ފައިސާ ނުލިބުމުން އިންޑިއާގެ އަޔޯދިއާ މިސްކިތް ކުޑަކުރަން މަޖުބޫރުވެއްޖެ

އިންޑިއާގެ އަޔޯދިއާ ބިމުގެ މައްސަލައިގައި 2019 ވަނަ އަހަރު އެކުލަވާލި ސުލްހައިގެ އެއްބަސްވުމުގެ ދަށުން ބިނާކުރަން ރޭވި މިސްކިތުގެ މަޝްރޫއު، އާންމުންގެ ފަރާތުން ލިބުނު ފައިސާ މަދުވުމުގެ ސަބަބުން ވަރަށް ބޮޑަށް ކުޑަކޮށްލާފައިވާ ކަމަށް އިންޑޯ-އިސްލާމިކް ކަލްޗަރަލް ފައުންޑޭޝަން (އައިއައިސީއެފް)ގެ އޮފިޝަލުން އިއްޔެ ވިދާޅުވެއްޖެ އެވެ.

މި މަޝްރޫއު ފެށުނީ އިންޑިއާގެ ސުޕްރީމް ކޯޓުން، މައްސަލަ ޖެހިފައިވާ އަޔޯދިއާގެ ބިން ހިންދޫންނަށް ދިނުމަށް ނިންމައި މުސްލިމް މުޖުތަމައުގެ ފަންޑުން ބިނާކުރާ މިސްކިތަކަށް އުއްތަރަ ޕްރަދޭޝް ސަރުކާރުން ބަދަލު ބިމެއް ހަމަޖައްސައިދިނުމަށް އެންގުމާ ގުޅިގެންނެވެ.

އައިއައިސީއެފްގެ ޗެއާމަން ޒުފަރު އަހުމަދު ފާރޫގީ ވިދާޅުވީ، އެކަށީގެންވާ ވަރަށް ދާއިމީ އެހީ ނުލިބުމުގެ ސަބަބުން، މިސްކިތަކާއި 300 އެނދުގެ މަލްޓި-ސްޕެޝަލިޓީ ހޮސްޕިޓަލެއް އަދި ކުތުބުހާނާއެއް ހިމެނޭ ގޮތަށް އެކުލަވާލި ޕްލޭން މިހާރު ދޫކޮށްލާފައިވާ ކަމަށެވެ.

"މުޖުތަމައުގެ ފަރާތުން މިކަމަށް އޮތް ޝައުގުވެރިކަން ކުޑަ އަދި ލިބުނު އެހީގެ ފައިސާ ވެސް އެކަށީގެން ނުވޭ. މިހާރު އަޅުގަނޑުމެން ނިންމާފައިވަނީ ފުރަތަމަ ހުށަހެޅި މިސްކިތަށް ވުރެ މާ ކުޑަ މިސްކިތެއް ބިނާކުރަން،" ފާރޫގީ ވިދާޅުވި އެވެ.

އައިއައިސީއެފްގެ ސެކްރެޓަރީ އަތަރު ހުސައިން ވިދާޅުވި ގޮތުގައި، އަލުން އިސްލާހުކުރި މަޝްރޫއަށް 30 މިލިއަނާއި 50 މިލިއަނާ ދެމެދުގެ އިންޑިއަން ރޫޕީސް (314،000 އާއި 523،000 ޑޮލަރު) ބޭނުންވެ އެވެ. ނަމަވެސް މިހާތަނަށް އެއްކުރެވިފައިވަނީ އެންމެ 15 މިލިއަން ރޫޕީސް އެވެ.

މިސްކިތް ބިނާކުރުމުގެ މަޝްރޫއަށް ބޮޑެތި ގޮންޖެހުންތަކެއް ކުރިމަތިވެފައިވީ ނަމަވެސް، ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ)ން ވަނީ، މައްސަލަ ޖެހިފައިވާ އެ ބިމުގައި ރާމް ފައްޅި ބިނާކޮށް، އެ ޕާޓީން ޒަމާނުއްސުރެ ވަމުން އައި ވައުދު ފުއްދާފަ އެވެ. މި ފައްޅި ރަސްމީކޮށް ހުޅުއްވައިދެއްވީ 2024 ވަނަ އަހަރުގެ އާންމު އިންތިހާބުގެ ކުރިން ބޮޑުވަޒީރު ނަރެންދުރަ މޯދީ އެވެ.

ސޯޅަ ވަނަ ގަރުނުގެ ބާބްރީ މިސްކިތް 1992 ވަނަ އަހަރު ތަޅާލި ހާދިސާއަށް ފަހު، އަޔޯދިއާ ބިމުގެ މައްސަލައަކީ އިންޑިއާގައި ދީނީ ގޮތުން އެންމެ ނާޒުކު އެއް މައްސަލަ އެވެ. އެ ހާދިސާއާ ގުޅިގެން މުޅި ގައުމުގައި ހިންގި ހަމަނުޖެހުންތަކުގައި ގާތްގަނޑަކަށް 2،000އެއްހާ މީހުން މަރުވެފައިވާއިރު، އޭގެ ތެރެއިން ގިނައީ މުސްލިމުންނެވެ.