އިންޓެލިޖެންސާ ހިލާފަށް، 2020ގެ އިންތިހާބަށް ޗައިނާއިން ނުފޫޒު ފޯރުވި ކަމަށް ޓްރަމްޕް ތުހުމަތުކުރައްވައިފި

އެމެރިކާގައި 2020 ވަނަ އަހަރު ބޭއްވި ރިޔާސީ އިންތިހާބަށް ބެއިޖިންގްއިން ބަދަލެއް ގެނައި ކަމުގެ އެއްވެސް ހެއްކެއް ނެތް ކަމަށް ކުރީގެ އިންޓެލިޖެންސް ދިރާސާތަކުން ދެއްކި ނަމަވެސް، އެ އިންތިހާބަށް ޗައިނާއިން ނުފޫޒު ފޯރުވާފައިވާކަން ހާމަކޮށްދޭ ބައެއް ލިޔެކިޔުންތައް ސިއްރު ނޫން އެއްޗެހީގެ ގޮތުގައި އެމެރިކާގެ ރައީސް ޑޮނަލްޑް ޓްރަމްޕް އިއްޔެ އާންމުކުރައްވައި، އިންތިހާބުގެ ސަލާމަތީ ކަންކަން ވަރުގަދަކުރުމަށް އަލުން ގޮވާލައްވައިފި އެވެ.

ޓީވީ މެދުވެރިކޮށް ދެއްވި ހިތޯބެއްގައި ޓްރަމްޕް ވިދާޅުވީ، އެ ލިޔެކިޔުންތަކުން އިންތިހާބީ ނިޒާމުގައި ހުރި ހައިރާންކުރުވަނިވި ބަލިކަށިކަން ހާމަވެގެންދާ ކަމަށާއި، ޗައިނާއިން އެމެރިކާގެ 220 މިލިއަން ވޯޓުލާ މީހުންގެ މައުލޫމާތު ހޯދާފައިވާ ކަމަށް ތުހުމަތުކުރެވޭ އެވެ. އަދި ވޯޓުލުމަށްޓަކައި ވޯޓުލާ މީހުންގެ އައިޑީ އާއި ރައްވެހިކަން ސާބިތުކޮށްދޭ ހެކި ބޭނުންވާ ގޮތަށް ގާނޫނެއް ފާސްކުރުމަށް ކޮންގްރެސްއަށް އޭނާ ބާރުއެޅުއްވި އެވެ.

ނަމަވެސް، 2021 ވަނަ އަހަރުގެ އެމެރިކާގެ އިންޓެލިޖެންސް ރިޕޯޓެއްގައި ނިންމާފައިވަނީ، 2020ގެ އިންތިހާބުގައި ވޯޓުލާ މީހުންގެ ރަޖިސްޓްރީ، ވޯޓު ކަރުދާސް ނުވަތަ ނަތީޖާއަށް ބޭރުގެ އެއްވެސް ފަރާތަކުން ޓެކްނިކަލް ގޮތުން ބަދަލެއް ގެނައި ކަމުގެ އެއްވެސް ހެއްކެއް ނެތް ކަމަށެވެ. ރޮއިޓާސްއިން ރިޕޯޓްކޮށްފައިވާ ގޮތުގައި، ސިއްރު ހިފެހެއްޓުން އުވާލައި އާންމުކުރި ބައެއް ލިޔެކިޔުންތަކުން ވެސް ބާރުދެނީ އެ ނިންމުމަށެވެ. ނުވަތަ އެއީ އެމެރިކާގެ އިންތިހާބީ ނިޒާމުތަކާ އެއްވެސް ގުޅުމެއް ނެތް ލިޔުންތަކެކެވެ.

ޓްރަމްޕްގެ މި ވާހަކައިގެ ކުރިން ޗައިނާއިން ވަނީ މި ތުހުމަތުތައް ދޮގުކޮށްފަ އެވެ. އެމްބަސީގެ ތަރުޖަމާނު ލިއު ޗޭންގް ވިދާޅުވީ، ޗައިނާއިން ދުވަހަކު ވެސް އެމެރިކާގެ ރިޔާސީ އިންތިހާބަށް ނުފޫޒެއް ނުފޯރުވާ ކަމަށާއި ކުރިއަށް އޮތް ތަނުގައި ވެސް ނުފޯރުވާނެ ކަމަށެވެ.

ޑިމޮކްރެޓިކް ސެނެޓަރު މާކް ވޯނާ ޓްރަމްޕްގެ ތުހުމަތުތަކަށް ފާޑުވިދާޅުވަމުން ވިދާޅުވީ، އިންޓެލިޖެންސް އިދާރާތަކުން އިއްތިފާގުވާ ގޮތުގައި، 2020ގެ އިންތިހާބުގައި އެންމެ ވޯޓެއް ވެސް ބަދަލުކުރުމަށް ޗައިނާއިން މަސައްކަތްކޮށްފައި ނުވާ ކަމަށެވެ.