ގައުމުތަކުން އެމެރިކާއަށް ވުރެ ބޮޑަށް މިހާރު ގަޔާވަނީ ޗައިނާއާ: ސާވޭ

ޕިއު ރިސާޗު ސެންޓަރުން 36 ގައުމެއްގެ 42،000އަށް ވުރެ ގިނަ މީހުން ބައިވެރިކޮށްގެން ހެދި އާ ދިރާސާއަކުން ދައްކާ ގޮތުގައި، ދިރާސާކުރެވުނު ގިނަ ގައުމުތަކުގައި ފުރަތަމަ ފަހަރަށް އެމެރިކާއަށް ވުރެ ބޮޑަށް ޗައިނާއާ މެދު ދެކޭ ގޮތް ރަނގަޅުވެއްޖެ އެވެ.

މި ސާވޭން ދެއްކި ގޮތުގައި، ދިރާސާކުރި 36 ގައުމުގެ ތެރެއިން 25 ގައުމެއްގައި އެމެރިކާއަށް ވުރެ ބޮޑަށް ޗައިނާއަށް ކުރާ ތާއީދު ބޮޑެވެ. މިއީ 2002 ވަނަ އަހަރުން ފެށިގެން ދުނިޔޭގެ ގައުމުތަކުގެ ޝުއޫރުތައް ބަލަން ޕިއުން ފެށި ފަހުން މިފަދަ ނަތީޖާއެއް ރެކޯޑުކުރެވުނު ފުރަތަމަ ފަހަރެވެ. ޗައިނާއާ ދިމާލަށް ހިޔާލު އެންމެ ބޮޑަށް ބަދަލުވި ގައުމުތަކުގެ ތެރޭގައި ސްޕެއިން، އިޓަލީ، ކެނެޑާ، އިންޑޮނޭޝިއާ އަދި ގްރީސް ހިމެނެ އެވެ.

ޗައިނާގެ ރައީސް ޝީ ޖިންޕިންގް އާއި އެމެރިކާގެ ރައީސް ޑޮނަލްޑް ޓްރަމްޕަށް އޮތް އިތުބާރު އާންމުކޮށް ދަށްކޮށް ހުރި ނަމަވެސް، ސާވޭގައި ބައިވެރިވި މީހުން ޓްރަމްޕަށް ވުރެ ބޮޑަށް ޝީއަށް ކުރާ އިތުބާރު ބޮޑުކަން ހާމަކޮށްފައިވެ އެވެ.

މީގެ އިތުރުން، އަމިއްލަ މިނިވަންކަމަށް އިހުތިރާމްކުރުމުގައި އެމެރިކާ މާ ރަނގަޅު ކަމަށް އަދިވެސް ބެލެވުނު ނަމަވެސް، ސާވޭގައި ބައިވެރިވި މީހުންގެ %75 ގަބޫލުކުރާ ގޮތުގައި އެމެރިކާއިން އެހެން ގައުމުތަކުގެ ދާހިލީ ކަންކަމުގެ ތެރެއަށް ވަދެގަނެ އެވެ. އެއާ ހިލާފަށް ޗައިނާއާ މެދު އެގޮތަށް ދެކެނީ އެންމެ %45 މީހުންނެވެ.

މި ދިރާސާގައި މަސައްކަތްކުރި ޖޮނަތަން ޝުލްމަން ވިދާޅުވީ، މިއީ އެމެރިކާއަށް ވުރެ ގިނަ ގައުމުތަކެއްގައި ޗައިނާ ކުރި ހޯދި ތަން ޕިއުއަށް ފެނުނު ފުރަތަމަ ފަހަރު ކަމަށެވެ.

އެނަލިސްޓް ޗޮންގް ޖާ އިއާން ވިދާޅުވި ގޮތުގައި، މި ހޯދުންތަކުން ދައްކައިދެނީ އެމެރިކާގެ ސިޔާސަތުތަކަށް އަންނަ އަވަސް ބަދަލުތަކާ މެދު އޮތް ކަންބޮޑުވުންތަކެވެ. އަދި މި ވަގުތުގެ ހާލަތަށް ބަލާއިރު ޗައިނާއަކީ އަންދާޒާކުރަން މާ ފަސޭހަ ގައުމެއްގެ ގޮތުގައި ފެންނަ ކަމަށާއި ބެއިޖިންގްއިން ދަނީ ހާއްސަކޮށް ތަރައްގީވަމުން އަންނަ ގައުމުތަކުގައި އެ ގައުމުގެ ތަސައްވުރު ރަނގަޅުކުރުމަށް މަސައްކަތްކުރަމުން ކަމަށް ވެސް އޭނާ ވިދާޅުވި އެވެ.