ހަނިމާދޫ ދާއިރާގެ މެމްބަރު އަބްދުލް ގަފޫރު މޫސާ، ރައީސް އިބްރާހީމް މުހައްމަދު ސޯލިހު، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް.
މެންބަރުންގެ އަދަދު ހިފަހައްޓާ އިސްލާހަށް ރައީސާއި ނަޝީދު ތާއީދު ކުރިޔަސް އެމްޑީޕީގައި ހިޔާލު ދެކަފިވެފައި
ރައްޔިތުންގެ މަޖިލީހުގެ މެންބަރުންގެ އަދަދު ވަކި ވަރެއްގައި ހިފެހެއްޓުމަށް ހުށަހަޅާފައިވާ އިސްލާހަށް ރައީސް އިބްރާހީމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ތާއީދު ކުރެއްވި ނަމަވެސް، އެ އިސްލާހާ މެދު އެމްޑީޕީގެ މަޖިލިސް މެމްބަރުންގެ މެދުގައި ހިޔާލު ތަފާތުވުންތަކެއް އޮތްކަން މިއަދު ހާމަވެއްޖެ އެވެ.
ވީ ކިހިނެއް؟ - މަޖިލީހުގެ މިއަދުގެ ޖަލްސާގައި ބަހުސް ކުރީ، މެންބަރުންގެ އަދަދު 87ގައި ހިފެހެއްޓުމަށް ގާނޫނުއަސާސީއަށް އިސްލާހު ގެނައުމުގެ ބިލަށެވެ. އެ އިސްލާހު ހުށަހެޅުއްވީ ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ (ޖޭޕީ)ގެ ލީޑަރު، މާމިގިލީ ދާއިރާގެ މެމްބަރު ގާސިމް އިބްރާހިމް އެވެ.
އެނގުން މުހިއްމު - ގާސިމް ހުށަހެޅުއްވި މި ބިލަށް އެމްޑިޕީގެ ރައީސްކަން ވެސް ކުރައްވާ ނަޝީދު ތާއީދު ކުރައްވާފައި ވާއިރު، އެ ޕާޓީގެ އިސް ލީޑަރުކަން ކުރައްވާ ރައީސް ސޯލިހު ވެސް އެ ބިލަށް ތާއީދުކުރައްވާކަން ރައީސް އޮފީހުން ވަނީ މިދިޔަ ހަފްތާފައި ހާމަކޮށްފަ އެވެ.
-
އިތުރަށް ކިޔާލަން - މަޖިލީހުގެ މެންބަރުންގެ އަދަދު ވަކި ވަރެއްގައި ހިފަހައްޓަން ރައީސްގެ ތާއީދު
ތަފްސީލް - މިއަދުގެ ބަހުސްގައި ބައިވެރިވެވަޑައިގެންނެވި މެމްބަރުން ދެއްކެވި ވާހަކަތަކަށް ޖުމްލަކޮށް ބަލާލާއިރު، ގިނަ މެމްބަރުން އެ އިސްލާހަށް ތާއީދު ކުރައްވަ އެވެ. އެކަމަކު އެ އިސްލާހާ މެދު އިތުރަށް މަޝްވަރާކޮށް، ކުރިމަތިވެދާނެ މައްސަލަތަކާ ދޭތެރޭ ވިސްނެވުމަށް ގިނަ މެމްބަރުން ގޮވާލެއްވި އެވެ.
ބުނީ ކީކޭ؟ - މި ބިލާ ގުޅޭ ގޮތުން ވާހަކަދައްކަވަމުން ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ ކަންބޮޑުވުން ފާޅުކުރެއްވި އެއް ކަމަކީ މެމްބަރުންގެ އަދަދު ވަކި އަދަދެއްގައި ހިފަހައްޓައިފި ނަމަ، މަޖިލީހުގައި ދިވެހި ހުރިހާ ރައްޔިތުންގެ އަޑުނީއްވުމުގެ ބިރެވެ. އޭނާ ވިދާޅުވި ގޮތުގައި، އާބާދީއަށް އިތުރުވާ ކޮންމެ މީހަކީ "އިތުރު ވިސްނުމެ"ކެވެ. އެކަން ފާހަގަކުރައްވައި އޭނާ ވަނީ، މެމްބަރުންގެ އަދަދު ހިފަހައްޓައިގެން އެ "އިތުރު ވިސްނުމަށް" މަޖިލީހުގައި ޖާގަ ލިބޭނެތޯ ސުވާލު އުފައްދަވާފަ އެވެ.
"އެ ވިސްނުމަށް އަޅުގަނޑުމެން ޖާގަ ދޭން ޖެހޭނެ. އެ ޖާގަ ލިބެނީ މި މަޖިލިސް ވަކި ހިސާބެއްގައި ލޮކް ކޮށްފައި އޮތުމުންތޯ، ނޫނިއްޔާ މި ގޮތަށް ބާއްވައިގެންތޯ އެއީ އަޅުގަނޑުމެން ކުރިމަތީގައި މިއަދު އޮތް ސުވާލެއް އިއްޒަތްތެރި ރައީސް،" އަބްދުލްގަފޫރު މޫސާ ވިދާޅުވި އެވެ.
އޭނާ ދެން ފާހަގަކުރެއްވި އަނެއް މައްސަލައަކީ މިހާރު އެ އިސްލާހު ހުށަހަޅާފައިވާ ގޮތަށް ފާސްވެއްޖެ ނަމަ، ބައެއް މެމްބަރުންގެ މަސްއޫލިއްޔަތުތަކާއި މަސައްކަތްތައް ބުރަވުމެވެ.
"ރާއްޖެ ބައްޓަންވެފައިވާ ގޮތުން އެއް މެމްބަރަކަށް ދާއިރާއެއްގައި ފަސް ރަށް، ހަ ރަށް، ހަތް ރަށް އޮތީމާ އެއީ ފަސޭހަ ކަމެއްތޯ، އެ ހުރިހާ ރަށްރަށަކަށް ޒިޔާރާތްކުރުމާއި އެ ހުރިހާ ކަންތައްތައް ކުރުން އެއީ ވެސް އަޅުގަނޑުމެން ކުރިމަތީގައި އޮތް ސުވާލެއް،" އަބްދުލްގަފޫރު މޫސާ ވިދާޅުވި އެވެ.
ބިލުގެ ބަހުސްގައި، އެމްޑީޕީގެ ޕީޖީ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވެސް ދެއްކެވީ، މި އިސްލާހާ އެކު ދެން ވާނެ ގޮތުގެ ވާހަކަތަކެވެ. އޭނާ ވިދާޅުވާ ގޮތުގައި، އިދާރީ ދާއިރާތައް 87 މެމްބަރުންނަށް ބަހާލުމުން ދިމާވާނެ "އިދާރީ މައްސަލަތަކަށް" ވެސް ވިސްނަން ޖެހެ އެވެ. އަދި ގާނޫނުއަސާސީ އިސްލާހު ކުރާ ފަހުން ގާނޫނުތަކަށް ގެންނަން ޖެހޭ އިސްލާހުތަކާ މެދު ވެސް ވިސްނަން ޖެހޭ ކަމަށް އޭނާ ވިދާޅުވި އެވެ.
އޭގެ އިތުރުން، އަސްލަމް ވަނީ މަޖިލިސް އެކުލެވޭ ގޮތަށް އިތުރު ބަދަލެއް ގެނައުމާ މެދު ވިސްނެވުމަށް މެމްބަރުންނަށް ގޮވާލައްވާފަ އެވެ. އެ އިސްލާހަކީ މަޖިލީހުގެ ގޮނޑިތަކުގެ ވަކި އިންސައްތައެއް އަންހެނުންނަށް ހާއްސަ ކުރުމެވެ.
އޭނާ އެގޮތަށް ވިދާޅުވީ، ރާއްޖޭގެ އާބާދީގެ ދެބައިކުޅަ އެއް ބައި ހިއްސާކުރަނީ އަންހެނުން ކަމަށް ވާއިރު، އެ އާބާދީ ތަމްސީލުކުރުމަށް މަޖިލީހުގައި ތިއްބަވާ އަންހެން މެމްބަރުންގެ އަދަދު މަދުކަން ފާހަގަކުރައްވަމުންނެވެ.
އެނގުން މުހިންމު - މި ހިނގާ 19 ވަނަ މަޖިލީހުގައި ތިއްބަވާ 87 މެމްބަރުންގެ ތެރޭގައި އަންހެނުންގެ އަދަދަކީ ހަތަރެކެވެ. އެއީ:
-
1-
މަޖިލީހުގެ ނައިބު ރައީސް، ގަލޮޅު އުތުރު ދާއިރާގެ މެމްބަރު އީވާ އަބްދުﷲ
-
2-
ހިންނަވަރު ދާއިރާގެ މެމްބަރު ޖީހާން މަހުމޫދު
-
3-
އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް
-
4-
ތުޅާދޫ ދާއިރާގެ މެމްބަރު ހިސާން ހުސެއިން
އަސްލަމް ވިދާޅުވީ ކޮންމެ މަޖިލީހެއްގައި ވެސް އަންހެނުންގެ ބަސް މުހިއްމެވެ. އެހެންކަމުން، ގާނޫނުއަސާސީއަށް ބަދަލު ގެނައުމުގެ ވާހަކަ ދައްކާއިރު މެމްބަރުން އެކަމާ ގުޅިގެން ވެސް ވިސްނެވުމަށް އޭނާ އެިދވަޑައިގެންނެވި އެވެ.
އަސްލަމްގެ ވާހަކަ ނިންމަވާލެއްވީ އެ ބިލާ ގުޅިގެން ފުޅާ ދާއިރާއެއްގައި މަޝްވަރާކުރުމަށް ގޮވާލައްވަމުންނެވެ. އޭނާ ގަބޫލުކުރައްވާ ގޮތުގައި، މިފަދަ ބޮޑު އިސްލާހެއް ގެންނައިރު ސިޔާސީ ޕާޓީތަކުގެ ވެރިންގެ ހިޔާލު ވެސް މުހިއްމެވެ. އެހެންކަމުން، އެ ބިލު އަނބުރާ ގެންދެވުމަށް އޭނާ ގޮވާލެއްވި އެވެ.
"އެކަން ކުރުމުގެ ގާނޫނީ މަސްއޫލިއްޔަތު އޮންނަނީ ރައްޔިތުންގެ މަޖިލީހުގައި ކަމަށް ވިޔަސް، އާއްމު އެހެނިހެން ބަސް ކިޔާ ސިޔާސީ ވެރިންނާއި ސިޔާސީ ޕާޓީތައް މިކަމުގައި ދެކޭ ގޮތް ހޯދާލުމަކީ މުހިއްމު ކަމެއް ކަމުގައި އަޅުގަނޑު ދެކެން. އެހެންކަމުން، އަޅުގަނޑު އެދެނީ މި ބިލާ ދޭތެރޭގައި އިތުރަށް ވިސްނައި އިތުރަށް މަޝްވަރާކުރުމަށް އިއްޒަތްތެރި މެމްބަރު މި ބިލު އަނބުރާ ގެންދެވުމަށް،" އަސްލަމް ވިދާޅުވި އެވެ.
މި ބިލާ ގުޅޭ ގޮތުން އިތުރަށް މަޝްވަރާ ކުރުމަށް އުނގުފާރު ދާއިރާގެ މެމްބަރު މުހައްމަދު ވަހީދު ވެސް ތާއީދުކުރެއްވި އެވެ. އެކަމަކު އަސްލަމާ ހިލާފަށް ވަހީދު ގޮވާލެއްވީ ބިލު ބަލައިގަނެ، ސިޔާސީ ޕާޓީތަކުގެ މެދުގައި ފުޅާ ދާއިރާއެއްގައި މަޝްވަރާތައް ބޭއްވުމަށެވެ.
އެނގުން މުހިންމު - ގާނޫނުއަސާސީ މިހާރު އޮންނަ ގޮތުން ކޮންމެ 5،000 މީހުންގެ އާބާދީ އަކީ އިދާރީ ވަކި ދާއިރާ އެވެ. އެއާ އެކު، މަޖިލީހުގެ ކޮންމެ ދައުރަކަށް ފަހު، މެންބަރުންގެ އަދަދު ދަނީ އިތުރު ވަމުންނެވެ. އެގޮތުން:
-
17 ވަނަ ރައްޔިތުންގެ މަޖިލިސް - 77 މެންބަރުން
-
18 ވަނަ ރައްޔިތުންގެ މަޖިލިސް - 85 މެންބަރުން
-
19 ވަނަ ރައްޔިތުންގެ މަޖިލިސް - 87 މެންބަރުން
އިސްލާހު ހުށަހެޅުއްވި ސަބަބެއްގެ ގޮތުގައި ގާސިމް ވިދާޅުވެފައި ވަނީ، ކޮންމެ ފަހަރަކު މިގޮތަށް މެންބަރުން އިތުރުވުމަކީ ރާއްޖެ ފަދަ ކުޑަ ގައުމެއްގެ ގާނޫނު ހަދާ މަޖިލީހަށް ބެނުންވާ ވަރަށް ވުރެ މާ ގިނަ އަދަދެއްގެ މެންބަރުންކަމަށެވެ.
-
އިތުރަށް ކިޔާލަން - މެމްބަރުންގެ އަދަދު އިތުރުވުމުގައި ކޮންޓްރޯލެއް ނެތް، 'ތަޅު އަޅުވަން' ޖެހިފައި
ކޮމެންޓް (1)
މުނައްވަރު