އީރާނުގެ ތެޔޮ އެކްސްޕޯޓް ކުރުމަށް އެމެރިކާއިން 60 ދުވަހުގެ ހުއްދައެއް ދީފި

ވޮޝިންޓަނާއި ތެހެރާނާ ދެމެދު ސުލްހައިގެ އެއްބަސްވުމަކަށް އައުމަށް ކުރެވެމުންދާ މަޝްވަރާތަކަށް މަގުފަހިކުރުމުގެ ގޮތުން، އީރާނުގެ ތެލާއި ޕެޓްރޯކެމިކަލް އުފެއްދުންތައް ވިއްކުމަށް އެމެރިކާއިން 60 ދުވަހުގެ ވަގުތީ ހުއްދައެއް އިއްޔެ ދީފި އެވެ.

އެމެރިކާގެ ޓްރެޝަރީ ޑިޕާޓްމަންޓުން ހާމަކުރި ގޮތުގައި، އަންނަ 21 އޯގަސްޓުގެ ނިޔަލަށް އީރާނުގެ ސާފުނުކުރާ ތެލާއި ޕެޓްރޯލިއަމް އަދި ޕެޓްރޯކެމިކަލް އުފެއްދުންތައް އުފެއްދުމާއި ފޯރުކޮށްދިނުމާއި ވިއްކުމުގެ ހުއްދަ މި ނިންމުމުގެ ދަށުން ލިބިގެންދާނެ އެވެ. މީގެ އިތުރުން، ބޭންކިން، އިންޝުއަރެންސް އަދި މުދާ އުފުލުމުގެ ހިދުމަތްތައް ފޯރުކޮށްދިނުމުގެ ހުއްދަ ދީފައިވާއިރު، ފައިސާގެ މުއާމަލާތްތައް އެމެރިކާ ޑޮލަރުން ހިންގުމުގެ ފުރުސަތު ވެސް އޮންނާނެ ކަމަށް އެ އިދާރާއިން ބުނެފައިވެ އެވެ.

އެމެރިކާގެ ޓްރެޝަރީ ސެކްރެޓަރީ ސްކޮޓް ބެސެންޓް ވިދާޅުވީ، މި ލުޔަކީ ދެ ގައުމުގެ ދެމެދުގައި ކުރިއަށްދާ މަޝްވަރާތަކުގައި ލިބެމުންދާ ކުރިއެރުންތަކާ ގުޅިފައިވާ ކަމެއް ކަމަށެވެ.

"ސްވިޒަލޭންޑްގައި ކުރިއަށްދާ ބިނާކުރަނިވި މަޝްވަރާތަކާ އެއްގޮތްވާ ގޮތުގެ މަތިން، ހޮރްމޫޒް ކަނޑުއޮޅިން މިނިވަންކަމާ އެކު ދަތުރުފަތުރު ކުރެވޭނެ އިންތިޒާމު ހަމަޖެއްސުމަށާއި ބައިނަލްއަގުވާމީ އެޓޮމިކް އެނާޖީ އެޖެންސީ (އައިއޭއީއޭ)ގެ އިންސްޕެކްޓަރުންނަށް އީރާނަށް ވަނުމުގެ ހުއްދަ ދިނުމަށް އީރާނުން ވަނީ އެއްބަސްވެފައި،" އޭނާ ވިދާޅުވި އެވެ.

ދަތިކުރުމުގެ ފިޔަވަޅުތަކަށް މި ލުއި ދީފައިވަނީ މިދިޔަ ހަފުތާގައި އެމެރިކާ އާއި އީރާނާ ދެމެދު ސޮއިކުރެވުނު އެމްއޯޔޫގެ ދަށުންނެވެ. މި އެއްބަސްވުމުގެ ދަށުން، އިގްތިސާދީ ލުއިތަކެއްގެ ބަދަލުގައި، ހޮރްމޫޒް ކަނޑުއޮޅިން ދަތުރުކުރާ އުޅަނދުތަކަށް ފަހި ފުރުސަތުތަކެއް ދިނުމަށާއި ނިއުކްލިއާ ތަހުގީގުތަކަށް އެއްބާރުލުން ދިނުމަށް ތެހެރާނުން ވަނީ އެއްބަސްވެފަ އެވެ.

މިއީ 1979 ވަނަ އަހަރުގެ އީރާނު އިންގިލާބަށް ފަހު އަދި އީރާނުގެ ނިއުކްލިއާ ޕްރޮގްރާމާ ގުޅިގެން އެމެރިކާއިން އެ ގައުމުގެ ތެލުގެ ވިޔަފާރިއަށް އަޅާފައިވާ ހަރުކަށި ފިޔަވަޅުތަކަށް މިހާތަނަށް ދިން އެންމެ ބޮޑު އެއް ލުޔެވެ.

މަޝްވަރާތަކުގައި މެދުވެރިއެއްގެ ދައުރު އަދާކުރާ ފަރާތްތަކުން ބުނާ ގޮތުގައި، ސްވިޒަލޭންޑްގައި ބޭއްވުނު ފުރަތަމަ ބުރުގެ ބައްދަލުވުންތަކުން އުންމީދީ ކުރިއެރުންތަކެއް ވަނީ ފެނިފަ އެވެ. މި މަޝްވަރާތަކުގެ މަގުސަދަކީ އީރާނުގެ ނިއުކްލިއާ ހަރަކާތްތަކާއި ސަރަހައްދީ ސަލާމަތާ އަދި ހަކަތަ އެކްސްޕޯޓް ކުރުމާ ގުޅޭ ގޮތުން އުފެދިފައިވާ ދެބަސްވުންތަކަށް ދާއިމީ ހައްލެއް ހޯދައި ފުޅާ ދާއިރާއެއްގައި ސުލްހައިގެ އެއްބަސްވުމަކަށް އައުމެވެ.

މި ނިންމުން އައިސްފައިވަނީ، ދުނިޔޭގެ ހަކަތަ ފޯރުކޮށްދިނުމުގައި މުހިންމު ދައުރެއް އަދާކުރާ ހޮރްމޫޒް ކަނޑުއޮޅީގެ ނުތަނަވަސްކަމާ ގުޅިގެން ދުނިޔޭގެ ތެލުގެ ބާޒާރަށް އައި ލޮޅުންތަކަށް ފަހު، ބާޒާރު ހަމައަކަށް އެޅެމުން އަންނަ ދަނޑިވަޅެއްގަ އެވެ. ހަނގުރާމައިގެ ބިރުވެރިކަމާ އެކު ތެލުގެ އަގު އިންތިހާއަށް އުފުލިފައި އޮތުމަށް ފަހު، ހަމަލާ ބަދަލުކުރުން މެދުކަނޑާލުމުގެ އެއްބަސްވުމާއި ގަލްފުގެ ކަނޑުގެ މަގުތައް އަލުން ހުޅުވުމާ އެކު، މިހާރު ތެލުގެ އަގުތައް ވަނީ ދަށްވާން ފަށާފަ އެވެ.