އަގުތައް ދަށަށް ދާތީ، ތެޔޮ އުފެއްދުން އިތުރުކުރަން އޯޕެކް ޕްލަސްއިން ނިންމައިފި

ހޮރްމޫޒް ކަނޑުއޮޅިން ތެޔޮ އެކްސްޕޯޓްކުރުން މަޑުމަޑުން އަލުން ފެށޭތީ ތެލުގެ އަގުތައް ދަށަށް ދިއުމާ ގުޅިގެން، އަންނަ މަހުން ފެށިގެން ދުވާލަކު 188،000 ފީފާގެ ތެޔޮ އިތުރަށް އުފެއްދުމަށް، ދުނިޔޭގައި އެންމެ ގިނައިން ތެޔޮ އުފައްދާ ގައުމުތައް ހިމެނޭ އޯޕެކް ޕްލަސް އިން އިއްޔެ އެއްބަސްވެއްޖެ އެވެ.

އޮންލައިންކޮށް ބޭއްވި ބައްދަލުވުމެއްގައި ފާސްކުރި މި އިތުރުކުރުމަކީ، މިދިޔަ މަހާއި މި މަހު ވެސް ތެޔޮ އުފައްދާ މިންވަރު އިތުރުކުރުމަށް ނިންމި ނިންމުންތަކާ ގުޅިގެން ނިންމި ނިންމުމެކެވެ.

މި އިއްތިހާދުގައި ހިމެނޭ އެންމެ މުހިންމު ހަތް ގައުމުން ވަނީ އޭޕްރީލް މަހުން ފެށިގެން ތެޔޮ އުފައްދާ މިންވަރު ދުވާލަކު ގާތްގަނޑަކަށް 800،000 ފީފާއަށް އިތުރުކޮށްފަ އެވެ. ނަމަވެސް، އެމެރިކާ އާއި އިޒްރޭލުން އީރާނާ އެކު ކުރި ހަނގުރާމައިގެ ސަބަބުން ހޮރްމޫޒް ކަނޑުއޮޅިން ދަތުރުކުރާ ތެޔޮ ޓޭންކަރުތަކަށް ހުރަސްތައް ކުރިމަތިވެ، ތެޔޮ އިތުރުކުރުމަށް ނިންމި ނިންމުންތަކަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ.

އޯޕެކްގެ ތަފާސްހިސާބުތަކުން ދައްކާ ގޮތުގައި، ފެބުރުއަރީ މަހު ދުވާލަކު 42.77 މިލިއަން ފީފާގެ ތެޔޮ އުފެއްދި ނަމަވެސް، މޭ މަހު އެ މިންވަރު ވަނީ 33.13 މިލިއަން ފީފާއަށް ދަށަށް ގޮސްފަ އެވެ. އަދި މިދިޔަ މަހުގެ ތެރޭގައި މި މިންވަރު ވަނީ ކުޑަކޮށް ރަނގަޅުވާން ފަށާފަ އެވެ.

ޔޫބީއެސްގެ އެނަލިސްޓް ޖިއޮވާނީ ސްޓައުނޯވޯ ވިދާޅުވީ، މިއީ ކުރިން ވެސް ލަފާކުރެވިފައިވާ ނިންމުމެއް ކަމަށެވެ.

"ކުރިއަށް އޮތް ތަނުގައި އެންމެ ބޮޑު ސަމާލުކަމެއް ހުންނާނީ، ހޮރްމޫޒް ކަނޑުއޮޅި ހުރަސްކޮށް ކިތައް ތެޔޮ ޓޭންކަރަށް ދަތުރުކުރެވޭތޯ ބެލުމަށާއި ޗައިނާގެ ތެލުގެ ޑިމާންޑާއި އެ ގައުމުން ސާފުނުކުރާ ތެޔޮ އެތެރެކުރާ މިންވަރު ކިހާ އަވަހަކަށް އިއާދަވޭތޯ ބެލުމަށް،" އޭނާ ވިދާޅުވި އެވެ.

ހަނގުރާމައިގެ ދުވަސްވަރު ބްރެންޓް ކުރޫޑް ތެލުގެ އަގު ފީފާއަކަށް 120 ޑޮލަރަށް ވުރެ މައްޗަށް ދިޔަ ނަމަވެސް، ހުކުރު ދުވަހު ބާޒާރުގައި ތެލުގެ އަގު ހުރީ ފީފާއަކަށް 72 ޑޮލަރާ ގާތްކުރާ މިންވަރެއްގަ އެވެ.

މީގެ އިތުރުން، ޔޫއޭއީ މި އިއްތިހާދުން ވަކިވުމާއި ތެޔޮ އުފައްދާ މިންވަރު އިތުރުކުރުމަށް އިރާގުން އެދެމުންދާތީ، އޯޕެކް ޕްލަސްއަށް ވަނީ ޕްރެޝަރުތަކެއް ކުރިމަތިވެފަ އެވެ. ސެޕްޓެމްބަރު މަހު ވެސް މިފަދަ މިންވަރަކަށް ތެޔޮ އުފައްދާ މިންވަރު އިތުރުކޮށްފި ނަމަ، 2023 ވަނަ އަހަރު ތެޔޮ އުފެއްދުން މަދުކުރުމަށް އެ ގްރޫޕުން ނިންމި ނިންމުންތައް އެއްކޮށް އުވާލެވޭނެ އެވެ.