އިންޑިއާގެ ވެރިރަށް ދިއްލީގައި މުޒާހަރާ ކުރަނީ. (ފޮޓޯ/ރޮއިޓާސް)
އިންޑިއާގައި ދަރިވަރުންގެ މުޒާހަރާތައް ކުރިއަށްދާއިރު، އާ މަޝްވަރާތަކެއް
އެޑިއުކޭޝަން މިނިސްޓަރު ދަރުމެންދުރާ ޕްރަދާންގެ އިސްތިއުފާއަށް ގޮވާލައި ނިއުދިއްލީގައި ކުރިއަށްދާ މުޒާހަރާތަކާ ގުޅިގެން، ޒުވާނުން އިސްވެ ހިންގާ ކޮކްރޯޗު ޖަންތާ ޕާޓީ (ސީޖޭޕީ)ގެ ލީޑަރުންނާ އެކު އާ މަރުހަލާއެއްގެ މަޝްވަރާތައް އިންޑިއާ ސަރުކާރުން މިއަދު ފަށައިފި އެވެ.
ސީޖޭޕީގެ ތަރުޖަމާނު އަޝުތޯޝް ރަންކާ ވިދާޅުވީ، އެ ހަރަކާތުން އެދެނީ ސަރުކާރުގެ ފަރާތުން ސާފު ސީދާ އެއްބަސްވުމެއް ކަމަށެވެ.
"ދަރުމެންދުރާ ޕްރަދާންގެ މުސްތަގުބަލާ މެދު އަޅުގަނޑުމެން ބޭނުންވަނީ ސާފު ޖަވާބެއް. އަޅުގަނޑުމެން ބޭނުންވަނީ 'އާނއެކޭ' ނުވަތަ 'ނޫނެކޭ' ބުނާ ސީދާ ޖަވާބެއް،" އޭނާ ވިދާޅުވި އެވެ.
މުޒާހަރާ ކުރާ ސަރަހައްދުގެ މެޓްރޯ 18 ސްޓޭޝަނެއް ބަންދުކޮށް، ޖެހިޖެހިގެން 5 ވަނަ ދުވަހަށް މޮބައިލް އިންޓަނެޓްގެ ހިދުމަތްތައް ހުއްޓުވާފައިވީ ނަމަވެސް، އެތައް ހާސް މުޒާހަރާގެ ބައިވެރިންނެއް ވަނީ ދިއްލީއަށް ޖަމާވެފަ އެވެ.
"އެ މީހުންނަށް އިންޓަނެޓާއި މެޓްރޯ އަދި ބަސްތަކުގެ ހިދުމަތް ބަންދުކުރެވިދާނެ. ނަމަވެސް އެކަމުން ހާސިލުވާނީ ކޮން އެއްޗެއް؟ އެއްވެސް ކަމެއް ހާސިލެއް ނުވާނެ،" މުޒާހަރާގެ ބައިވެރިއެއް ކަމަށްވާ ރާހުލް ރާޖް ބުންޏެވެ.
މިދިޔަ ހަފުތާގެ ކުރީކޮޅު ފުލުހުން ކަރުނަގޭހާއި ލަޓިބުރި ބޭނުންކުރުމުން އިތުރަށް ވަރުގަދަވެގެންދިޔަ މި މުޒާހަރާތައް ފެށިފައިވަނީ، ދެ މިލިއަނަށް ވުރެ ގިނަ މެޑިކަލް އެންޓްރެންސް ދަރިވަރުން އަލުން އިމްތިހާނު ހަދަން ޖެހުނު ކަރުދާސް ލީކުވުމުގެ މައްސަލައާ ގުޅިގެންނެވެ. މުޒާހަރާގެ ބައިވެރިން އަދިވެސް ދަނީ މިނިސްޓަރު ޕްރަދާންގެ އިސްތިއުފާއަށާއި އިންޑިއާގެ އިމްތިހާނު ނިޒާމަށް ފުޅާ ދާއިރާއެއްގައި އިސްލާހުތައް ގެނައުމަށް ގޮވާލަމުންނެވެ.
ކޮމެންޓް