީދު

އެމްޑީޕީގެ ރިޔާސީ ޕްރައިމަރީން ބަލިވެއްޖެ ނަމަ، އަނެއްކޮޅުން ވާދަކުރައްވާ ކެންޑިޑޭޓު ރައީސް އިބްރާހިމް މުހައްމަދު ސޯލިހާ އެކު ނުހުންނަވާނެ ކަމަށް، އެ ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ވީ ކިހިނެއް؟ - ނަޝީދު އެ ގޮތަށް ވިދާޅުވާ ވީޑިއޯއެއް މިއަދު ސޯޝަލް މީޑިއާގައި ވަނީ އާންމުވެފަ އެވެ. އެ ވީޑިއޯގައި ފެންނަނީ، ނަޝީދު ޕްރައިމަރީ ކެމްޕޭނަށް ރަށަކަށް ވަޑައިގެން، ސަޕޯޓަރުންނާ މުހާތަބުކުރައްވާ މަންޒަރެވެ.

ބުނީ ކީކޭ؟ - އެ ވީޑިއޯގައި އާންމު މީހަކު ނަޝީދާ ސުވާލުކުރަނީ، ޕްރައިމަރީން ބަލިވެއްޖެ ނަމަ އެމަނިކުފާނު ދެން ހުންނަވާނީ ރައީސް ސޯލިހާއެކުތޯ ނުވަތަ ޕީޕީއެމްއާއެކުތޯ އެވެ. ޖަވާބުގައި ނަޝީދު ވިދާޅުވަނީ، ބަލިވެއްޖެ ނަމަ އެއްވެސް ބަޔަކަށް ތާއީދު ނުކުރައްވާނެ ކަމަށާއި ދެން ހުންނަވާނީ ގޭގައި ކަމަށެވެ.

"ޕީޕީއެމްއާއެކީ ނުހުންނާނަން. އެއީ 100އިން 100ގެ ކަމެއް، ޕީޕީއެމްއާ އެކު ނުހުންނާނަން،" ނަޝީދު ވިދާޅުވި އެވެ.

"އެކަމަކު އިބްރާހިމް މުހައްމަދު ސޯލިހާ އެކު ނުހުންނާނަން. އަހަރެން އެކަނި ގޮސް ގޭގައި ހުރީމަ ނިމުނީނު؟"

ތަފްސީލު - އެގޮތަށް ނިންމަވާ ސަބަބުތައް ވެސް ނަޝީދު އޮޅުންފިލުވައިދެއްވަ އެވެ. މައިގަނޑު ސަބަބަކީ، ނަޝީދު ވިދާޅުވި ގޮތުން ނަމަ، ޕްރައިމަރީއާ ދިމާކޮށް އެމަނިކުފާނަށް ތާއީދުކުރައްވާ 39،000 މެމްބަރުން ޕާޓީގެ ދަފްތަރުން އުނިކުރުމެވެ.

"39،000 މީހުން [އެމްޑީޕީއިން] ކަނޑައިލީ، އަހަރެންނަށް ވޯޓު ދީފާނެތީ. ކަނޑާލި މީހުންގެ ތެރެއިން މަގޭ ބޭބެވެސް ކަނޑާލި، މަގޭ މަންމަވެސް ކަނޑާލި، ލައިލާވެސް ކަނޑާލި،" ނަޝީދު ވިދާޅުވި އެވެ.

މިސާލެއްގެ ގޮތުގައި ބޭބެ ނަންގަވައި ނަޝީދު ވިދާޅުވީ މި ދަނޑިވަޅުގައި ޕާޓީން ވަކިކުރުމުން އެ ބުނެވެނީ "އިބޫ ބުންޏޭ ކަލޭ ބޭނުމެއް ނެތޭ މިހާރަކު، އެހެންވީމަ ކަނޑާލީއޭ." ކަމަށެވެ.

"ދެން ފަހުން، މަ ގޮސް ބޭބެ ކައިރި ބުނަންވީ، މިހާރު އަހަރުމެން ކަލޭ ވަރަށް ބޭނުމޭ އެހެންވީމަ އަންނާށޭ. ނާންނާނެ އޭގެ 70،000 މީހުން،" ނަޝީދު ވިދާޅުވި އެވެ.

ޕްރައިމަރީއާ ދިމާކޮށް ޕާޓީގެ ދަފްތަރުން 39،000 މީހުން ވަކިކުރިކަމަށް ނަޝީދު ތަކުރާރުކޮށް ވިދާޅުވަމުންގެންދަވާއިރު، ވަކިކުރި މެމްބަރުންނާ ގުޅުންހުރި މީހުންނާ އެކު އެމްޑީޕީއަށް 70،000 އެއްހާ ވޯޓު ގެއްލޭނެކަމަށް ނަޝީދު ލަފާކުރައްވަ އެވެ.

ފަސްމަންޒަރު - އެމްޑީޕީގެ ދަފްތަރުން ބައެއް މީހުން އުނިވީ، އެ ޕާޓީގެ ދަފްތަރު އިލެކްޝަންސް ކޮމިޝަންގެ ދަފްތަރާ އެއްގޮތްކުރުމުންނެވެ. އެމްޑީޕީގެ ދަފްތަރު ސާފުކުރުމަކީ، އެ ޕާޓީގެ ޗެއާޕާސަންގެ މަގާމަށް ފައްޔާޒު އިސްމާއިލް ކެމްޕެއިން ކުރެއްވިރު، ވެވަޑައިގަތް ވައުދެކެވެ. އަދި ފައްޔާޒު މަގާމާ ހަވާލުވުމަށް ފަހު، މިިދިޔަ މެއި މަހު ބޭއްވި އެމްޑީޕީގެ ގައުމީ މަޖިލީހުގެ ޖަލްސާއަށް ހުށަހަޅައިގެން، އެ މަޖިލީހުން ފާސްކޮށްގެން އެކަން އެގޮތަށް ވަނީ ނިންމާފަ އެވެ. 

އޭރު އެމްޑީޕީގެ ލީޑަޝިޕުން ބުނަމުން ދިޔައީ، އެ ޕާޓީގެ ދަފުތަރު އިލެކްޝަންސްގެ ދަފުތަރާ އެއްގޮތް ކުރަަން ޖެހޭ ސަބަބަކީ، އެ ޕާޓީގައި އޭރު ތިބި 93،000 މީހުންގެ ތެރެއިން ވަރަށް ގިނަ ބަޔަކީ އެހެން ޕާޓީތަކުގައި ވެސް ތިބި މީހުން ކަމަށާއި ދަފުތަރު އިލެކްޝަންސްގެ ދަފުތަރާ އެއްގޮތް ނުކޮށް އޮންނަ އިރު އެ ޕާޓީގެ އެތެރޭގެ އިންތިހާބުތަކަށް އެހެން ޕާޓީތަކުން ނުފޫޒު ފޯރުވުމުގެ ފުރުސަތު އޮތަތީ، އެ ދޮރު ބަންދު ކުރުމުގެ ގޮތުން ކަމަށެވެ.

އިލެކްޝަސް ކޮމިޝަންގެ ދަފްތަރާ އެއްގޮތް ކުރުމުން، ބައެއް މީހުން ވަނީ ޕާޓީން އުނިވެފަ އެވެ. އެގޮތުން:

އޭރު ގައުމީ މަޖިލީހުން އެ ނިންމުން ނިންމުމާއެކު، އަލުން ޕާޓީއަށް ސޮއި ކުރުމަށް ތިން މަސް ދުވަހުގެ މުއްދަތެއް ވެސް ދިނެވެ. އަދި މިދިޔަ ސެޕްޓެމްބަރު މަހު ބޭއްވި އެޕާޓީގެ ކޮންގްރެސް ވެސް ބާއްވާފައިވަނީ އިލެކްޝަންސް ކޮމިޝަންގެ ދަފްތަރަށް ބަލައިގެންނެވެ.

އިތުރަށް ކިޔާލަން -