'އިންޑިއާ އައުޓް' ހަރަކާތާ ހެދި ޓީޗަރުން ރާއްޖެ ދޫކޮށް ހިނގައިދާނެ: އެޑިއުކޭޝަން މިނިސްޓްރީ

އިދިކޮޅު ޕީޕީއެމް-ޕީއެންސީ ކޯލިޝަނުން މިހާރު އެންމެ ފޯރީގައި ހިންގާ 'އިންޑިއާ އައުޓް' ކެމްޕޭންގެ ސަބަބުން، ރާއްޖޭގައި އުޅޭ އެ ގައުމުގެ ޓީޗަރުން ބިރުގެންފައިވާ ކަމަށާއި އެ ޓީޗަރުން އެނބުރި ގައުމަށް ގޮސް، އޭގެ އަސަރު ދިވެހި ދަރިވަރުންނަށް ކުރުން ގާތް ކަމަށް ބުނެ، އެޑިއުކޭޝަން މިނިސްޓްރީން މިއަދު ކަންބޮޑުވުން ފާޅުކޮށްފި އެވެ. އެ މިނިސްޓްރީން ނެރުނު ބަޔާނެއްގައި ބުނިގޮތުގައި އިންޑިއާ ޓީޗަރުންނަށް ބޭރު ތެރެއިން ފުރައްސާރަކުރުން އިތުރުވެ، ޓީޗަރުން ގެންދަނީ ރައްކާތެރިކަމަށް އެދެމުންނެވެ.

އެނގުން މުހިއްމު - އިންޑިއާ ސިފައިން ރާއްޖޭގައި ތިބުމާ ދެކޮޅަށް އިދިކޮޅުން ކުރިއަށް ގެންދާ ކެމްޕޭން މިހާރު މުޅި ރާއްޖެއަށް ވަނީ ފުޅާކޮށްފަ އެވެ. 'އިންޑިއާ އައުޓް'ގެ ނަމުގައި، އެކި ރަށްރަށުގައި އެއްވުންތައް މިހާރު ދަނީ ބާއްވަމުންނެވެ.

ވީ ކިހިނެއް؟ - ށ. ފުނަދޫގައި މިއަދު ކުރިއަށް ގެންދިޔަ އެއްވުމެއްގައި، އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން ވަނީ، ގޭގޭގެ ފާރުތަކުގައި 'އިންޑިއާ އައުޓް' ލިޔަންވެއްޖެ ކަމަށް ވިދާޅުވެފަ އެވެ. އެޑިއުކޭޝަން މިނިސްޓްރީން ނެރުނު ބަޔާނެއްގައި އެކަމަށް އިޝާރާތްކޮށް ބުނިގޮތުގައި އޭގެ މާގިނަ އިރުތަކެއް ނުވެ، ފުނަދޫގައި ހުންނަ ށ. އަތޮޅު މަދަރުސާގެ ފާރުގައި ވަނީ އެ އިބާރާތް ލިޔެފަ އެވެ. 

ބުނީ ކީކޭ؟ - އެކަން ކުށްވެރިކޮށް އެޑިއުކޭޝަން މިނިސްޓްރީން ބުނިގޮތުގައި، އިދިކޮޅުގެ 'އިންޑިއާ އައުޓް' ހަރަކާތުގެ ތެރެއިން ސްކޫލުތަކާއި ދަރިވަރުން އެއްވެ އުޅޭ ތަންތަނުގައި 'އިންޑިއާ އައުޓް' ބެނާ ހަަރުކުރުމާއި ގްރެފިޓީގެ ގޮތުގައި އެ އިބާރާތް، ސްކޫލު ފާރުތަކުގައި ލިޔުން ވަނީ އިތުރުވެފަ އެވެ. ފުނަދޫ ސްކޫލުގެ ފާރުގައި 'އިންޑިއާ އައުޓް'ގެ އިތުރުން 'ސޭ ނޯ ޓު އިންޑިއަން' ވެސް ލިޔެފައިވެ އެވެ.

"މި އިބާރާތްތަކަށް ބަލާއިރު ސީދާ ޓާގެޓްކުރެވެނީ މި ތަންތަނުގައި މަސައްކަތްކުރާ އިންޑިއާގެ ރައްޔިތުންނަށްކަން ފާހަގަކުރެވެއެވެ،" އެޑިއުކޭޝަން މިނިސްްޓްރީގެ ބަޔާނުގައި ބުންޏެވެ.

"ސްކޫލުތަކުގައި ގިނަ އަދަދަކަށް އިންޑިއާ ޓީޗަރުން މަސައްކަތް ކުރާއިރު، ސްކޫލު ސަރަހައްދުގައި އެގޮތަށް ގޮވުމާއި ބެނާތައް ހަރުކުރުމާއި ފާރުތަކުގައި ލިޔުމުގެ ސަބަބުން، އެ ތަންތަނުގައި މަސައްކަތް ކުރާ ޓީޗަރުންގެ ހިތުގައި ވަނީ ބިރުވެރިކަން އުފެދިފަ އެވެ." 

މިއީ ކަންބޮޑުވާން ޖެހޭ މައްސަލައެއްކަން ފާހަގަ ކުރަމުން އެޑިއުކޭޝަނުން ބުނީ:

އެޑިއުކޭޝަން މިނިސްޓްރީން ބުނީ މިއީ އުނގެނުމާއި އުނގަންނައިދިނުމަށް ދަތިވެދާނެ ކަމަކަށް ވާއިރު، ޓީޗަރުންގެ ރައްކާތެރި ކަމަށް އެ މިނިސްޓްރީން ހާއްސަ ސަމާލު ކަމެއް ދޭނެ ކަމަށެވެ.