މިނިމަމް ވޭޖު އެލަވަންސެއްގެ ގޮތުގައެއް ނުދެވޭނެ: ޓްރޭޑް ޔޫނިއަން

އެންމެ ކުޑަ އުޖޫރު ނުވަތަ މިނިމަމް ވޭޖު އަންނަ އަހަރުން ފެށިގެން ދޭއިރު، ސަރުކާރު މުވައްޒަފުންގެ މުސާރައަށް އިތުރުވާ ބައި އެލަވެންސެއްގެ ގޮތުގައި ދޭން ނިންމި ނިންމުން ބަލައިނުގަންނަ ކަމަށް މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) އިން މިރޭ ބުނެފި އެވެ.

ވީ ކިހިނެއް؟ - ފިނޭންސް މިނިސްޓްރީގެ ދަށުގައި އޮންނަ ޕޭ ކޮމިޝަން އަދި ސިވިލް ސާވިސް ކޮމިޝަން (ސީއެސްސީ) ގުޅިގެން ފިނޭންސް މިނިސްޓްރީގައި އިއްޔެ މެންދުރުފަހު ބޭއްވި ނޫސްވެރިންގެ ބައްދަލުވުމެއްގައި، އެ އިދާރާތަކުގެ އިސް ވެރިން ވަނީ މިނިމަމް ވޭޖާ އެކު މުވައްޒަފުންގެ މުސާރައަށް އަންނާނެ ބަދަލުތައް ހިއްސާކުރައްވާފަ އެވެ.

އިތުރަށް ކިޔާލަން -

އަންނަ މަހުގެ މުސާރައާ އެކު މި އެލަވެންސް ދޭން ފަށާއިރު، ސިވިލް ސާވިސްގައި ހިމެނޭ 11،000އަށް ވުރެ ގިނަ މުވައްޒަފުންނަށް މިހާރު ލިބޭ އެއްޗަކަށް ވުރެ އެވްރެޖުކޮށް 1،139ރ.ގެ އަދަދެއް އިތުރަށް ލިބޭނެ އެވެ.

ބުނީ ކީކޭ؟ - އެ ނިންމުމާ ގުޅިގެން ޓްރޭޑް ޔޫނިއަނުން ނެރުނު ބަޔާނެއްގައި ބުނީ މިނިމަމް ވޭޖު ކަނޑައެޅުމަކީ މަސައްކަތްކުރާ ފަރާތްތަކުގެ އިޖުތިމާއީ ރައްކާތެރިކަން ކަށަވަރުކުރުމަށާއި އިގްތިސޯދީ ގޮތުން މަސައްކަތްތެރިން ބާރުވެރިކުރުމަށް މުހިންމު ސިޔާސަތެއް ކަމަށެވެ.

އިންޓަނޭޝަނަށް ލޭބަ އޯގަނައިޒޭޝަން (އައިއެލްއޯ) އިން ލަފާ ދެނީ މަސައްކަތްތެރިންނާއި ވަޒީފާ ދޭ ފަރާތްތަކާ އަދި ސަރުކާރުގެ މަންދޫބުން ހިމެނިގެން ކުރާ ދިރާސާ އަދި ނިންމުންތަކެއްގެ ތެރެއިން މިނިމަމް ވޭޖު ކަނޑައެޅުމަށް ކަމަށާއި އެހެން ގައުމުތަކުގައި ވެސް މިނިމަމް ވޭޖު ކަނޑައަޅާފައި ވަނީ އެގޮތަށް ކަމަށް ޓްރޭޑް ޔޫނިއަނުން ބުންޏެވެ.

އެ ޖަމިއްޔާ އިން ފާހަގަކުރި ގޮތުގައި:

"ނަމަވެސް، ދިވެހި ސަރުކާރުން އެ ލަފަޔާ ހިލާފަށް މިނިމަމް ވޭޖު ކަނޑައެޅުމުން، ސަރުކާރުގެ ސިޔާސަތުތައް ނިންމުމުގައި އިހްލާސްތެރިކަމެއް ނެތް ކަމާއި މަކަރާއި ހީލަތާއި އޮޅުވާލުން ހުރި ކަމާއި މަސައްކަތްތެރިންގެ ކަންކަން ނިންމުމުގައި ބާރު ގަދަ އެހެން ފަރާތްތަކުގެ ނުފޫޒުން ކަންކަން ނިންމަމުން ދާކަމަށް ތުހުމަތުކުރެވޭ ކަމުގައި ދަންނަވަމެވެ،" އެ ޖަމިއްޔާގެ ބަޔާނުގައި ބުންޏެވެ.

"މިނިމަމް ވޭޖަކީ އާދައިގެ އެލަވަންސެއްގެ ގޮތުގައި ކަނޑައެޅުން ބަލައި ނުގަނެވޭނެ ކަމުގައި ދަންނަވަން."

ރާއްޖެއާ އެއްފަދަ އިގްތިސޯދެއް އޮންނަ ގައުމުތަކުގައި ވެސް މިނިމަމް ވޭޖު ކަނޑައަޅާފައި ވަނީ އަސާސީ މުސާރައިގެ ގޮތުގައިކަން އެ ޖަމިއްޔާ އިން ފާހަގަކުރި އެވެ. އަދި އަސާސީ މުސާރައާ އެކު އެލަވަންސެއް ހިމެނި ކަމަށް ވިޔަސް، އެ ހިމެނޭ އަދަދަކީ އަސާސީ މުސާރައާ އެއް ހަމަ ނުވަތަ ބޮޑު އަދަދަކަށް ވުމަކީ އައިއެލްއޯގެ ވޭޖް ފިކްސިން މެކެނިޒަމްގެ އަސާސްތަކާއި ބެސްޓް ޕްރެކްޓިސް އާ ހިލާފު ކަމެއް ކަމަށް އެ ޖަމިއްޔާއިން ބުންޏެވެ.

"ހާއްސަކޮށް ޕެންޝަނަށް އުނިކުރާ ނިސްބަތް މަދުކޮށް އަދި އިތުރު ގަޑީގެ ފައިސާ ވެސް މަދުކުރުމުގެ ނިޔަތުގައި މިފަދަ ކަންކަން ކުރެވިގެން ދިއުމަކީ މަސައްކަތްތެރިންގެ ނުހަނު ކަންބޮޑުވުން ހިމެނޭ ކަމެއް ކަމުގައި ދަންނަވަމެވެ،" ބަޔާނުގައިވެ އެވެ.

ދައުލަތުގެ މުސާރަތައް އެއްހަމަވެފައި ނެތުމާއި ޕޭ ހާމަނައިޒޭޝަންގެ ބަހަނާ އާއި ސިވިލް ސާވިސްގެ އެއް މަސައްކަތެއް ކުރާ ދޭދޭ މުވައްޒަފުންގެ މުސާރަ އާއި އިނާޔަތްތަކުގައި ތަފާތުކުރުން ޒަމާނުއްސުރެ ދަމަހައްޓަމުން ގެންދަނީ ގަސްދުގައި މަސައްކަތްތެރިންގެ މެދުގައި ބައިބައިވުން އުފައްދައި އަބަދު ވެސް ސިޔާސީ މަންފާއަށް މަސައްކަތްތެރިންގެ ބޭނުން ނަމަހަ ގޮތުގައި ހިފުމަށް ކަމަށް އެ ޖަމިއްޔާ އިން ތުހުމަތުކުރި އެވެ.

"އެހެންކަމުން، މިހާރު ވެސް އޮތް މުސާރައިގެ ތަފާތުކުރުމާއި ނަހަމަކަމާއި ބޭއިންސާފު އެއީ މިނިމަމް ވޭޖު ކަނޑައެޅުމުގެ އުސޫލުތަކާ ހިލާފު ވާން ޖެހޭ ސަބަބެއް ނޫން ކަމުގައި ދަންނަވަމެވެ،" ބަޔާނުގައިވެ އެވެ.

ޓްރޭޑް ޔޫނިއަނުން ސަރުކާރަށް ގޮވާލާފައި ވަނީ: