އެމެރިކާއިން އީރާނަށްދޭ ހަމަލާތައް ވަރުގަދަކޮށްފި

ހޮރްމޫޒް ކަނޑުއޮޅިން ދަތުރުކުރާ އުޅަނދުތަކަށް ހަމަލާދިނުމަށް އީރާނަށް ލިބިފައިވާ ގާބިލުކަން އިތުރަށް ބަލިކަށިކޮށްލުމަށްޓަކައި އެމެރިކާއިން އީރާނަށް އަމާޒުކޮށް އަނެއްކާވެސް އާ ހަމަލާތަކެއް ދޭން ފަށައިފި އެވެ.

އެމެރިކާ އިން އީރާނަށްދޭ ހަމަލާތައް ވިދިވިދިގެން 10 ވަނަ ރެއަށްވަނީ ދެމިގެންގޮސްފަ އެވެ. އަދި އެ ހަމަލާތައް ހުއްޓުމެއް ނެތި ދެމުން ގެންދަނީ އެމެރިކާ ސިފައިން މަރުވި މައްސަލާގައި އީރާނަށް އަދަބު ދޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވައުދުވެވަޑައިގެންފައި ވަނިކޮށެވެ.

ޓްރަމްޕް ވިދާޅުވީ މި ފަހުން މަރާލި އެމެރިކާގެ ސިފައިންގެ ތިން މީހުންގެ ބަދަލު ހިފުމަށް ކުރީ ރޭ އީރާނަށް ވަރަށް ވަރުގަދަ ހަމަލާތަކެއް ދީފައިވާނެ ކަމަށެވެ.

އީރާނުގެ ދައުލަތުގެ ނިއުސް އެޖެންސީން ރިޕޯޓްކޮށްފައިވާ ގޮތުގައި، އެމެރިކާގެ ފަހުގެ ހަމަލާތަކަށް ރައްދުދިނުމުގެ ގޮތުން، އެ ކަނޑުއޮޅިން ދަތުރުކުރަމުން ދިޔަ ދެ ތެޔޮ ޓޭންކަރަކަށާއި ބަހްރެއިން އަދި ކުވެއިތުގައި ހުރި އެމެރިކާ އަސްކަރިއްޔާގެ ވަސީލަތްތަކަށް ހަމަލާދީފައިވާނެ އެވެ. އަދި އީރާންގެ ރައީސް މަސްއޫދު ޕެޒެޝްކިއަން ވިދާޅުވީ އީރާނުން އެމެރިކާއާ އެކު މިހާރު ކުރަމުންދަނީ ފުރިހަމަ ހަނގުރާމައެއް ކަމަށެވެ.

އީރާނާއި އެމެރިކާ އިން ގާއިމު ކުރި، ހަމަލާތައް ބަދަލުކުރުން މެދުކަނޑާލުމުގެ އެއްބަސްވުމަށް އަމަލުކުރުން ހުއްޓާލާފައި ވިޔަސް، ތިން ވަނަ ފަރާތެއް މެދުވެރިކޮށް ދެ ފަރާތުގެ ދެމެދުގައި ޑިޕްލޮމެޓިކް މެސެޖުތައް އަދިވެސް ބަދަލުކުރެވެމުންދާ ކަމަށް ތެހެރާނުން ބުނެ އެވެ.

އެމެރިކާގެ ސެންޓްރަލް ކޮމާންޑުން އެކްސްގައި ބުނެފައިވަނީ، އެންމެ ފަހުން ދިން ހަމަލާތަކުގައި އީރާނުގެ އަސްކަރީ ކޮމާންޑް ސެންޓަރުތަކަށާއި ކަނޑުގެ ގާބިލުކަން ހުރި ވަސީލަތްތަކަށާއި މިސައިލާއި ޑްރޯން ފޮނުވާ ސައިޓްތަކުގެ އިތުރުން ވައިގެ ދިފާއީ ނިޒާމުތަކަށް ހަމަލާދީފައިވާނެ ކަމަށެވެ.

ސެންޓްރަލް ކޮމާންޑުން ބުނި ގޮތުގައި، ވިޔަފާރި އުޅަނދުފަހަރު އަދިވެސް ދަނީ ހޮރްމޫޒް ކަނޑުއޮޅި ހުރަސްކޮށް ދަތުރުކުރަމުންނެވެ.

އީރާންގެ ދައުލަތުގެ ނިއުސް އެޖެންސީން ބުނެފައިވަނީ، އެ ކަނޑުއޮޅިން ދަތުރުކުރަނިކޮށް އެ ގައުމުން ހަމަލާދިން ދެ ތެޔޮ ޓޭންކަރުގެ ފަޅުވެރިން ސަލާމަތްކުރުމުގެ މަސައްކަތް ރެސްކިއު ޓީމުތަކުން ކުރަމުން އަންނަ ކަމަށެވެ.