ތެލުގެ އަގު ހަނގުރާމައިގެ ކުރިން ހުރި މިންވަރަށް ދަށަށް ހިނގައްޖެ

މެދުއިރުމަތިން ތެޔޮ ސަޕްލައިކުރާ މިންވަރު އިއާދަވާން ފެށުމާ އެކު، ތެލުގެ ޑިމާންޑާ މެދު ހުރި ކަންބޮޑުވުންތަކަށް ވުރެ ސަޕްލައި އިތުރުވުމުގެ ނަތީޖާއެއްގެ ގޮތުން، ދުނިޔޭގެ ބާޒާރުގައި ތެލުގެ އަގުތައް މިދިޔަ ފެބްރުއަރީ މަހު އީރާނުގެ ހަނގުރާމަ ފެށުނު ފަހުން އެންމެ ދަށަށް ދިޔަ މިންވަރަށް މިއަދު ވެއްޓިއްޖެ އެވެ.

އޮގަސްޓް މަހަށް ސަޕްލައިކުރާ ބްރެންޓް ކްރޫޑްގެ އަގު %1.74 ދަށަށް ގޮސް ފީފާއެއްގެ އަގު 72.46 ޑޮލަރަށް ހުރިއިރު، އެމެރިކާގެ ވެސްޓް ޓެކްސަސް އިންޓަމީޑިއަޓް (ޑަބްލިޔުޓީއައި)ގެ އަގު ވަނީ %1.63 ދަށަށް ގޮސް ފީފާއެއްގެ އަގު 69.19 ޑޮލަރަށް ވެއްޓިފަ އެވެ. މިއީ 27 ފެބްރުއަރީގެ ފަހުން މި ދެ ބާވަތުގެ ތެލުގެ އަގު ވެސް މިހާ ދަށަށް ދިޔަ ފުރަތަމަ ފަހަރެވެ.

އެމެރިކާގެ އެނާޖީ ސެކްރެޓަރީ ކްރިސް ރައިޓް ވިދާޅުވީ، ހޮރްމޫޒް ކަނޑުއޮޅި މެދުވެރިކޮށް ތެޔޮ އުފުލާ މިންވަރު މިހާރު ގާތްގަނޑަކަށް ހަނގުރާމައިގެ ކުރިން އޮތް ހާލަތަށް ރުޖޫއަވެފައިވާ ކަމަށެވެ. އަދި ފާއިތުވި 24 ގަޑިއިރުގެ ތެރޭގައި އެކަނި ވެސް 20 މިލިއަނަށް ވުރެ ގިނަ ތެޔޮ ފީފާ އެ ކަނޑުއޮޅި ހުރަސްކޮށްފައިވާ ކަމަށް އޭނާ ފާހަގަކުރެއްވި އެވެ.

އޭނާ ވިދާޅުވީ، ކަނޑުއޮޅީގައި އަދިވެސް މައިންތައް ނައްތާލުމުގެ މަސައްކަތް ކުރަންޖެހޭތީ، އޮޕަރޭޝަންތައް ފުރިހަމައަށް އާންމު ހާލަތަކަށް ގެނައުމަށް މަދު ހަފުތާތަކެއް ނަގާނެ ކަމަށެވެ. ނަމަވެސް، މިހާރު ކުރިއަށްދާ ސުލްހައިގެ މަޝްވަރާތައް ނާކާމިޔާބުވި ނަމަވެސް، ކަނޑުއޮޅި އަލުން ބަންދުކުރުމުގެ ފުރުސަތު އީރާނަށް ދެން ނުލިބޭނެ ކަމަށް އޭނާ ވިދާޅުވި އެވެ.

ޔޫބީއެސްގެ އެނަލިސްޓް ޖިއޮވާނީ ސްޓައުނޯވޯ ވިދާޅުވީ، އިއާދަވަމުން އަންނަ ސަޕްލައިގެ ބޮޑު ބަޔަކީ ގަލްފުގެ ގައުމުތަކުން ބޭރުކުރާ ތެޔޮ ކަމަށެވެ. އަދި އެ ސަރަހައްދަށް އެތެރެވާ އުޅަނދުތަކުގެ އަދަދު އިތުރުވުން ބިނާވެގެންވަނީ ކަނޑުދަތުރުފަތުރުގެ އިތުބާރު ބޮޑުވުމުގެ މައްޗަށާއި މައިންތައް ސާފުކުރުމާ އަދި އިންޝުއަރެންސް ހަރަދުތައް ކުޑަވުމުގެ މައްޗަށެވެ.

އެމެރިކާގެ ދަތިކުރުމުގެ ފިޔަވަޅުތަކަށް ވަގުތީ ލުޔެއް ލިބުމާ އެކު އީރާނުން ތެޔޮ އެކްސްޕޯޓްކުރާ މިންވަރު އިތުރުކޮށްފާނެ ކަމަށް ބެލެވޭތީ، އެކަމުގެ އަސަރު ވެސް ބާޒާރަށް ވަނީ ކޮށްފަ އެވެ. ނަމަވެސް، ގޯލްޑްމަން ސެކްސްއިން ބުނީ، ދަތިކުރުމުގެ ފިޔަވަޅުތަކަށް ދީފައިވާ ލުއި، 21 އޮގަސްޓުގައި ހަމަވާ މުއްދަތަށް ވުރެ އިތުރުވި ނަމަވެސް، އީރާނުން ތެޔޮ އުފައްދާ މިންވަރު އާދަޔާހިލާފަށް އިތުރުވެގެންދާނެ ކަމަށް ލަފާނުކުރެވޭ ކަމަށެވެ.

މި ދަނޑިވަޅުގައި، ހޮރްމޫޒް ކަނޑުއޮޅި މެދުވެރިކޮށް ތެޔޮ ޓޭންކަރުތައް ފުރުމަށް ފަސޭހަކޮށްދިނުމުގެ ގޮތުން އޮމާނުން ވަނީ ވަގުތީ ދަތުރުފަތުރުގެ މަގުތަކެއް ހުޅުވާލާފަ އެވެ. އަދި އޮމާންގެ ކަމާބެހޭ އިދާރާތަކާ ގުޅިގެން އިންޓަނޭޝަނަލް މެރިޓައިމް އޯގަނައިޒޭޝަނުން ދަނީ އުޅަނދުތަކުގެ ހަރަކާތްތައް ކޯޑިނޭޓްކުރަމުންނެވެ.

މީގެ އިތުރުން، އިރާގުގެ ތެޔޮ މިނިސްޓްރީގެ އޮފިޝަލަކު ވިދާޅުވީ، އޯޕެކްގެ ތެރޭގައި އިރާގަށް ކަނޑައަޅާފައިވާ ތެޔޮ އުފެއްދުމުގެ ކޯޓާ ބޮޑުނުކޮށްދީފި ނަމަ، އެ ގައުމުން ހުރިހާ ގޮތްތަކަކަށް ވިސްނާފާނެ ކަމަށެވެ. މިއާ އެކު، ޔޫއޭއީން މީގެ ކުރިން އޯޕެކުން ވަކިވެފައިވާތީ، މި ޖަމިއްޔާގެ މުސްތަގުބަލާ މެދު ވަނީ އާ ސުވާލުތަކެއް އުފެދިފަ އެވެ.