ހިޔާގެ ކުލި 5،600ރ.އަށް ކުޑަކޮށްދޭން އެދި އެޗްޑީސީއަށް އެތައް ސަތޭކަ ސިޓީއެއް

އަންނަ މަހުން ފެށިގެން ހިޔާ ފްލެޓްތަކުން ކުލި ނެގުމަށް ނިންމާފައި ވާއިރު، ކުލީގެ ގޮތުގައި ކަނޑައަޅާފައިވާ 8،500ރ. އަކީ ބޮޑު އަދަދެއް ކަމަށް ބުނެ، މަހު ކުލި 5،600ރ.އަށް ކުޑަކޮށް ދިނުމަށް އެދި ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އަށް އެތައް ސަތޭކަ ސިޓީއެއް ލުމަށް ހިޔާގެ ރަށްވެހިން ސިޓީތަކުގައި ސޮއިކުރަން ފަށައިފި އެވެ.

ވީ ކިހިނެއް؟ - ހިޔާގެ ރަށްވެހިންގެ ޖަމްއިއްޔާ، ހިޔާ ޔޫނިއަންއިން އިސް ނަގައިގެން އިއްޔެ ފެށި އެ ހަރަކާތާ ގުޅޭ ގޮތުން އެ ޔޫނިއަންގެ ރައީސް އަބްދުﷲ އަމްޒަލް ރަޝީދު މިއަދު 'ދައުރު'އަށް ވިދާޅުވީ އިއްޔެ ހަވީރުން ފެށިގެން ހިޔާ ފްލެޓް ސަރަހައްދުގައި މޭޒު ބަހައްޓައިގެން ސިޓީތަކުގައި ސޮއިކުރުމުގެ ހަރަކާތް ކުރިއަށްގެންދާ ކަމަށެވެ. އެގޮތުން:

ޔޫނިއަންގެ ބަސް - އަމްޒަލް ވިދާޅުވީ އެ ސިޓީތަކުގައި އެދިފައި ވާނީ ހިޔާ ފްލެޓްތަކަކީ އެ ތަން ލިބުނު މީހުން ބޮޑެތި ލޯނުތައް ނަގައިގެން ހަދާފައިވާ ތަންތަނަށް ވާތީ އެ ހުރިހާ ކަމަކަށް ބަލައިގެން އެ ތަނުގެ ކުލި، ކުރީގެ ސަރުކާރުން ކަނޑައަޅާފައި އޮތް ގޮތަށް 5،600ރ.އަށް ކުޑަކޮށް ދިނުމަށް ކަމަށެވެ. 

"މިއީ އެއްވެސް ވަރަކަށް ސިޔާސީ ކަމެއް ނޫން. މިއީ ފަރުދީ ހައިސިއްޔަތުން ހިޔާތަކުގެ މީހުންގެ ތެރެއިން އެ ކަމަށް ބޭނުންވާ މީހުން ކުރާ ކަމެއް. އަޅުގަނޑުމެން މި އެދެނީ މިހާރު ކަނޑައަޅާފައި އޮތް ކުލި ބޮޑޭ، އެހެންވީމާ މި ހުރި ކަންކަަމަށް ރިއާޔަތްކޮށްފައި ކުލި ކުޑަކޮށްދޭށޭ،" އަޒްމަލް ވިދާޅުވި އެވެ.

އެޗްޑީސީގެ ބަސް - އެޗްޑީސީގެ މެނޭޖިން ޑިރެކްޓަރު ސުހެއިލް އަހުމަދު މިއަދު 'ދައުރު'އަށް ވިދާޅުވީ އަދި އޮތީ އަންނަ މަހުން ފެށިގެން ހިޔާ ފްލެޓްތަކުން ކުލި ނަގާ ގޮތަށް ކަމަށެވެ. ކުލީގެ ގޮތުގައި ނަގަން ކަނޑައަޅާފައިވާ އަދަދަށް ބަދަލު ގެނައުމުގެ ވިސްނުމެއް ވެސް އަދި ނެތް ކަމަށް އޭނާ ވިދާޅުވި އެވެ.

ނަމަވެސް، ސުހެއިލް ވިދާޅުވި ގޮތުގައި، ހިޔާ ފްލެޓްތަކުގެ ކުލި އަދިވެސް އިތުރު މުއްދަތަކަށް ފަސްކޮށްދޭން ބައެއް ފަރާތްތަކުން އެދިފައި ވާތީ ހިޔާ ފްލެޓްތަކުގެ ފިނިޝިން ނުނިމޭ ފަރާތްތައް ދެނެގުމަށް މިހާރު ވަނީ ސާވޭއެއް ފަށާފަ އެވެ. އަދި ކުލި ފަސްކުރުމާ މެދު ގޮތެއް ނިންމާނީ މި ހަފްތާގެ ތެރޭގައި ސާވޭ ނިމުމުން އޭގެ ނަތީޖާއަށް ބަލާފައި ކަމަށް ވެސް އޭނާ ވިދާޅުވި އެވެ.

"މީގެ ކުރިން ވެސް ސާވޭކޮށްފައި ތިން މަހަށް ލަސްކުރީ ކުލި. މި ފަހަރު ވެސް ހަމަ އެ ގޮތަށް އަޅުގަނޑުމެން ނިންމުމެއް ނިންނާނީ އޭގެ ނަތީޖާއަށް ބޭސްކޮށްފައި،" ސުހެއިލް ވިދާޅުވި އެވެ.