އިޒްރޭލުގެ ހަމަލާއެއްގައި ގާޒާގެ އާއިލާއެއްގެ 6 މީހުން މަރުވެއްޖެ

އެމެރިކާ އިސްވެ އޮންނަ ސުލްހައިގެ އެއްބަސްވުމަކަށް އާދެވުނުތާ ނުވަ މަހަށް ވުރެ ގިނަ ދުވަސް ވެފައިވީ ނަމަވެސް، ނުރައްކާތެރި ހަމަލާތައް ކުރިއަށްދަނިކޮށް، އިޒްރޭލުން ގާޒާ ސިޓީއަށް އިއްޔެ ދިން ވައިގެ ހަމަލާއެއްގައި ފަލަސްތީނުގެ ދެމަފިރިންނާއި އެ މީހުންގެ ހަތަރު ދަރިން މަރުވެއްޖެ އެވެ.

ސިއްހީ އޮފިޝަލުން ބުނި ގޮތުގައި، ސަބްރާ އަވަށުގައި ހުރި އަލް-މަސްރީ އާއިލާގެ ގޭގެއަށް އިއްޔެ ދިން މި ހަމަލާގައި ފިރާސް އަލް-މަސްރީ އާއި އޭނާގެ އަންހެނުން ސަލްސަބީލް އަލް-މަސްރީގެ އިތުރުން އެ ދެމަފިރިންގެ ހަތަރު ދަރިން ނިދާފައި ތިއްބާ ވަނީ މަރުވެފަ އެވެ.

އިޒްރޭލުގެ އަސްކަރިއްޔާއިން ބުނީ ސިފައިން އެ ހަމަލާ އަމާޒުކުރީ ހަމާސްގެ މެންބަރަކަށް ކަމަށާއި ހަމަލާގެ ނަތީޖާ ތަހުގީގުކުރަމުންދާ ކަމަށެވެ.

"އަލިފާނާއި ހަލާކުވެފައިވާ ތަންތަނުގެ ތެރެއިން އަޅުގަނޑުމެންގެ މާމަދަރިންނާއި ދަރިން ސަލާމަތްކުރެވޭ ގޮތެއް ނުވި. އެއްވެސް ނިސްބަތެއްގެ ހަމަޖެހުމެއް ނެތް އަދި އެއްވެސް ރައްކާތެރި ތަނެއް ވެސް ނެތް،" އެ ކުދިންގެ ކާފަ، އަބޫ ޔޫސުފް އަލް-މަސްރީ ބުންޏެވެ.

އދ. އިން ވަނީ އިޒްރޭލުން ދެމެހެއްޓެނިވި ގޮތެއްގައި ދެމުންދާ ހަމަލާތައް އިއްޔެ ކުށްވެރިކޮށްފަ އެވެ.

އެ ޖަމާއަތުގެ ތަރުޖަމާނު ސަމީން އަލް-ހީތާން ވިދާޅުވީ ސުލްހައިގެ އެއްބަސްވުން އިޢުލާނުކުރިތާ ނުވަ މަސް ފުރުނުއިރު ވެސް، ގާޒާގެ ފަލަސްތީނު ރައްޔިތުންނަށް ރައްކާތެރި އެއްވެސް ތަނެއް ނެތް ކަމަށެވެ. އާންމު ރައްޔިތުން މެރުމަކީ ބައިނަލްއަގުވާމީ އިންސާނީ ގާނޫނުތަކާ ހިލާފުވުމާއި ހަނގުރާމައިގެ ކުށްތަކާއި ގާޒާގައި ހިންގާފާނެ އުުދޫވާނީ އެހެން ކުށްތަކާ މެދު ކަންބޮޑުވުން އުފެދޭ ކަމެއް ކަމަށް ވެސް އޭނާ ވިދާޅުވި އެވެ.

މީގެ އިތުރުން، ގަސްދުގައި އާންމު ރައްޔިތުންނަށް ހަމަލާދިނުމަކީ ހަނގުރާމައިގެ ކުށެއް ކަމަށް އޭނާ ފާހަގަކުރެއްވި އެވެ.