ކޯޓުން ޓެރިފްތައް ބާތިލުކުރުމުން، އިންޑިއާ-އެމެރިކާގެ މަޝްވަރާތައް ފަސްކޮށްފި

އެމެރިކާގެ ރައީސް ޑޮނަލްޑް ޓްރަމްޕް އިމްޕޯޓް ޑިއުޓީ ނުވަތަ ޓެރިފްތަކަށް ގެންނެވި ބަދަލުތައް އެ ގައުމުގެ ސުޕްރީމް ކޯޓުން ބާތިލުކުރުމާ ގުޅިގެން އުފެދިފައިވާ ނުތަނަވަސްކަމުގެ ސަބަބުން، ވޮޝިންޓަނަށް ކުރަން އޮތް ވިޔަފާރި ވަފުދުގެ ދަތުރު އިންޑިއާއިން ފަސްކޮށްފައިވާ ކަމަށް އެ ގައުމުގެ ވިޔަފާރިއާ ބެހޭ ވުޒާރާގެ އޮފިޝަލަކު މިއަދު ވިދާޅުވެއްޖެ އެވެ.

އެ އޮފިޝަލް ވިދާޅުވި ގޮތުގައި، މި ދަތުރު ފަސްކުރުމަށް ނިންމީ ދެ ގައުމުގެ އިސް އޮފިޝަލުންގެ މެދުގައި ކުރެވުނު މަޝްވަރާތަކަށް ފަހު އެވެ. އަދި މި ދަތުރު ދެން ބާއްވާނެ ވަކި ތާރީހެއް އަދި ކަނޑަނާޅާ ކަމަށާއި މި ނިންމުން ނިންމަން ޖެހުނު މައިގަނޑު ސަބަބަކީ ކޯޓުގެ ނިންމުމާ ގުޅިގެން ޓެރިފްތަކަށް އަންނާނެ ބަދަލުތަކާ މެދު އުފެދިފައިވާ ޔަގީންކަން ނެތް ހާލަތެވެ.

މި ވަފުދުން މި ހަފުތާގައި ވޮޝިންޓަނަށް ދަތުރުކުރުމަށް ހަމަޖެހިފައި އޮތީ، ދެ ގައުމުގެ މެދުގައި ވަގުތީ ވިޔަފާރީގެ އެއްބަސްވުމެއްގައި ސޮއިކުރުމަށެވެ. އެ އެއްބަސްވުމުގެ ދަށުން އިންޑިއާއިން އެކްސްޕޯޓްކުރާ ބައެއް މުދަލުން އެމެރިކާއިން ނަގާ ބޮޑެތި ޓެރިފްތައް ކުޑަކުރުމަށާއި އޭގެ ބަދަލުގައި ކުރިއަށް އޮތް ފަސް އަހަރުދުވަހުގެ ތެރޭގައި 500 ބިލިއަން ޑޮލަރުގެ އެމެރިކާ މުދާ ގަތުމަށް އިންޑިއާއިން އެއްބަސްވުމަށް އޮތީ ހަމަޖެހިފަ އެވެ. މި ބަދަލާ އެކު އިންޑިއާގެ މުދަލުން ނަގާ ޓެރިފް %18އަށް ތިރިވާނެ ކަމަށް ބެލެވުނެވެ.

މި ދަތުރު ފަސްކޮށްފައި މިވަނީ، ކޯޓުގެ ނިންމުމަށް ފަހު، އެމެރިކާއަށް އެތެރެކުރާ ހުރިހާ މުދަލަކުން ވަގުތީ ގޮތުން %15ގެ ޓެރިފެއް ނެގުމަށް ޓްރަމްޕް އިއުލާނު ކުރެއްވިތާ އެއް ދުވަސް ފަހުންނެވެ. މިއީ ގާނޫނީ ގޮތުން ނެގޭނެ އެންމެ މަތީ މިންވަރެވެ.

އިންޑިއާގެ އިދިކޮޅު ކޮންގްރެސް ޕާޓީން ވަނީ، މި އެއްބަސްވުމާ މެދު އަލުން ވިސްނައި މަޝްވަރާތައް މެދުކަނޑާލުމަށް ސަރުކާރަށް ގޮވާލާފަ އެވެ. އަދި ކޯޓުގެ ނިންމުމުގެ ކުރިން އިންޑިއާގެ ބޮޑުވަޒީރު ނަރެންދުރަ މޯދީ ގުޅިފައިވާ ބަޔާނެއް ނެރުއްވި ސަބަބާ މެދު ވެސް އެ ޕާޓީން ވަނީ ސުވާލު އުފައްދާފަ އެވެ.

ވިޔަފާރިއާ ބެހޭ ވަޒީރު ޕިޔޫޝް ގޯޔަލް މީގެ ކުރިން ވިދާޅުވެފައިވަނީ، ވޮޝިންޓަންގައި ބާއްވާ މަޝްވަރާތަކުގައި މިހާރު ހުރި މައްސަލަތައް ހައްލުވުމުން، އޭޕްރީލް މަހުގެ ތެރޭގައި މި އެއްބަސްވުމަށް އަމަލުކުރަން ފެށޭނެ ކަމަށެވެ.