އިޒްރޭލާއި ލުބުނާނުން ވަގުތީ އެއްބަސްވުމެއްގައި ސޮއިކޮށްފި

އިޒްރޭލާއި ލުބުނާނުން، އެމެރިކާ މެދުވެރިވެގެން އެކުލަވާލި ވަގުތީ އެއްބަސްވުމެއްގައި އިއްޔެ ވޮޝިންޓަންގައި ސޮއިކޮށްފި އެވެ.

މިއީ އިޒްރޭލާއި އީރާނުގެ މަދަދުލިބޭ ހިޒްބުއްލޯ ޖަމާއަތާ ދެމެދު މަސްތަކެއް ވަންދެން ހިނގަމުންދިޔަ ހަނގުރާމަ ހުއްޓާލުމަށް އެޅުނު ފުރަތަމަ ފިޔަވަޅު ކަމަށް ދެ ފަރާތުން ވެސް ވަނީ ސިފަކޮށްފަ އެވެ.

އެމެރިކާގެ ސްޓޭޓް ޑިޕާޓްމަންޓްގައި ބޭއްވި ރަސްމިއްޔާތެއްގައި މި އެއްބަސްވުމުގައި ސޮއިކުރެއްވީ ލުބުނާނުން އެމެރިކާއަށް ކަނޑައަޅުއްވާފައި ހުންނަވާ ސަފީރު ނަދާ މުއައްވަދާއި އިޒްރޭލުން އެމެރިކާއަށް ކަނޑައަޅުއްވާފައި ހުންނަވާ ސަފީރު ޔެޗިއެލް ލައިޓާގެ އިތުރުން އެމެރިކާ ސަރުކާރުންނެވެ.

އެމެރިކާގެ ހާރިޖީ ވަޒީރު މާކޯ ރޫބިއޯ މި އެއްބަސްވުން ސިފަކުރެއްވީ، "ޝައްކެއް ވެސް ނެތް ގޮތުގައި އުނދަގޫ، ނަމަވެސް މުހިންމު، ޒަރޫރީ އަދި ކޮންމެހެން ބޭނުންތެރި ދަތުރެއްގެ ފުރަތަމަ ފިޔަވަޅު"ގެ ގޮތުގަ އެވެ. އޭނާ ވިދާޅުވީ، ލުބުނާނަށް ހާއްސަކޮށްގެން އަލަށް އުފައްދާ 'މިލިޓަރީ ކޯޑިނޭޝަން ގްރޫޕް' މެދުވެރިކޮށް އެމެރިކާއިން މި އެއްބަސްވުން ތަންފީޒުކުރާ ގޮތް ބަލަމުންދާނެ ކަމަށެވެ. މީގެ އިތުރުން، އިންސާނީ އެހީގެ ގޮތުގައި ވަގުތުން 100 މިލިއަން އެމެރިކާ ޑޮލަރު ދިނުމަށާއި ލުބުނާނުގެ އަސްކަރިއްޔާ ވަރުގަދަކުރުމަށް 30 މިލިއަނަށް ވުރެ ގިނަ ޑޮލަރު ފޯރުކޮށްދިނުމަށް އެމެރިކާއިން ވަނީ ނިންމާފަ އެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ، ހިޒްބުއްލޯގެ ހަތިޔާރު ނަގާ ނިމެންދެން އިޒްރޭލުގެ ސިފައިންނަށް ލުބުނާނުގެ ދެކުނުގައި ތިބުމުގެ ހުއްދަ މި އެއްބަސްވުމުގެ ދަށުން ލިބިގެންދާނެ ކަމަށެވެ. ނަމަވެސް، ލުބުނާނުގެ ސިފައިންނާ ކޮންޓްރޯލް ހަވާލުކުރުމަށްޓަކައި، އިޒްރޭލުގެ ސިފައިން ފުރަތަމަ 'ޕައިލެޓް ޒޯން' ނުވަތަ ޓެސްޓް ކުރެވޭ ދެ ސަރަހައްދަކުން ފަހަތަށް ޖެހެން ފަށާނެ ކަމަށް އޭނާ ވިދާޅުވި އެވެ.

ލުބުނާނުގެ ރައީސް ޖޯސެފް އަައުން ވިދާޅުވި ގޮތުގައި، މި އެއްބަސްވުމުގެ ސަބަބުން ގެދޮރު ގެއްލިފައިވާ ރައްޔިތުންނަށް "މުޅިން މިނިވަންކުރެވިފައިވާ" ސަރަހައްދުތަކަށް އެނބުރާ ގޮސް، އާރާސްތުކުރުމުގެ ފުރުސަތު ލިބިގެންދާނެ އެވެ. އަދި ސަފީރު މުއައްވަދު ވެސް ވަނީ މިއީ ލުބުނާނުގެ މިނިވަންކަމާއި ސިޔާދަތު އަލުން ގާއިމުކުރުމަށް އެޅުނު ފުރަތަމަ ފިޔަވަޅު ކަމަށް ވިދާޅުވެފަ އެވެ.

ނަމަވެސް، ހިޒްބުއްލޯއިން ވަނީ މި ވަގުތީ އެއްބަސްވުން ގަބޫލުކުރުމަށް ދެކޮޅު ހަދާފަ އެވެ. އެ ޖަމާއަތުގެ ގާނޫނުހަދާ މަޖިލީހުގެ މެންބަރު ހަސަން ފަލްލައްލޯ ވިދާޅުވީ، ހަތިޔާރު އަތުލުމަށް ކުރާ ކޮންމެ މަސައްކަތަކާ ދެކޮޅަށް އެ ޖަމާއަތުން ހަނގުރާމަކުރާނެ ކަމަށާއި ކުރިއަށް ވުރެ ވެސް ބޮޑަށް ހަތިޔާރު ދަމަހައްޓާނެ ކަމަށެވެ. އަދި އެ މީހުންގެ މި ދެކޮޅު ހެދުމަކީ ސީރިއަސް އިންޒާރެއް ކަމަށް ވެސް އޭނާ ވިދާޅުވި އެވެ.

މި އެއްބަސްވުމުގައި ސޮއިކުރި ނަމަވެސް، ސަރަހައްދުގެ ނުތަނަވަސްކަން އަދިވެސް އޮތީ ވަރަށް މަތީގަ އެވެ. އިޒްރޭލުން ބުނި ގޮތުގައި، އެ ގައުމުގެ ސިފައިން ވަނީ ހިފާފައިވާ ސަލާމަތީ ސަރަހައްދާ ކައިރިން ހިޒްބުއްލޯގެ ހަތް މެންބަރަކު މަރާލާފަ އެވެ. ހަމަ އެއާ އެކު، ލުބުނާނުގެ ދެކުނުގެ ރަށެއް ކަމަށްވާ މަންސޫރީގެ ރައްޔިތުން އެ ސަރަހައްދު ދޫކޮށް ދިއުމަށް އަންގައި، އިޒްރޭލު ސިފައިން ވައިގެ މަގުން އިންޒާރުގެ ފަތްތަކެއް އުކާފައިވާ ކަމަށް ލުބުނާނުގެ ދައުލަތުގެ މީޑިއާއިން ރިޕޯޓްކޮށްފައިވެ އެވެ.