'ކޮތަރުކޮށި ޖަލްސާ' ބޭއްވުމުގެ މައްސަލަ ހޫނުވަނީ، މުއިއްޒުގެ އިންޒާރެއް ފުލުހުންނަށް

އަންނަ ހުކުރު ދުވަހުގެ ރޭ ހުޅުމާލޭ ދެ ވަނަ ފިޔަވަހީގައި ކުރީގެ ރައީސް އަބްދުﷲ ޔާމީންގެ ވެރިކަމުގައި ހެދި 7،000 ފްލެޓް، ފަހުން ބައެއް މީހުން ސިފަކުރަމުން އައި 'ކޮތަރުކޮށި'، ސަރަހައްދުގައި އެ މަނިކުފާނު ބައިވެރިވެވަޑައިގަންނަވާ ޖަލްސާ ބޭއްވުމުގައި އެޗުޑީސީ އާއި މާލޭ ސިޓީ ކައުންސިލްގެ މެދުގައި އުފެދުނު މައްސަލަ އަދިވެސް ދަނީ ހޫނުވަމުންނެވެ.

އެޗުޑީސީން އިއްޔެ ބުނެފައި ވަނީ އެ ތަނުގައި އެއްވެސް ޖަލްސާއެއް ބޭއްވޭނީ އެ ކުންފުނީގެ ހުއްދަ ލިބިގެން ކަމަށެވެ. އެކަމަކު ޕީޕީއެމްގެ މެޖޯރިޓީ އޮންނަ ކައުންސިލުން ބުނަނީ އެގޮތަށް އެކަން ނުހުއްޓުވޭނެ ކަމަށެވެ. މި ހޫނުގަނޑުގައި މިއަދު ކައުންސިލުން ވަނީ އެޗުޑީސީއަށް ދޫކޮށްފައިވާ ހުޅުމާލެ ރަޖިސްޓްރީ ވެސް ބާތިލްކޮށްފަ އެވެ.

ޔާމީން ވަޑައިގަންނަވާ ޖަލްސާ ބާއްވަމުން ޕީޕީއެމުން އިއުލާންކުރަމުން އަންނަނީ 'ކޮތަރުކޮށި ޖަލްސާ"ގެ ގޮތުގަ އެވެ.

މޭޔަރުގެ އިންޒާރު - މާލޭގެ މޭޔަރު އަދި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ ޕީޕީއެމްގެ ޖަލްސާ ބާއްވަން ސިޓީ ކައުންސިލުން ދިން ހުއްދަ ތަންފީޒުކުރަން ފުލުހުން ހުރަސް އަޅަމުންދާ ކަމަށެވެ. އެހެންވެ ގާނޫނީ ގޮތުން ފުލުހުންނާ މެދު ފިޔަވަޅު އަޅުއްވާނެ ކަމަށް ވިދާޅުވެ، މިރޭ އިންޒާރު ދެއްވި އެވެ.

ވީ ކިހިނެއް؟: ޖަލްސާ ބާއްވަން ތައްޔާރުކުރަމުން ދިޔަ ސަރަހައްދަށް މިއަދު އެޗްޑީސީގެ ބޮޑެތި ވެހިކަލްތައް ގޮސް، ޕާކު ކުރުމުން މަސްލަހަތު ގޯސްވި އެވެ. އެކަމަކު މިހާރު އެ ވެހިކަލްތައް އެތަނުން ނަގައިފި ކަމަށް، ޕީޕީއެމްގެ އިސް މެމްބަރަކު ބުންޏެވެ.

މިހާރު އެތަނުގައި ތިބީ ފުލުހުންނެވެ. ނަން ނުޖަހާ ގޮތަށް ވާހަކަ ދެއްކި ޕީޕީއެމްގެ މެމްބަރު ބުނީ ޖަލްސާއަށް ތައްޔާރުކުރުމުގެ ފުރުސަތު ދޭނީ އެޗުޑީސީގެ ހުއްދަ ލިބިގެން ކަމަށް، ފުލުހުން ބުނާ ކަމަށެވެ.

"މި ކޮޅުން ވެސް އެކި ފަރާތްތަކާ ވާހަކަ ދައްކަމުން ދަނީ. ފުލުހުން ބުނަނީ ހުއްދަ ލިބިގެންނޭ ޖަލްސާ ބޭއްވޭނީ،" ހުޅުމާލޭގެ އެ ސަރަހައްދުގައި ހުރެ ފޯނުން ވާހަކަ ދައްކަމުން އޭނާ ބުންޏެވެ.

"ހައްލެއް ލިބޭތޯ އަޅުގަނޑުމެންގެ އިސް ބޭފުޅުން އެބަ އުޅުއްވާ. ހީވޭ ރަނގަޅު ގޮތެއް ވާނެހެން."

އެނގުން މުހިންމު - ހުޅުމާލޭގައި މުނިސިޕަލް ހިދުމަތްތައް ދިނުން މާލޭ ސިޓީ ކައުންސިލްގެ ދަށަށް ބަދަލުކުރުމަށް މިދިޔަ ލޯކަލް ކައުންސިލް އިންތިހާބުގެ ކެމްޕޭން ތެރޭގައި ސަރުކާރުން ވައުދުވި އެވެ. ނަމަވެސް އިންތިހާބުގައި އިދިކޮޅު ޕީޕީއެމް އިން ކައުންސިލްގެ ސާފު މެޖޯރިޓީ ނެގުމުން، އެ މަސައްކަތް އޮތީ ހުއްޓިފަ އެވެ. އެއާ އެކު، ހުޅުމާލެއާ ގުޅޭ ގޮތުން މާލޭ ސިޓީ ކައުންސިލާއި ހުޅުމާލެ ބަލަހައްޓާ އެޗްޑީސީ އޮތީ އަރައިރުމަކަށް ގޮސްފަ އެވެ.

ކައުންސިލުން މިއަދު ވަނީ އެޗްޑީސީއަށް ދޫކޮށްފައި އޮންނަ ހުޅުމާލޭގެ ރަޖިސްޓްރީ ވެސް ބާތިލްކުރަން ފާސްކޮށްފަ އެވެ. އެކަމަކު އޭގެ ސަބަބުން ހުޅުމާލޭގެ ބެލެނިވެރިކަމަށް ބަދަލެއް ނާންނާނެ އެވެ. ހުޅުމާލެއަކީ އެޗުޑީސީއަށް ސަރުކާރުން ދީފައި އޮންނަ ބިމެކެވެ. އެ ބިން މޯގޭޖްކޮށްގެން ބޮޑެތި ލޯނުތައް ވަނީ ނަގައިފަ އެވެ. އެހެންކަމުން މާލޭ ސިޓީ ކައުންސިލްގެ އިހުތިސާސްގެ ތެރޭގައި އޮތަސް، ހުޅުމާލެއާ މެދު ވިލިމާލެއާ މެދު އަމަލްކުރާ ގޮތަށް ކަންކުރުމުގެ ފުރުސަތެއް ކައުންސިލަކަށް އަދި ނެތެވެ.

ސިޓީ ކައުންސިލުން ދޫކޮށްފައިވާ ހުޅުމާލޭގެ ރަޖިސްޓްރީ ބާތިލްކޮށް، ހުޅުމާލެ އަކީ ކައުންސިލްގެ ބިމެއްގެ ގޮތުގައި ނިންމަން ހުށަހެޅުއްވީ ސިޓީ ކައުންސިލްގެ އާންމު ޖަލްސާގައި، ޑެޕިއުޓީ މޭޔަރު އަހްމަދު ނަރީޝް އެވެ.

ނަރީޝް ވިދާޅުވީ: