ފަޔަ ހައިޑްރަންޓް ނިޒާމު ހަރުކުރިތާ ދެ އަހަރު، އެކަމަކު ބޭނުމެއް ނުކުރެވޭ

މާލޭގައި އަލިފާނުގެ ހާދިސާއެއް ހިނގައިފި ނަމަ، އަވަހަށް ފެން ލިބޭނެ ގޮތް ހަދަން މަޖީދީ މަގުގައި ޑިސެމްބަރު 2020 ގައި ގާއިމްކުރަން ފެށި، ފަޔާ ހައިޑްރަންޓް ނިޒާމް ބޭނުންކުރެވޭ ހާލަތަކަށް އަދިވެސް ނުގެނެވޭނެކަން އެނގިއްޖެ އެވެ.

އެނގުން މުހިންމު - މާލޭގައި ދޭތެރެ ދޭތެރެއިން އަލިފާނުގެ ބޮޑެތި ހާދިސާތައް ހިނގާތީ މި ސަރުކާރުން މަޖީދީ މަގުގައި ފަޔާ ހައިޑްރަންޓް ނިޒާމު ނިންމުމުގެ މަސައްކަތް ފެށީ ސެޕްޓެމްބަރު 2019 ގައި ހެންވޭރު އަބަދަށް ފެހި މަގުގައި ހުރި އިމާރާތެއްގައި ރޯވެ، ބޮޑެތި ގެއްލުންތަކެއް ލިބުމާ އެކު އެވެ.

އޭގެ ކުރިން 2016 ގައި އޭރުގެ ރައީސް އަބްދުﷲ ޔާމީންގެ ވެރިކަމުގައި މާލޭގައި އަލިފާން ނިއްވާނެ ނިޒާމެއް ގާއިމްކުރުމުގެ މަސައްކަތް އޮތީ ފަށައިފަ އެވެ.

ވީ ކިހިނެއް؟ - މަޖީދީމަގުގައި ފަޔާ ހައިޑްރަންޓް ނިޒާމެއް ގާއިމްކޮށްފައި ވިޔަސް އޭގެ ބޭނުން ނުކުރެވޭތީ އެކަމުގެ ޝަކުވާ ބައެއް މީހުން ދަނީ ކުރަމުންނެވެ. އެހެންކަމުން އޭގެ ސަބަބަކީ ކޮބައިތޯ ބަލަން މައުލޫމާތު ހޯދައި ލިބިގަތުމުގެ ހައްގު (އާރުޓީއައި)ގެ ދަށުން އައިމަން ލަތީފު ވަނީ އެ މައުލޫމާތަށް ޑިފެންސް މިނިސްޓްރީގައި އެދިފަ އެވެ. އަދި އެ މިނިސްޓްރީން އެ މައުލޫމާތު މިހާރު ވަނީ އޭނާއަށް ފޯރުކޮށްދީފަ އެވެ.

އެ މައުލޫމާތު އާންމުންނާ އޭނާ ހިއްސާކުރީ ޓްވީޓާ މެދުވެރިކޮށެވެ.

ތަފްސީލު - ޑިފެންސް މިނިސްޓްރީން ދިން ޖަވާބުން އެނގުނީ ފަޔާ ހައިޑްރަންޓް ނިޒާމް އަދިވެސް ހުރީ ބޭނުންނުކުރެވޭ ހާލަތުގައި ކަމެވެ. ނަމަވެސް، ވަކި ތާރީހެއް ނުދީ، އެ މިނިސްޓްރީން ބުނީ ކައިރި މުސްތަގުބަލެއްގައި ބޭނުންކުރެވޭނެ ކަމަށެވެ.

ޑިފެންސް މިނިސްޓްރީން ދިން ޖަވާބު:

ގުޅުން ހުރި - އަބަދަށްފެހި މަގުގައި 2019ގައި ހިނގި އަލިފާނުގެ ހާދިސާއާ ގުޅިގެން ކުރީގެ ހައުސިން މިނިސްޓަރު އަދި މިހާރު މާލެ ސިޓީ ކައުންސިލްގެ މޭޔަރު އޭރު ވިދާޅުވީ ޔާމީންގެ ސަރުކާރުގައި މަޖީދީ މަގު ހެދިއިރު އެ މަގުގެ އެކި ހިސާބުތަކުން ފެން ނެގޭ ގޮތަށް ހޮޅި ގުޅާފައިވާނެ ކަމަށެވެ. 

ނަމަވެސް މާލޭގެ އޭރުގެ މޭޔަރު ޝިފާ މުހައްމަދު ވިދާޅުވެފައިވާ އޮތީ މަޖީދީ މަގުގައި ހޮޅި އަޅާފައި ވިޔަސް ބޭނުންކުރެވޭ ވަރަށް މަސައްކަތް ނިމިފައި ނުވާ ކަމަށެވެ.

މާލޭ ތެރޭގައި އަލިފާނުގެ ހާދިސާއެއް ހިނގުމުން ފެން ހޯދަން ވަރަށް ބޮޑެތި އުނދަގޫތައް ދިމާވެ އެވެ. އޭގެ ނަތީޖާއެއްގެ ގޮތުން އަލިފާންގަނޑު ނިއްވާލުމުގެ މަސައްކަތަށް ހުރަސް އެޅެ އެވެ.