ރިއަލް އެސްޓޭޓް ޓޫރިޒަމް ފަށަން ތައްޔާރު، ބޮޑު އާމްދަނީއެއް ނެރެވޭނެ: އަމީރު

ރާއްޖޭގެ ހަތަރު ތަނެއް ހިއްކައިގެން ރަށްތަކެއް ހަދާ ވިއްކައިގެން އާމްދަނީ ހޯދުމަށް ބަޖެޓުގައި ހިމަނާފައިވާ ރިއަލް އެސްޓޭޓް ޓޫރިޒަމް މަޝްރޫއު ފަށަން ހުރިހާ ކަމެއް މިހާރު ތައްޔާރުވެފައިވާ ކަމަށް ވިދާޅުވެ އަންނަ އަހަރު އެ މަޝްރޫއުން ރަނގަޅު އާމްދަނީއެއް ހޯދޭނެ ކަމުގެ ޔަގީންކަން ފިނޭންސް މިނިސްޓަރު އިބްރާހިމް އަމީރު މިއަދު ރައްޔިތުންގެ މަޖިލީހަށް ދެއްވައި އެވެ.

އެނގުން މުހިންމު - މިއަހަރުގެ ބަޖެޓުގައި ވެސް ރިއަލް އެސްޓޭޓް ޓޫރިޒަމާއި އެހެން ވެސް އާމްދަނީ ހޯދަން ބަޖެޓުގައި އާ ކަންތައްތަކެއް ހިމެނި ނަމަވެސް އެ ކަންތައްތަކުން މިއަހަރު އާމްދަނީ ލިބޭ ގޮތެއް ނުވި އެވެ. އެހެންވެ މިއަހަރުގެ ބަޖެޓް ޑެފިސިޓް ނުވަތަ ބަޖެޓު ދަރަނީ ވަނީ އިތުރަށް ބޮޑުވެފަ އެވެ.

ރިއަލް އެސްޓޭޓް ޓޫރިޒަމް މަޝްރޫއު: 

ބުނީ ކީކޭ؟ - އާމްދަނީ ހޯދަން އަލަށް ހިމަނާފައިވާ ކަންތައްތައް ތަންފީޒުނުވެ އިތުރު އާމްދަނީ ނުލިބިދާނެތީ ވަރަށް ގިނަ މެންބަރުން މިއަދުގެ ބަޖެޓު ކޮމިޓީގައި ސުވާލު ކުރައްވާ އެކަމާ ކަންބޮޑުވުން ފާޅުކުރެއްވި އެވެ.

އެގޮތުން ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް ސުވާލު ކުރެއްވީ ރިއަލް އެސްޓޭޓް ޓޫރިޒަމުން 148 މިލިއަން ރުފިޔާ ލިބޭނޭ ކަމަށް ބަޖެޓު ކޮށްފައިވީ ނަމަވެސް އެކަމުން މި އަހަރު ވެސް އާމްދަނީއެއް ނުލިބި ވަނިކޮށް އަންނަ އަހަރަށް އެކަން ބަޖެޓުކުރީ ކިހާ ވަރެއްގެ ޔަގީންކަމެއް އޮވެގެންތޯ އެވެ.

އެ ސުވާލަށް ޖަވާބު ދެއްވަމުން ފިނޭންސް މިނިސްޓަރު ވިދާޅުވީ:

"އެހެންކަމުން އަޅުގަނޑަށް ޔަގީން އަންނަ އަހަރު ރިއަލް އެސްޓޭޓް ޓޫރިޒަމް މަޝްރޫ ހިންގާ އެކަމުން އާމްދަނީ ހޯދޭނެކަން. އެ މަޝްރޫއު ފަށަން ހުރިހާ ކަމެއް ވަނީ މިހާރު ހަމަޖެހިފައި،" މިނިސްޓަރު އަމީރު ވިދާޅުވި އެވެ.

މިނިސްޓަރު ވިދާޅުވީ ފަތުރުވެރިކަން ތަރައްގީކުރުމަށް ނެރޭ ރަށްތައް ވިކޭނެ ކަމުގެ އުއްމީދު އެބައޮތް ކަމަށާއި، ރަށްތައް ވިއްކައިގެން ލިބޭނެ ކަމަށް ބަޖެޓުގައި އަންދާޒާ ކޮށްފައިވާ އާމްދަނީ ލިބޭނެ ކަމަށެވެ.

އާ ރިސޯޓު ތަރައްގީ ކުރަން ރަށް ދޫކޮށްގެން އަންނަ އަހަރު 148 މިލިއަން ރުފިޔާ ލިބޭނެ ކަމަށް ބަޖެޓުގައި ވަނީ ބުނެފަ އެވެ.

"މިއަހަރު މާކެޓިން އާއި ދުބާއީގައިވެސް އެކްސްޕޯގެ ތެރެއިން މާކެޓިންގެ މަސައްކަތްތަކެއް ކުރެވޭ. އެހެންވީމާ އަޅުގަނޑުމެންނަށް ވަރަށް އުއްމީދު އެބައޮތް ތިވަރަށް އަޅުގަނޑުމެންނަށް އާމްދަނީ ރެއިޒް ކުރެވޭނެ ކަމަށް،" އަމީރު ވިދާޅުވި އެވެ.

އާ ރިސޯޓު ތަރައްގީ ކުރުމަށް ރަށް ދޫކޮށްގެން މިއަހަރުވެސް އާމްދަނީ ލިބޭނެ ކަމަށް ލަފާކޮށްފައި އޮތް ނަމަވެސް މި އަހަރު ވިއްކަން ހުޅުވާލި ރަށްރަށުގެ ތެރެއިން ވިކިފައިވަނީ އެންމެ ރަށެކެވެ. އެކަން ފާހަގަކޮށް، އެމްއެމްއޭ އިން ވެސް ވަނީ ރިސޯޓު ހަދަން ރަށް ވިއްކައިގެން، އަންނަ އަަހަރު ލިބޭނެކަމަށް ލަފާކުރާ 148 މިލިއަން ރުފިޔާގެ އާމްދަނީ ނުލިބިދާނެތީ ކަންބޮޑުވުން ފާޅުކޮށްފަ އެވެ.