ޕާކިސްތާނުގެ ކާގޯ މަތިންދާބޯޓެއް ގެއްލިގެން ހޯދަނީ

ފަސް ފަޅުވެރިންނާ އެކު ދަތުރުކުރި، ޕާކިސްތާނުގައި ރަޖިސްޓްރީކޮށްފައިވާ ބޮއިން 737 މަރުކާގެ މުދާ އުފުލާ މަތިންދާބޯޓެއް ރޭ ކަރާޗީއަށް ޖައްސަން ކައިރިވަމުންދަނިކޮށް އެއާ ޓްރެފިކް ކޮންޓްރޯލާ ގުޅުން ކެނޑި، އެ ބޯޓު ގެއްލުމާ ގުޅިގެން، ފުޅާދާއިރާއެއްގައި އެ ބޯޓު ހޯދުމާއި ސަލާމަތްކުރުުމުގެ ހަރަކާތްތަކެއް ފަށައިފި އެވެ.

ޕާކިސްތާން އެއާޕޯޓްސް އޮތޯރިޓީން ބުނި ގޮތުގައި، 'ކޭ2 އެއާވޭސް' އިން އޮޕަރޭޓްކުރާ މި ބޯޓުން އެ ގައުމުގެ ގަޑިން ރޭގަނޑު 9:18 ގައި ނެވިގޭޝަން ނިޒާމަށް މައްސަލައެއް ދިމާވެގެން ރިޕޯޓްކުރި އެވެ. އެއާ ޓްރެފިކް ކޮންޓްރޯލަރުން ބޯޓަށް މަގުދައްކައިދޭން މަސައްކަތްކުރި ނަމަވެސް، އޭގެ ތިން މިނެޓު ފަހުން ބޯޓާ ގުޅުން ވަނީ ކެނޑިފަ އެވެ. ރާޑަރުން ދެއްކި ގޮތުގައި، ބޯޓު ދިޔައީ ކަރާޗީގެ ހުޅަނގުން ގާތްގަނޑަކަށް 155 ނޯޓިކަލް މޭލު ބޭރުން ވަރަށް ބާރަށް ތިރިއަށް ފަބަމުންނެވެ.

'ފްލައިޓްރާޑާ24'ގެ ފްލައިޓް ޓްރެކިން ތަފާސްހިސާބުތަކުން ދައްކާ ގޮތުގައި، އުސްމިނަށް އައި އާދަޔާހިލާފު ބަދަލުތަކަކަށް ފަހު، 27 އަހަރުވެފައިވާ މި ކާގޯ ބޯޓު އަރަބި ކަނޑަށް ވެއްޓިފައިވުން އެކަށީގެންވެ އެވެ. ބޯޓުން އެންމެ ފަހުން ލިބުނު މައުލޫމާތުތަކުން ދައްކާ ގޮތުގައި، ބޯޓު އޮތީ 1,100 ފޫޓުގެ އުސްމިނެއްގަ އެވެ. އަދި އޭރު ބޯޓު ތިރިއަށް ފައިބަމުންދިޔައީ އާދަޔާހިލާފު ބާރުމިނެއްގަ އެވެ.

ކޭ2 އެއާވޭސްއިން ބުނީ އޭވިއޭޝަންގެ ކަމާބެހޭ އިދާރާތަކަށް ފުރިހަމަ އެހީތެރިކަން ދެމުންދާ ކަމަށެވެ.

"އަޅުގަނޑުމެންގެ އެކުވެރި ފަޅުވެރިންގެ ސަލާމަތްތެރިކަމަށްޓަކައި ދުއާކުރުންމަތީ ދެމިތިބޭނަން،" އެ ކުންފުނިން ބުންޏެވެ.

ގެއްލިފައިވާ ބޯޓަކީ އެ އެއާލައިންގައި އޮތް ހަމައެކަނި ބޯޓެވެ. އެ ބޯޓު އެއާލައިންގެ ހިދުމަތަށް ނެރެފައިވަނީ 2024 ވަނަ އަހަރު އެވެ. މި ހާދިސާގައި ބަޔަކު މަރުވިކަން ކަށަވަރުވެއްޖެ ނަމަ، މިއީ 2020 ވަނަ އަހަރު ކަރާޗީއަށް ވެއްޓި 97 މީހުން މަރުވި އެއާބަސް އޭ320 ބޯޓުގެ ހާދިސާއަށް ފަހު، ޕާކިސްތާނުގައި ހިނގި ފުރަތަމަ ނުރައްކާތެރި ވައިގެ ހާދިސާއަށް ވާނެ އެވެ.