ބަޔަކު ސޯޝަލް މީޑިއާ އެޕްތަކެއް ބޭނުންކުރަނީ. (ފޮޓޯ/ރޮއިޓާސް)
އީޔޫން 13 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން ހަނިކުރަނީ
އުމުރަށް ބަލައި ކުޑަކުދިން ސޯޝަލް މީޑިއާ ބޭނުންކުރުން ހަނިކުރާނެ އާ އުސޫލުތަކެއް ތައާރަފުކުރުމަށް ޔޫރަޕިއަން ޔޫނިއަން (އީޔޫ)ން ތައްޔާރުވެއްޖެ އެވެ.
ޔޫރަޕިއަން ކޮމިޝަނުގެ ރައީސް އުރުސުލާ ފޮން ޑެއިލަޔަން ވަނީ، އިންޓަނެޓްގެ ވަސީލަތްތައް ބޭނުންކުރާ ޒުވާން ކުދިން ރައްކާތެރިކުރުމަށްޓަކައި އެ އިއްތިހާދުން މިހާތަނަށް ހިންގާ އެންމެ ފުޅާ މަޝްރޫއުގެ ދަށުން މި ފިޔަވަޅުތައް އެޅުމަށް ރާވާފައިވާކަން އިއްޔެ އިއުލާން ކުރައްވާފަ އެވެ.
ބްރަސަލްސްގައި ވާހަކަދައްކަވަމުން ފޮން ޑެއިލަޔަން ވިދާޅުވީ، ސޯޝަލް މީޑިއާ ބޭނުންކުރުމުގައި މަރުހަލާތަކަކަށް ބަހާލައިގެން އަމަލުކުރުމަށް ތަޖުރިބާކާރުން ދެއްވާފައިވާ ލަފާގެ މައްޗަށް ބިނާކޮށް ޔޫރަޕިއަން ކޮމިޝަނުން ގާނޫނެއް އެކުލަވާލާނެ ކަމަށެވެ. މި ހުށަހެޅުމުގެ ދަށުން، އުމުރުން 13 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރެވޭނީ މައިންބަފައިން، ބަލަދުވެރިން ނުވަތަ މުދައްރިސުންގެ ބެލުމުގެ ދަށުން ވަކި ވަގުތުތަކެއްގަ އެވެ. އަދި ކުދިންގެ އުމުރުން ދުވަސްވާ ވަރަކަށް މި ހަނިކުރުންތަކަށް ލުއިތަކެއް ދެވޭނެ އެވެ.
"ޕްލެޓްފޯމްތަކުގައި އުމުރާ ގުޅޭ ހަނިކުރުންތަކެއް ހުންނަންޖެހޭކަން ވަރަށް ސާފު،" ފޮން ޑެއިލަޔަން ވިދާޅުވި އެވެ.
"ސުވާލަކީ މިހާރު ކުދިންނަށް އިންޓަނެޓުން ނުރައްކާ ކުރިމަތިވޭތޯ ނުވަތަ ނޫންތޯއެއް ނޫން. ސުވާލަކީ ކުދިންނަށް އިންޓަނެޓުގައި ރައްކާތެރި ފެށުމެއް ހޯދައިދިނުމަށް އަޅުގަނޑުމެންނަށް ކުރެވޭނީ ކޮން ކަމެއްތޯ."
އޭނާ ވިދާޅުވީ، ހޫނު މޫސުމުގެ ޗުއްޓީއަށް ފަހު ކޮމިޝަނުން ރަސްމީ ހުށަހެޅުމެއް ހުށަހަޅާނެ ކަމަށް ބެލެވޭ ކަމަށާއި ސެޕްޓެމްބަރު މަހު ބާއްވާ 'ސްޓޭޓް އޮފް ދަ ޔޫނިއަން' ހިތޯބުގައި މިކަން ރަސްމީކޮށް އިއުލާން ކުރައްވާނެ ކަމަށެވެ.
ފޮން ޑެއިލަޔަން ވިދާޅުވި ގޮތުގައި، މި ފިޔަވަޅުތައް މައިގަނޑު ގޮތެއްގައި އަމާޒުކުރާނީ ސޯޝަލް މީޑިއާ ޕްލެޓްފޯމްތަކަށެވެ. ނަމަވެސް މީގެ އިތުރުން އުމުރާ ނުގުޅޭ އަދި ދެވިހިފާ ފަދަ ސިފަތައް އެކުލެވޭ އިންޓަނެޓްގެ އެހެނިހެން ހިދުމަތްތައް ވެސް މީގެ ދަށުން ހިމެނޭނެ އެވެ. އޭނާ މި މަޝްރޫއުގެ ދާއިރާ ސިފަކުރެއްވީ "ސޯޝަލް މީޑިއާ ޕްލަސް"ގެ ގޮތުގަ އެވެ.
އޮސްޓްރޭލިއާ، އިނގިރޭސިވިލާތް، ޗައިނާ، އިންޑިއާ އަދި އެމެރިކާ ހިމެނޭހެން ބައެއް ގައުމުތަކުން މިހާރު ވެސް ވަނީ ކުޑަކުދިން ސޯޝަލް މީޑިއާ ބޭނުންކުރުމާާ ދެކޮޅަށް މިފަދަ ހަނިކުރުންތައް ތައާރަފުކޮށްފަ އެވެ. ނުވަތަ އެފަދަ ފިޔަވަޅުތަކެއް އެޅުމަށް ވިސްނަމުންދެ އެވެ.
ކޮމެންޓް (1)
މޯޑު 10